Ezekiyele 17
17
Nguli ya mikolobozi ya shinyanca na bangonga
1Nyambi ya Ngula wambile kukwami ngayi, 2“Obe mwana muntu, tongweza baka Ishalela nguli 3ngayi balimuke eshe nikwamba Ami Nyambi ya Ngula kukwabo. Kwekalile ngonga wa lilengwalengwa wa mbando zazinene za kutandubuka. Niye wekalile na mahako a mishombela yayingi. Watukile kuya ku lipili lya Lembanoni niho apokwele mutwe wa mutondo wa shinda. 4Niye wawutwalile ku litunga lya bakamikwebo, washishangile mu munzi wa bakakulandisha. 5Niho ashimbile mbuto mu litunga lya Ishalela wakayikunine mu mfuba ya wilo omu mwekalile mema shikati nimwasho akuyikulisha. 6Mutondo wamenene na kutama kwinga wawipi na kuyima mikabo ya shinyanca. Myahi ya futukilile ku mbalila ya ngonga na mipishi yavumbamine mu nceto. Myahi ya mikolobozi ya shinyanca ya halabile na ku tundula mabizi.
7“Kwekalile ngonga wamina wa lilengwalengwa wa mbando zazinene na mahako akuzika. Niho haya mipishi ya mikolobozi ya shinyanca yapenzeshele kukwendi nakufutwila myahi na mabizi wayo kukwendi mu kuhanganika ngayi niye ukuyipananga mema amengi kupitakana kuyo ku mfuba yamenene mwaka. 8Ngoboni shinyanca sha kuniwile mu mfuba ya wilo, ya mema mwanga mikolobozi yitweshe kumena mabizi na kuyima mikabo na kwinga mikolobozi yayiwahe.”
9Nohobene Ami Nyambi ya Ngula nikwipula ngayi, “Kati eye mikolobozi ya shinyanca yikakula ndi? Kati ngonga wakutatika wufwako kukawuzula na mipishi yawo na kupulumunako mikabo, kumungozolako myahi na kuleha ngayi yiyume ndi? Yifwako kukashimba ngovu zazingi hinge litunga lya ngovu kulizula. 10Hinge niho unakuniwi, niwo ukakula ndi? Kati niwo wufwako kukayuma oku mpepo ya ku mushamuko yikawupekula ndi? Kati wufwako kukayuma oku yamenenene ndi?”
Nguli yikutontololiwa
11Nyambi ya Ngula wambile kukwami ngayi, 12“Yipula bantu bankani ndi nibo ba kulimuka osho yikutontolola eye nguli. Batongweze ngayi mwene waku Mbambiloni wezile ku Yelushalema na kushimba mwene na babilolo bendi kubatwala ku Mbambiloni. 13Niye washimbile umo waku likota lya wene mu kulimama shikulupisho nendi na kulibeza nendi kwinga wa kupwisha. Niho ashimbile bantu babalemu ngonehe bakakulama. 14Watendele eshe mu kukanisha mukoka ngayi hinga upinduka kami na ku mona ngayi shikulupisho shinalamiwi. 15Ngoboni mwene wa mu Yunda wakanine pe watumine bakakwimanina ku Engepita, mu kushimba bambishi na bakanzita babengi. Kati niye ukatwesha ndi? Kati niye ha kutenda nahiyo ukatwesha kupanza ndi? Kati niye ukutwesha kukiluka shikulupisho na kuya kwakubula ku shushuliwa ndi?”
16Nyambi ya Ngula unakwamba ngayi, “Mwa shikuma nehe nili Ami Nyambi Wakuyoya, ou mwene ukafwila mu Mbambiloni ndaba unakiluku mbeza zendi na shikulupisho atendele na mwene waku Mbambiloni, ou wamuyakile ha litanda. 17Hinge bakanzita ba Fwalo bali na ngovu, bafwako kukatwesha kukamuyavwa mu kulwa oho baka Mbambiloni bakabumba twimbi twa limvu na kukaba mateke ngayi mwanga bazihe bantu babengi. 18Niye wakilukile mbeza zendi na shikulupisho atendele. Pe watendele ebye byuma nimwabyo, haya kukapanza wufwako.
19“Nehe nili Ami Nyambi ya Ngula, nikamushushula ha kukiluka shikulupisho osho abezele mu lizina lyami. 20#2Bya 36:13.Ami nikamuvwima lunyimbwa niye ukakwatiwa mu kantamba kami, pe nikamuleta ku Mbambiloni na kumushushula, ndaba ya kubula kunyombatala. 21Bakanzita bendi ba kukangana bakazihiwa na mukwale, kami bakakupanza baketukila ku zimbalila nimwazo. Kami mukalimuka ngayi Ami Nyambi ya Ngula ninamba kupwisha.”
Shikulupisho sha mwene wamupya
22Eshe nisho anakwamba Nyambi ya Ngula ngayi,
“Nikashimba mutwe wa mutondo wa shinda wawutali
pe nikapokola munengo wawuboto na kuwu tampika ha lipili lyalitali.
23Nikawushanga ha lipili lyalitali lya Ishalela.
Niwo ukamena myahi na kuyima mikabo,
kami ukenga mutondo wa Shinda wawuwahe shikuma.
Mu nceto yawo mukekala tuyoni twamishobo nimwayo,
tukatenda mahwa na kwikala mu mubombola yawo.
24Mitondo nimwayo mu litunga yikalimuka ngayi Ami Nyambi ya Ngula.
Nikatema mitondo yayitali na kukulisha mitondo yayipi ngayi yitalihe.
Ami nikayumisha mitondo ya kubombola
na ku bombwesha mitondo ya kuyuma kami.
Nisho nikwamba Ami Nyambi ya Ngula.
Nikatenda eshe ninamba.”
Currently Selected:
Ezekiyele 17: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
