Ezekiyele 36
36
Mfuywezi za Nyambi ha litunga lya Ishalela
1Nyambi ya Ngula wambile kukwami ngayi, “Mwana muntu lubulula ku mapili a Ishalela ngayi, Enu mapili a Ishalela yuvwenu lizu lya Nyambi ya Ngula. 2Ndaba bamalamo benu bambilenga ngayi, ‘Haya aya mapili aku mwaka etu tuku wakona.’ ” 3Haya yanga ukabalubulwile pe ukambe ngayi, “Nyambi ya Ngula ukwamba ngayi, oho bamalamo benu bamipukwile na kumi lyatilila kuzimbalila nimwazo pe mwengile likona lya matunga nimwawo, bantu batatikile kumi kendula na kumitungula. 4Haya enu mapili a Ishalela munafwanini kuyuvwa lizu lya Nyambi ya Ngula. Ebye nibyo akwamba Nyambi ya Ngula ku mapili naku binkanda naku tunkonkolonga naku mikulo, kunebye nimwabyo binashiwuku naku zinkena zinashala nahiya ziya bapukwile ziya bali na kukendula bakamatunga nimwawo aya anazingulukuko.”
5Nyambi ya Ngula ukwamba ngayi, ninamba mazu na wukali wantukumina ya kulwisha awa matunga nimwawo hamo na litunga nimwalyo lya Endoma. Banashimbi litunga lyami na mitima ya kutangala oku hibakendula, banashimbi na zimbuwa zalyo za kubuyishila kwinga likona lyabo.
6“Haya yanga ukalubulule ku litunga lya Ishalela. Yanga ukatongweze mapili na binkanda na tunkonkolonga na mikulo ngayi, ‘Nyambi ya Ngula uli na kwamba na wukali walihungu, ndaba bakamatunga bali na kumi kendula kami bali na kumi lyatilila.’ 7Nyambi ya Ngula ukwamba ngayi, nikulibeza hinga nakatula liboko ngayi awa matunga amizinguluka naniwo kami akalyatililiwa. 8Ngoboni ha mapili a Ishalela mitondo yikazobela mabizi na kuyima mikabo ya bantu bami ba Ishalela ndaba wuluno baboke ku munzi. 9Enu bantu bami Ami nili nenu hamo, nikamibwesha mu litunga pe nikamitampika. 10Nikahanyisha bantu baya muli nabo hamo na baka litala nimwalyo lya Ishalela, mukekala mu zinkena pe mukatungulula nimwabyo biya byashalile hinga bya shiwuka. 11Nikahanyisha balume hamo na tuyamana tuya muli natwo, kami mukavula shikuma kupitakana eshi mwekalile, mukekala na bana babengi. Nikamileha mukekale ngonehe mwekalilenga, nikamitangamisha kupitakana eshi mwekalilenga. Pe mukalimuka ngayi Ami nili Nyambi ya Ngula. 12Nikamibwesha enu bantu bami baka Ishalela, ngayi mukekale kami mu litunga. Likenga likona lyenu nohobene liya litunga kuketabila mwanga bana benu bakafwe ku nzala lifwako.”
13Nyambi ya Ngula ukwamba ngayi, “Bantu bali na kwamba ngayi litunga lili na kulya bantu kami lili na kupukula bana bamu litunga. 14Haya kufuma hano litunga lifwako kukalya bantu, kami lifwako kukapukula bana benu. Eshe nisho akwamba Nyambi ya Ngula. 15Kaliha niketabilisha bakamatunga ngayi mwanga bakamitukane kami. Lisheni liya mwayuvwilenga lya kukenduliwa ku bantu kukekalako lifwako. Kami bana benu kukafumishiwa mu litunga lyenu bafwako.” Eshe nisho anamba Nyambi ya Ngula.
