Kututika 23
23
Kupwisha na Kulunga
1 #
Kut 20:16; Bal 19:11-12; Nday 5:20. “Hinga ukendesha mbuzi ya mahalo. Hinga mukayavwa muntu wa mulandu na kupana wupaki wa mahalo. 2Hinga ukonka munayi babengi mukutenda wubi, hinge oho ba kupana wupaki uya wakukanisha kuyata na kupwisha. 3#Bal 19:15. Hinga wamba na shihota ha shambo sha mukakuyanda.
4 #
Nday 22:1-4. “Ndi ukuwana ngombe wa kamalamo kobe hinge mbongolo wendi nayongo, pe ukamubweshe kukwendi. 5Ndi mbongolo wendi unawu na shiyeko shendi, kaliha uku fwanina kumupitakana kumushiya, uku fwanina kumuyavwa na kumukatulamo.
6 #
Bal 19:15; Nday 16:19. “Ndi umo waku bantu benu wakuyanda ukuyatiwa, kaliha uku fwanina kuvwangavwanga shambo shendi. 7Benguka ku shambo sha mahalo, hinga ukaziha muntu wakubula mulandu, ndaba nikayata muntu ou ukatenda shuma sha shibi shanoho. 8Hinga ukatambula lizika kanwa, ndaba lizika kanwa likuzimananisha meho a bantu ku byakwoloka na ku shanwisha shambo sha naba bakubula mulandu.
9 #
Kut 22:21; Bal 19:33-34; Nday 24:17-18; 27:19. “Hinga wikalisha lipukwenda na shilala, ukulimuka eshe ayuvwanga lipukwenda mu mutima wendi, ndaba nobe kami wengile lipukwenda mu litunga lya Engepita.”
Mwaka wa mutanu na yibili na mutena wa mutanu na abili
10 #
Bal 25:1-7. “Ku myaka mutanu na umo ukashange mafuba wobe na kuteza mbuto yawo. 11Ngoboni ha mwaka wa mutanu na yibili, hinga ukashangamo, ukawalehe taha akalaluke, kami hinga ukatezamo mbuto ya kulimenena. Pe bakakuyanda bakalye ebye bikamenamo kami na tuyamana twa lishaka mwanga tukatweshe kulya ebye bikushalamo. Nisho kami ukatenda na mafuba obe a mikolobozi ya mikabo ya shinyanca na nawa a mitondo ya olive.
12 #
Kut 20:9-11; 31:15; 34:21; 35:2; Bal 23:3; Nday 5:13-14. “Ukatenda milimo yobe ha matena mutanu na umo, ngoboni ha mutena wa mutanu na abili ukakatale, nohobene ngayi bandungo bobe na mapukwenda aba ba kukutendela milimo na bimuna byobe mwanga bikatweshe kukatala.
13“Yuvwilila ku byuma nimwabyo biya Ami Nyambi ya Ngula ninamba kukwobe. Hinga ukalombela ku banyambi bashenge, hinga wezeka hinge kutoya mazina wabo.
Bimbo byabinene Bihatu
(Kututika 34:18-26; Ndayano 16:1-17)
14“Ukapinge bimbo bihatu ha mwaka bya kundemeeka. 15Mu ngonda wa Ambimbi, ngonda owe niye wafumine nendi mu Engepita, pinga shimbo sha mankende a kubula mumena ngonehe nakutongwezele. Ukalya mankende a kubula mumena ku matena mutanu na abili a shimbo. Hinga ukeza na kundemesha kwakubula kuleta ntupu.
16 #
Bal 23:15-21, 39-43; Kul 28:26-31. “Ukapinge shimbo sha kuhoma, oho mukatatika kuteza mbuto yobe.
“Ku mamaninino a mwaka ukapinge shimbo sha kubuyisha mikabo ku mafuba wobe. 17Bikati bihatu ha mwaka balume nimwabo bakamoneka ku meho wami, Ami Nyambi ya Ngula, Nyambi yenu.
18“Hinga ukatendesha mankende a mumena oho mukakombelela shimuna kukwami. Pe mazi a bimuna owo ukatendesha bimbo byami hinga akashalaho kukuma na ku lumenemene.
19 #
Kut 34:26; Nday 14:21; 26:2. “Ukaleta byabiwahe bya kutatika kuteza mu mafuba wobe ku Litala lya Nyambi ya Ngula, Nyambi yobe ha mwaka na mwaka.
“Hinga ukatelekesha mwana mbelele hinge mwana mpongo na mahwe a mandiyendi.
Bikulupisho na kufundiziza
20“Nikatuma lingeloyi kumbili yobe na kumi lama mu nzila nakakutwala ku mbalila eye nawahishi. 21Ukamwombatale na kuyuvwilila ebye akwamba. Hinga ukamufutulukila ndaba Ami namutumu, pe kukayatila milandu yobe ufwako ndaba lizina lyami lili mumwendi. 22Ngoboni ndi ukamwombatala na kutenda nimwabyo ebye nikukutongweza, pe nikalwisha bamalamo bobe nimwabo. 23Lingeloyi lyami likaya kumbili yobe na kukutwala mu litunga lya Baamoli na lya Bahita na lya Bapelizi na lya Bakenaani na lya Bahivi na lya Bayembushi, pe nikabalobesha. 24Hinga ukalamba ku banyambi babo hinge kubalemesha. Hinga ukahembwizika ebye bakatenda obo bantu, ngoboni ukanongeshe banyambi babo na kunyemuna tuula twabo twa mamanya twa kulemeshela. 25Ndi mukandemesha Ami Nyambi ya Ngula, Nyambi yenu, pe nikamitandalisha na byakulya na mema, kami nikamiyambulula malweli nimwawo. 26Mu litunga lyobe kowa mbuyama ukafwashangila, hinge kwinga mumba. Nikakukulumpalisha.
27“Aba bantu bakakukanangana nikabayuvwisha bowa wakuntina, nikaleta lumpa hakati ka bantu aba mukalwisha, kami nikashintulula bamalamo bobe ngayi bafume lubilo kukwenu. 28Nikapalanganisha bamalamo benu, pe nikatanda Bahivi na Bakenaani na Bahita kumbili yenu. 29Kukabatanda nimwabo ha mwaka wumo nifwako, kutina litunga likafutuka lipembe pe batuyamana ba lishaka bakakuvulila shikuma. 30Ngoboni nika kutandilabo shashishe shashishe, hantu nimwenu munavulu na kutwesha kukona litunga. 31Nikatenda zinginza za litunga lyobe kubalika ku likobo lya Akaba kukuma ku Mushinzi wa Yufuleti, kami kubalika ku liwate lya Menditaleniya kukuma ku libelelengwa. Nikakupana ngovu za kupitakana bamwine litunga, pe ukabatanda. 32Hinga ukaliyuvwa nabo hinge na banyambi babo. 33Hinga muketabilisha obo bantu kuzika mu litunga lyenu. Ndi mukabetabilisha, pe bakamitendesha wubi kukwami. Ndi ukalemesha banyambi babo, shikenga kukwobe lunyimbwa lwa ku kulobesha.”
Currently Selected:
Kututika 23: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
