Kututika 18
18
Yetilo ukuzingula Moshesha
1Yetilo mukankombela waku Mindiyani, ou wengile mukowa Moshesha, wayuvwile nimwabyo biya atendele Nyambi kuli Moshesha naku bantu ba Ishalela oho abafumishile mu Engepita. 2#Kut 2:21-22.Nohobene Yetilo waletele mukaza Moshesha Zipola, ou wekalile kukwabo, 3#Mil 7:29.hamo na bana bendi babalume babili, ba Ngeshoma#18:3 Likuyuvwanika na lizu lya mu Shihebelu kutontolola ngayi, “Lipukwenda.” na Eliyeza. Moshesha watumbile mwanendi wa mweli ngayi Ngeshoma ndaba wambile nehe ngayi, “Nengile lipukwenda mu litunga lyashenge.” 4Pe watumbile mwanendi wamina ngayi Eliyeza, ndaba wambile nehe ngayi, “Nyambi wa batate wanyavwile na ku ndamwina ngayi nibule kuzihiwa kuli Fwalo wamu Engepita.”
5Yetilo wezile na mukaza Moshesha na bana bendi babili mu libelelengwa oku atendelele Moshesha munkungwa ku lipili lya Nyambi. 6Watumine lizu shilumweza kuli Moshesha ngayi, “Mukowobe Yetilo uli munzila ulinakwiza kukwobe hamo na mukazobe na bana bobe babili.” 7Niho Moshesha akatukile kuya na kumushimbawila. Washinkamine kumbili yendi na kumuzupeza. Niho balishangwishile, pe benginine mu ntanda ya Moshesha. 8Moshesha watongwezele Yetilo nimwabyo biya atendele Nyambi ya Ngula kuli Fwalo na Engepita na bantu bendi ha kuyavwa Baishalela. Wamutongwezele kami makalikiza nimwawo aya bawanine ha nzila, kami naneshe abalamwinine Nyambi ya Ngula. 9Oho Yetilo ayuvwile ebye nimwabyo wawahililile shikuma. 10Pe wambile ngayi, “Yemezenu Nyambi ya Ngula ou wamipulwishile kuli Fwalo naku Baengepita! Wambile kami ngayi, ‘Nyambi ya Ngula ayemeziwe, ou walamwinine bantu bendi ku wulungo!’ 11Haya nikulimuka ngayi Nyambi ya Ngula, wamunene shikuma kupitakana banyambi nimwabo, ndaba watendele eshe oho Baengepita bayandishilenga Baishalela.” 12Niho Yetilo akombelelele nkombela yakuhokesha ya nzimba hamo na zinkombela zamina za kukombelela kuli Nyambi. Pe Aloni na bakulwane nimwabo Baishalela bezile hamo na mukowa Moshesha, mu kulya byakulya bya kuyela ku meho a Nyambi.
Kwimika bakakuyata
(Ndayano 1:9-18)
13Oho kwashileko, Moshesha wekalile na kuyata byambo mukati ka bantu, pe bamuzengaminine kubalika lumenemene kutwala ku mazolo. 14Oho Yetilo mukowendi Moshesha amonene nimwabyo biya atendelenga, wepwile ngayi, “Kati eshe shuma uli na kutenda ku bantu shanahiti? Shumangani ukutendela ebye nimwabyo ninkayobe na bantu nimwabo hinga bakwimanina kuleta manyengo wabo kukwobe, kubalika ku lumenemene kutwala ku mazolo?”
15Moshesha wakumbwile ngayi, “Niku fwanina kutenda eshe ndaba bantu bakwizanga kukwami mukwipwiziza shifungo sha Nyambi. 16Oho bantu babili bali na kulitutukisha, bakwiza kukwami, pe nikubatapulula mukati kabo na ku mona ngayi wuti nawahishi, pe nikubatongweza ndayano na mazu a Nyambi.”
17Niho Yetilo ambile kuli Moshesha ngayi, “Shuma eshe uli na kutenda kaliha shashiwahe. 18Ukalikwangisha obe mwine, hamo nanaba bantu. Eshe shinakulemene shikuma kutwesha ku shitenda ninkayobe wufwako. 19Haya yuvwa taha nikubele shiwahe, kami Nyambi ukekala nobe hamo. Shinengi shashiwahe kwimanina bantu ku meho a Nyambi na kutwala manyengo wabo kukwendi. 20Ukafwanina kubalongesha ndayano za Nyambi na kubatontwelela eshe ba ku fwanina kuyoya naneshe ba ku fwanina kutenda. 21Ngoboni kami hataho balume bamo bakakutina Nyambi, ba kupwisha, aba bakubula kutwesha kutambula lizika kanwa, kami ubemike kwinga bakakutwaminina bantu, bamo bakatwaminine matanga a makulukazi, bamo bakatwaminine matanga a myanda, bamo bakatwaminine matanga makumi mutanu, bamina bakatwaminine matanga a makumi a bantu. Baku fwanina kwinga bantu ba kutina Nyambi aba ba kutwesha kukulupiliwa. 22Bemike benge bakakuyata bantu shikati nimwasho. Bakatwesha kuleta byambo byabikalu kukwobe, ngoboni nibo bamwine bakaketula byambo byabishe. Pe shikenga shawangu kukwobe, pe nibo bakakuhehula ku muziho. 23Ndi ukatenda nehe, ngo nehi Nyambi akukutongweza, kukakwanga wufwako. Pe aba bantu nimwabo bakaya ku zintanda zabo na byambo byabo hinga byaketuliwa.”
24Nohobene Moshesha wayuvwile lizu lya kubela kwa Yetilo, kami watendele nimwabyo biya amutongwezele. 25Wahatile balume bakanangatima mukati ka Baishalela nimwabo, kami wabemikile kwinga bakakutwaminina matanga a makulukazi na matanga a myanda na matanga a makumi mutanu na matanga a makumi a bantu. 26Pe bayatilenga bantu ha bikati nimwabyo. Byambo byabikalu babiletelenga kuli Moshesha, ngoboni byambo byabishe babiketwilenga nibo bamwine. 27Niho Moshesha na Yetilo balishalishileho, pe Yetilo wabokele kukwabo.
Currently Selected:
Kututika 18: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
