Kututika 14
14
Kuzabuka liwate lya kufubila
1Niho Nyambi ya Ngula ambile kuli Moshesha ngayi, 2“Tongweza bantu ba Ishalela baboke na kutulila kumbili ya Pi hahiloti, mukati ka Mingindo na liwate lya kufubila, hahepi na Mbaalu Zefwoni. 3Fwalo ukahanganika ngayi, ‘Baishalela bali na kuyambangila mu litunga, kami ngayi libelelengwa lina bashinkili.’ 4Nikakaluhisha mutima wa Fwalo. Pe ukamikonka, nohobene ngayi kukoma kwami hali Fwalo na bakanzita bendi nimwabo kukaleta maleema kukwami. Baengepita bakalimuka ngayi Ami nenga Nyambi ya Ngula.” Baishalela batendele ngonehe abatongwezele.
5Oho bashimikilile mwene wamu Engepita ngayi bantu banashili, pe Fwalo na babilolo bendi bafutwile mitima yabo hahabo, pe bambile ngayi, “Tunatende nahiti? Aha tunetabilishi Baishalela ngayi bashile, pe twabayawakale kwinga bandungo betu!” 6Nohobene Fwalo wawahishile makoloyi endi a nzita hamo na bakanzita bendi nimwabo. 7Washimbile makoloyi myanda mutanu na umo amawahe shikuma na kuyakaho wingi wa makoloyi amina kami aku Engepita, awa ekalile na bakakuwendesha. 8Nyambi ya Ngula wakaluhishile mutima wa Fwalo, pe wakonkele Baishalela, aba bakatukile na kukanca kwa ku ndikangila. 9Baengepita hamo na bambishi nimwabo na makoloyi a Fwalo na bakakwendesha bendi na bakanzita bendi, batandile Baishalela. Pe babawanine banatulu ku liwate lya kufubila, hahepi na Pi hahiloti na Mbaalu Zefwoni.
10Oho Baishalela bamonene Fwalo na bakanzita bendi hibeza kukwabo na kuwuluta, Pe bekalile na bowa wawunene shikuma, niho bantu ba Ishalela bakalokelele kuli Nyambi ya Ngula ngayi abayavwe. 11Bambile kuli Moshesha ngayi, “Kati ku Engepita kowa binzimbi aha unatulete na kufwila muno mu libelelengwa ndi? Mona haya ebye watendakale kukwetu ha kutufumisha mu Engepita! 12Nka eshe nisho shiya twakutongwezele oho shilolo tufume mu Engepita ngayi shikamoneka. Twambile ngayi utulehe tuhu twinge bandungo ba Baengepita, kami nisho shengile shashiwahe kukwetu kwinga bandungo kupitakana kufwila muno mu libelelengwa.”
13Pe Moshesha wakumbwile ku bantu ngayi, “Hinga mutina! Shumenu mitima, pe mu ku mona eshe enze atende lelo Nyambi ya Ngula mu kumipulwisha. Hinga mwaka mukatanga aba Baengepita kami kubamona. 14Nyambi ya Ngula ukumilwila, pe enu kaliha mwafwanina kulifulankana.”
15Nyambi ya Ngula wambile kuli Moshesha ngayi, “Kati shumangani mu kukalokela kukwami? Tongweza bantu ba Ishalela ngayi baye kumbili. 16Olola muwana wobe, pe wolwele liboko lyobe ha liwate, mwanga mema alitape ngayi Baishalela batweshe kuzabuka mu liwate ha limvu lya kuyuma. 17Pe nikakaluhisha mitima ya Baengepita ngayi mwanga bakamikonke munyima pe nikawane maleema ha kukoma Fwalo na bakanzita bendi na makoloyi endi na bakakwendesha bendi. 18Oho nikabakoma, Baengepita bakalimuke ngayi Ami Nyambi ya Ngula.” 19Niho lingeloyi lya Nyambi, ou watwamininenga kumbili ya likunge lya Baishalela wafumineko, wabokele munyima yabo. Kami likumbi lya kwimana nkonka lyafumine kumbili yabo na kwimana kunyima yabo, 20lyezile mukati ka Baengepita na Baishalela. Pe likumbi lyafutukile mincimpwe ku Baengepita, ngoboni lyapanine liyeye ku Baishalela. Kami makunge kaliha atweshele kwiza kwakwipi na kuliwana umo na wamina wushiku nimwawo.
21Niho Moshesha olwele liboko lyendi ha liwate pe Nyambi ya Ngula wabweshele mema a liwate munyima na nkuli ya ngovu ya ku mushamuko wushiku nimwawo, pe wayumishile liwate na mema alitapile. 22Baishalela bazabukile mukati ka liwate ha limvu lya kuyuma. Na mema emanine ngo tushinko, awa ku shilyo amina ku shimoho. 23Baengepita babatandile na kubakonkelela mu liwate na bambishi nimwabo na makoloyi abo na bakakwendesha babo. 24Ha shikati sha malungashiku Nyambi ya Ngula watilaminine hanci ku likunge lya nzita ya Engepita, hinga ekala mu likumbi lya kwimana nkonka na mu mundilo. Pe wabatampwishile na kubapocakana, 25wemikile mawili a makoloyi abo ngayi mwanga bawane wukalu wawunene hakwenda. Pe Baengepita bambile ngayi, “Tokonoko! Haya tutinenu! Tufume ku Baishalela, ndaba Nyambi ya Ngula uli na kubalwila na kutulwisha!” 26Niho Nyambi ya Ngula ambile kuli Moshesha ngayi, “Olwela liboko lyobe hayilu ya liwate, pe mema aboke ha Baengepita na makoloyi abo hamo na bakakwendesha babo.” 27Nohobene Moshesha wolwele liboko lyendi hayilu ya liwate, pe oho kwashile lumenemene mema abokele ngonehe ekalilenga mwaka. Baengepita bezekele kupanzana, ngoboni Nyambi ya Ngula waba kupwile na mema amu liwate. 28Mema abokelemo, akupwile makoloyi na bakakwendesha na likunge lya bakanzita ba Fwalo nimwalyo lya Baengepita liya lya konkelenga Baishalela mu liwate. Kowa hinga umo washalileho. 29Ngoboni Baishalela bendelenga ha limvu lya kuyuma mu liwate, mema engile kashinko awa ku shilyo awa ku shimoho.
30Ha mutena uyo Nyambi ya Ngula wapulwishile bantu ba Ishalela ku Baengepita, pe Baishalela bamonene mituntu ya Baengepita ku shibumbo sha liwate hinga ya ndiluka ya kufwa. 31Oho Baishalela bamonene ngovu zazinene eze akomene nazo Nyambi ya Ngula Baengepita, pe batinine Nyambi ya Ngula. Nakukulupila muli Nyambi ya Ngula na muli mukamulimo wendi Moshesha.
Currently Selected:
Kututika 14: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
