Kututika 35
35
Ndayano za Mutena wa Kukatala
1Moshesha wehanine likunge nimwalyo lya bantu ba Ishalela, pe wambile kukwabo ngayi, “Eshe nisho amitongwezele Nyambi ya Ngula ngayi mushitende. 2Mwekala na Matena mutanu na umo akutenda milimo yenu, ngoboni ha mutena wa mutanu na abili ukenga mutena wa kuyela, mutena wakukatala wa kuyela kuli Nyambi ya Ngula. Muntu nimwendi wakutenda mulimo wumo ha mutena uyo mwa shikuma ukazihiwa. 3Hinga mukayibika mundilo ha minkanda yenu ha mutena wakukatala.”
Zintupu za ku Ntanda ya Shikungulukilo
(Kututika 25:1-9)
4Moshesha wambile ku likunge nimwalyo lya bantu ba Ishalela ngayi, “Eshe nisho amitongwezele Nyambi ya Ngula, 5ngayi mutupule ntupu kukwendi. Muntu nimwendi uli na mutima wakupana alete ntupu ya ngolinde naya shiliva naya lubemba, 6na likwiza lyaliwahe lya kulelema na wutonge wawuhombo na wakufumbuluka na wakufubila na likwiza lya kutenda ha wushako wa bampongo, 7na bitembe bya bikungwe bya bambelele bya kulomba kufubila na bitembe bya bitutunga bya kunyuka shiwahe na bitondo bya mumbambangoma, 8na mazi a mimuni na lukumba lwa kuyaka mu mazi akuwaba na incence ya livumba lyaliwahe, 9na tumanya twa onikishi na tumanya twamina twa kulelema twa kuyaka mu kakobelo ka shizila namu kambandingwa kaha kapumpo ka mukankombela wa mukulwane.
Byuma bya mu Ntanda ya Nyambi ya Ngula
(Kututika 39:32-43)
10“Balume nimwabo bawutungu hakati kenu beze na kutenda byuma nimwabyo biya amitongwezele Nyambi ya Ngula. 11Batende ntanda na bya kufwika mukati kayo na bya kufwika ha munkanda na tuhanto twayo na maleenge wayo na mikambo yayo na zimpangwa zayo na tupona twayo. 12Batende na Likwati lya Kulimama na mibanda yalyo na muhuko walyo wa nceshe na shibaamba sha kulama Likwati lya Kulimama, 13na tebulu na mibanda yayo na byuma byayo nimwabyo na mankende akutupula kuli Nyambi, 14na lyeyeko lya mimuni ya kumunikisha na byuma byalyo na mimuni na mazi ayo akumunikisha, 15na kaala kakuhokeshelanga incence na mibanda yasho na mazi akuwaba na incence ya livumba lyaliwahe na mu wumbo waku menginino a ntanda. 16Batende na kaala kakuhokeshela zinkombela na luhalo lwasho lwa lubemba na mibanda yasho na byuma byasho nimwabyo na lizawo na kapona kalyo. 17Batende na miwumbo ya makwiza aku shipango na zimpangwa zasho na tupona na mu wumbo waku menginino a shipango, 18na zimpimpi na nyimbwa za kupohela za ku ntanda naku shipango, 19na bivwalo bya kutunga na manono byabiwahe bya shizila, biya bakavwalenga bakankombela oho bakatenda mulimo mu mwanya wa shizila, ebye binengi bivwalo bya shizila bya mukankombela Aloni na bana bendi.”
Bantu ba kuleta zintupu zabo
20Niho Baishalela nimwabo bakatukile na ku shiya Moshesha, 21pe nimwabo baya balukukile mitima na baya bekalile na mitima ya kupana baletele zintupu kuli Nyambi ya Ngula za kutendesha Ntanda ya Shikungulukilo. Baletele byuma nimwabyo biya byashingiwilenga ha kulemesha na bya kutendesha bivwalo bya mukankombela. 22Niho bantu nimwabo ku balume naku bambuyama aba bashingile, baletele bya kuliyenga bya mishobo nimwayo na tupatamatu na tumbalaminwe na mikali ya mu zincingo na mishobo nimwayo ya wuheti wa ngolinde. Nimwabyo ebye babiletele kuli Nyambi ya Ngula. 23Pe muntu na muntu ou wekalile na likwiza lyaliwahe lya kulelema na wutonge wawuhombo na wakufumbuluka, hinge wakufubila na likwiza lya wushako wa bampongo na bitembe bya bikungwe bya bambelele bya kulomba kufubila, hinge bitembe bya bitutunga bya kunyuka shiwahe, babiletele. 24Aba nimwabo batweshele kupana shiliva hinge lubemba, baletele ntupu yabo kuli Nyambi ya Ngula, kami aba nimwabo bekalile na bitondo bya mumbambangoma, ebye batweshele kutendesha ku mulimo babiletele. 25Bambuyama nimwabo bamanono baletele wutonge wawuwahe wakulelema na wutonge wawuhombo na wakufumbuluka na wakufubila ou bapohelelenga. 26Niho bapohelelenga kami na wutonge wa wushako wa bampongo. 27Bakakutwaminina kami baletele tumanya twa onikishi na tumanya twamina twa kulelema twa kuyaka mu kakobelo ka shizila namu kambandingwa kaha kapumpo, 28na lukumba na mazi aku mimuni na lukumba na mazi akuvwelesha mazi akuwaba na kutendesha incence ya livumba lyaliwahe. 29Nohobene Baishalela nimwabo, aba balukukile mitima, baletele zintupu zabo kuli Nyambi ya Ngula, za kutendesha milimo yiya abatongwezele Moshesha kuyitenda.
Bamanono ba ku Ntanda ya Shikungulukilo
(Kututika 31:1-11)
30Moshesha wambile ku Baishalela ngayi, “Monenu Nyambi ya Ngula unahata Mbezalela mwana Uli, muzukulya Hula waku mushobo wa Yunda. 31Nyambi unamwinzalishi na ngovu za moyo wendi na kumupana manono na ngana na kanangatima ku mishobo nimwayo ya mulimo wamanono, 32kami namupana ngana za ku fundika milimo ya wutungu na kuyitenda na ngolinde na shiliva na lubemba, 33na ku mangula tumanya twatuwahe twa kulelema twa kuyaka mu tukunzu na kubaza bitondo na mishobo nimwayo ya milimo ya manono. 34Niho Nyambi ya Ngula unapana kukwendi na kuli Oholiyaba mwana Ahishamaki waku mushobo wa Ndani, ngana za wutungu za ku longesha bamina. 35Niye unabapaniki manono akutenda mishobo nimwayo ya milimo ya bakakumangula na bakakufundika na bakakushinta makwiza amawahe a kulelema na wutonge wa wuhombo na wakufumbuluka na wakufubila. Bakutwesha kutenda mishobo nimwayo ya milimo pe banengi bakakufundika bamanono.
Currently Selected:
Kututika 35: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
