Eshita 3
3
Bihanganiko bya Hamani bya kulobesha Bayunda
1Oho shikati shapitile, Mwene Zekishi watumpwile Hamani ngayi enge mwanashihemi wendi. Hamani wengile mwana Hamendata, muzukulya Angange. 2Niho mwene atongwezele babilolo nimwabo bakamulimo wendi ngayi bapane maleema kuli Hamani na kumufunkamina na kulamba kukwendi. Bantu nimwabo batendelenga noho, ndele tuhu Mondikayi niye wakanine kutenda noho. 3Niho babilolo bamina bamu milimo ya wene bamwipwile ngayi shumangani anakanini kwombatala ndayano za mwene. 4Bamukandamikilenga ha mutena ha mutena, ngoboni kaliha wabayuvwililenga. Wabatongwezele ngayi, “Ami nili Kayunda, pe kutwesha kufunkamina Hamani nifwako.” Nohobene batongwezele Hamani haneshe na kutatilila ngayi bamone ndi Hamani ukutwesha kubweshela Mondikayi wubi ku wubi. 5Hamani wapilamine oho alimukile ngayi Mondikayi kufunkama na kulamba kukwendi wufwako. 6Ngoboni oho alimukile ngayi Mondikayi wenga Kayunda, wahanganikile bya kushushula Bayunda nimwabo, kupitakana kushushula Mondikayi ninkayendi. Hamani wahanganikile bya kuziha Bayunda nimwabo mu litunga lya Pesha nimwamo.
7Mu mwaka wawulikumi na yibili wakulela kwa Mwene Zekishi, mu ngonda wakutatika, niye ngonda wa Nishani#3:7 Nishani: Mu shihebelu, mu shinkoya Shishika. ba kuninenga nyela yatumbiwile ngayi Puli kumbili ya Hamani mu zingonda na mumatena. Bakunine nyela ngayi bashingishishe mutena na ngonda waku fwanina wakutenda lubeta lwendi. Ha mutena wawulikumi na ahatu wa ngonda wawulikumi na zibili, mu ngonda wa Anda#3:7 Anda:Mu shihebelu, mu shinkoya Yowayowa., niwo mutena ayakilemo wakutenda lubeta olwe.
8Nohobene Hamani watongwezele mwene ngayi, “Kuli litanga lya bantu bamo banapanzanini mu litunga lyobe nimwamo, bakuwaniwa mu litunga nimwalyo. Biheka byabo byabula kulifweka na nobyo bya bantu bamina nimwabo. Pe kami nibo kwombatala mazu a mwene bafwako, nohobene kaliha shinengi shashiwahe ngayi ubalehe nahiya. 9Hekulu, ndi eshe shikukuwahilisha ku mutima, bilika lukuwa ngayi bayatiliwe lufu. Ndi ukutendasho, nika kukulupisha ngayi nikayaka mali a makilongilamu 340,000 a shiliva mu Mfuma ya wene yakwendesha litunga.”
10Niho mwene afumishile kambalaminwe kendi kakukantisha na kukapanika ku kamalamo wa Bayunda, Hamani mwana Hamendata, muzukulya Angange. 11Mwene watongwezele Hamani ngayi, “Koweza mali, tenda tuhu omu ukushingila na ba bantu.”
12Ha mutena wawulikumi na ahatu wa ngonda wakutatika, Hamani wehanine bakakutikita ba mwene na kubemika mu kutikita na kutontolola mazu mu zindimi nimwazo zikwambiwa mu litunga, ngayi bawatume ku bakakwendesha litunga, batulela na babilolo bendi nimwabo. Mazu atikitiwile mu lizina lya Mwene Zekishi na kukantiwa na kambalaminwe kendi. 13Bantumwana batwalile awa mañwati mu matunga nimwawo a wene wendi. Mu mañwati mwekalile ndayano ngayi ha mutena wawulikumi na ahatu wa ngonda wa Anda, Bayunda nimwabo bafwanina kuzihiwa, batwanuke na bakulwane, bambuyama na bana. Nibo ba ku fwanina kuzihiwa na kulobeshiwa na kubula kubayuvwila nceshe, pe byuma byabo nimwabyo bipukuliwe. 14Eze ndayano ziku fwanina kubilikiwa mwaana ncanana mu matunga nimwawo, ngayi bantu nimwabo mwanga batweshe kuliwahisha oho mutena uyo shilolo ukume.
15Mwene wafundizizile bantumwana kuya mu ku bilika mazu a Hamani, mwaana ncanana mu lukena lwa Shusha. Pe bantumwana batwalile mazu ku matunga shawanguwangu. Mwene na Hamani bekalile na kunwa, ngoboni bantu bamu lukena lwa Shusha bekalile munculyanculya.
Currently Selected:
Eshita 3: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.