Mfuywezi ha bantu ba Ishalela
16Kami lizu lya Nyambi ya Ngula lyezile kukwami ngayi, 17“Mwana muntu, oho bantu ba Ishalela bekalilenga mu litunga lyabo, balibipishile na biheka byabo hamo na zintendelo zabo. Biheka byabo ku meho ami byengile ngo mazilo aya ekalanga nawo mbuyama ndi nayi ku ngonda. 18Niho netilile wukali wami hahabo ndaba bayitilile mukeza mu litunga kami babipishile litunga na tunankishi twabo. 19Nabatandilile mu matunga ashenge pe bapazaninine mu matunga. Nabayatile kwezekesha na biheka byabo hamo na zintendelo zabo. 20Pe omu mu matunga nimwamo bayile lizina lyami lya kuyela lyabipile, ndaba bantu babatoyelenga ngayi, ‘Aba nibo bantu ba Nyambi ya Ngula ngoboni banashiyi litunga lyendi.’ 21Nekalile na shitima ha lizina lyami lya kuyela ndaba baka Ishalela balibipishile mukati ka matunga kuya bayile.”
22Haya yanga ukambe ku baka litala lya Ishalela ngayi, “Nyambi ya Ngula ukwamba ngayi, ebye nikatenda kaliha byenu baka litala lya Ishalela, ngoboni ndaba ya lizina lyami lya kuyela elye munabipishi mukati ka matunga muya mwayile. 23Nikaholola kuyela kwa lizina lyami lyalinene elye munabipishi mukati ka matunga. Bakalimuka ngayi Ami nili Nyambi ya Ngula, oho nikamonesha kuyela kwami kupitila mumwenu pe bakalimonena nibo bamwine. Eshe nisho akwamba Nyambi ya Ngula. 24Nikamifumisha ku mikoka nimwayo naku matunga nimwawo pe nikamibwesha mu litunga lyenu. 25Nikamyanzila mema akuyela hahenu, pe mukayela, nikamiyelesha ku mazilo naku tunankishi twenu nimwato. 26Nikamipanika mutima wawupya na bihanganiko byabipya, nikafumisha mumwenu mutima wa limanya na kumipana mutima wawuntu. 27Nikayaka Moyo wami mumwenu pe nikamitwaminina ngayi mukombatale mazu wami na kulama ndayano zami eze ninamipana. 28Mukekala mu litunga liya napanikile bankakazenu, mukenga bantu bami pe Ami nikenga Nyambi yenu. 29Nikamilamwina ku mazilo enu nimwawo. Nikamimeneshela mbuto nohobene enu kukekala kami mu nzala mufwako. 30Nikawezelela mikabo yaku mitondo na mbuto yamu mafuba mwanga mukabule kuyuvwa lisheni ku bakamatunga ndaba ya nzala. 31Mukanuka zinzila zenu zazibi na byuma byabibi biya mwatendele, niho mukaliyuvwa wubi enu bamwine ndaba yanebye nimwabyo byabibi nanebye byawunyengwe. 32Nyambi ya Ngula ukwamba ngayi, nikushinga mulimuke ngayi kaliha nili na kutenda ebye ndaba yanenu, enu bantu ba Ishalela. Munafwanini kuyuvwa lisheni na wunginga ndaba yanebye munatende.”
33Eshe nisho anakwamba Nyambi ya Ngula ngayi, “Ha mutena ou nikamiyowesha ku wubi wenu nimwawo, nikamikalika mu zinkena zenu kami nimwabyo, biya byashiwukile bikatungululiwa. 34Litunga liya lyashalile nahiya likalimiwa pe bakakwenda baya bamonenenga mafuba wenu hinga azika bakawamona analimiwi. 35Pe bakamba ngayi elye litunga lyashalile nahiya hano lyafutukakale ngo mfuba ya Endeni. Zinkena zashiwukile ziya zashalile nahiya ziloba hano zili mu bipata kami mwekalakale na bantu. 36Niho baya bakashala ha matunga aya amizinguluka bakalimuka ngayi Ami nili Nyambi ya Ngula ninatungululu biya byashiwukile na ku shanga mbuto mu litunga muya mwashalile nahiya. Ami Nyambi ya Ngula ninamba pe nikashitenda.
37“Eshe nisho akwamba Nyambi ya Ngula ngayi, nikayuvwilila nimwabyo ebye bakalomba bana ba Ishalela kukwami, pe nikabetabila mwanga bakahanye ngonehe bambelele. 38Bakahanya ngonehe bambelele bankombela, ngonehe bahanyanga bambelele mu Yelushalema ha shikati sha bimbo bya kuhatiwa. Zinkena zabo zinashiwuku zikenzala na mihoko ya bantu. Pe bakalimuka ngayi Ami nili Nyambi ya Ngula.”
Currently Selected:
Ezekiyele 36: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
