Eshita 5
5
Eshita ukwihana Mwene Zekishi na Hamani ku mayambwayambwa
1Ha mutena wawuhatu wakuzila kulya kwendi, Eshita wavwalile bivwalo byendi bya wene, pe wayile na kwimana mukati ka shipango sha ku musheke, hinga atilamina ku kampenci ka litanda. Mwene wekalile mukati ha litanda lya wene, hinga atilamina ku menginino. 2Oho mwene amonene Lihano Eshita hinga emana ha munkanda, mwene wavwabukile mutima, pe watabikizile muwana wa ngolinde ou wekalile mu liboko lyendi kuli Eshita. Niho Eshita ayile naku ukwata ha nkumo yawo. 3Pe mwene wamwipwile ngayi, “Bishini obe Lihano Eshita? Ntongweze ebye ukushinga, pe nika kupana, hinge ndi shinengi shitika sha litunga lyami.”
4Niho Eshita akumbwile ngayi, “Hekulu, ndi nisho shikukuwahilisha, ami nikushinga obe na Hamani mukekale oku ninamiwahishili mayambwayambwa lelo.”
5Niho mwene atuminine Hamani ngayi eze wanguwangu, mwanga bakekale ku mayambwayambwa a Eshita. Pe mwene na Hamani bezile ku mayambwayambwa a Eshita. 6Oho banwinenga waine, mwene wepwile Eshita ngayi, “Ntongweze eshe ukulambilila, pe ukutwesha kushiwana. Nikakupana hinge ndi ukanyepa shitika sha litunga lyami.”
7Ngoboni Eshita wakumbwile ngayi, “Kulambilila na kunyepa kwami kunengi okwe, 8Hekulu, ndi ami nayamiziziwi kukwobe, kami ndi shikukuwahilisha, ngayi umpane kulambilila kwami nikushinga, obe na Hamani mukekale ku mayambwayambwa nikamiwahishila kami nzona. Ha shikati shiyo nikakutongweza ebye nikushinga.”
Hamani ukufunga kuziha Mondikayi
9Oho Hamani afumine ku mayambwayambwa wawahililile shikuma na kwikala mu mpoza. Ngoboni oho amonene Mondikayi ku menginino a musheke, Mondikayi wabulile kukatuka hinge ku monesha maleema oho apitilenga, pe Hamani wamupilamininine shikuma. 10Ngoboni Hamani wakwatile mutima niho ayile ku munzi. Pe wehanine bahoni bendi ku litala lyendi hamo na mukazendi Zeleshi. 11Hamani waliyemezele kukwabo ha wuheti wendi ekalile nawo na bana bendi babalume ekalile nabo na nimwamo omwo amutumpwilile mwene ku shipona shashinene na maleema ekalile nawo amanene kupitakana babilolo ba mwene bamina. 12Hamani wambile ngayi, “Haya kami nikushinga bishini. Lihano Eshita kaliha nehana muntu wamina ku mayambwayambwa ndele tuhu mwene na nami, tunehaniwi ngayi mwanga tukabokeko kami nzona. 13Ngoboni kuli tuhu shuma shimo, ku mutima wami kuyuvwa shiwahe nifwako oho niku mona uyo Kayunda Mondikayi hinga ekala ku menginino a musheke.”
14Nohobene mukazendi Zeleshi na bahoni bendi nimwabo bambile ngayi, “Shumangani wabulu kuzika bitondo byabitali bya mamita 22? Pe nzona lumenemene ukatwesha kukatongweza mwene ngayi Mondikayi akashwangiweko, pe ukatwesha kuya na mwene ku mayambwayambwa hinga wawahilila.”
Hamani wahanganikile ngayi eshe shinengi shashiwahe, niho azikile bitondo bya kuzihila bantu.
Currently Selected:
Eshita 5: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.