Eshita 1
1
Lihano Vashiti ukuhandula mwene Zekishi
1Ebye nibyo byaholokele ha shikati sha Zekishi, ou wengile mwene wamunene wamu Pesha. Walelele matunga 127 kubalikila ku Indiya kukuma na kupitilila Etopya.
2Ha matena ayo, oho Mwene Zekishi ekalile ha litanda lyendi mu lukena lwalunene lwa Shusha, 3mu mwaka wawuhatu wakulela kwendi, mwene wapingile shimbo sha mayambwayambwa sha babilolo bendi na bakamilimo bendi nimwabo na bakakwendesha litunga. Bakanzita ba ku Pesha naku Mendiya nimwabo niko bekalile, hamo na batulela na bantu babalemu bamu matunga. 4Mu matena 180 nimwawo wamoneshele kuvula kwa wuheti wamu wene wendi nimwawo na wuwahe wawo, ku monesha okwe kwengile kwakuwahe shikuma na wunene na maleema.
5Oho matena ayo apitile, mwene watendelele bantu nimwabo ku balika ku babanene kutwala ku babashe shimbo sha mayambwayambwa mu lukena lwalunene lwa Shusha, aya amanishile shunda nimwayo, kami atendiwilile mu mwanya wa maluba aku lukena. 6Ku shipango kwekalile bibaamba bya wutonge wakutowanisha, wutonge wa wuhombo na wakutuba, byamangiwile na nyimbwa zaziwahe za kulelema ku tunkunda twa shiliva ha zimpangwa za mamanya. Bipona bya kuyendamina byatendiwile ha ngolinde na shiliva byayakiwile mu shipango sha ku lambulula na kutowanisha na mamanya a kutuba akushuma na nawa akufumbuluka na mamanya a kutuba a kubyazima amina amawahe a kulelema. 7Bya kunwa byayakiwile mu zinkomoki za ngolinde za mishobo na mishobo, kaliha zengile za kulifweka. Kami waine ya wene yapanikiwile mu wingi ngo mu shifungo sha mwene. 8Kaliha kwekalile kukanisha bantu bya kunwa, ndaba mwene watongwezele bakamilimo ba ku musheke ngayi bantu nimwabo banwe ngo omu ba kushingila.
9Oho mwene Zekishi atendele mayambwayambwa, ha shikati shimobene, Lihano Vashiti watendelele bambuyama mayambwayambwa.
10Ha mutena wa mutanu na abili wa mayambwayambwa wendi, mwene wanwinenga waine na ku wahilila, niho ehanine bantatula mutanu na babili baya bengile bakamilimo bendi baha mutima na ba Mehumani na Mbizita na Hambona na Mbingita na Ambangita na Zeta na Kalikashi. 11Mwene wabatongwezele ngayi bakalete Lihano Vashiti, hinga avwala munana wendi wa wene. Lihano wengile mbuyama wamuwahe shikuma, kami mwene washingile ku monesha wuwahe wa Lihano ku babilolo naku bayeni bendi nimwabo. 12Ngoboni oho bakamilimo bendi batongwezele Lihano Vashiti mazu a mwene, wakanine kuyako. Eshe shapilamishile mwene shikuma.
13Shengile shiheka sha mwene kwipulanga bankongo bendi bakanangatima na ngana, bya ha kufundiziza na ha ndayano, pe wehanine bankongo baya ba kulimuka bya ku fwanina kutenda.
14Babilolo baya bamubelelenga baha mutima bengile ba Kalishena, Shetali, Andimata, Tashishi, Meleshi, Malishena na Memukana, nibo bengile babilolo mutanu na babili ba ku Pesha naku Mendiya, aba bekalile ha bipuna byabinene mu wene. 15Mwene wambile ku bantu aba ngayi, “Ami Mwene Zekishi natuma bakamilimo bami kuli Lihano Vashiti na kumwihana ngayi eze, ngoboni unabulu kwombatala. Kati ndayano zikwamba ngayi tuku fwanina kumutenda nahiti?”
16Niho Memukana atongwezele mwene na babilolo bendi nimwabo ngayi, “Lihano Vashiti kuhandula mwene tuhu wufwako, ngoboni nahandwili kumo na babilolo nimwabo, hamo na balume nimwabo bali mu litunga lya mwene. 17Ndaba ya neshe anatende lihano, shikaletesha ngayi bambuyama nimwabo mu litunga balimbwilishenga bakokwabo, nibo bakamba ngayi, ‘Mwene Zekishi unehana Lihano Vashiti ngayi aye kukwendi, ngoboni unakana.’ 18Oho bakaza babilolo ba wene waku Pesha naku Mendiya bakayuvwa ntendelo ya lihano, bakaya na kutenda nahiyo kami ku babilolo oho mutena shilolo ulele. Pe kukekala lihandu lyalinene na kalimbwilisho. 19Ndi shikukuwahilisha, obe hekulyetu, bilika lizu ku wene ngayi Vashiti kukenga kami lihano lya mwene wufwako. Yimika ndayano eze, kami zitikitiwe mu libuka lya ndayano za ku Pesha naku Mendiya, ngayi hinga zikafutuka. Niho uhingishemo mbuyama washenge wamuwahe wakulilemenena kwinga lihano. 20Oho lukuwa lwobe lukabilikiwa mu litunga lyobe lyalinene nimwamo, bambuyama nimwabo bakapanika maleema bakokwabo hinge ndi banengi ba kuheta, hinge ndi banengi bancepwe.”
21Mwene na babilolo bendi betabilile ha shihanganiko eshe, niho mwene atendele ngonehe ahanganikile Memukana. 22Niho Mwene atumine mañwati mu matunga nimwawo a wene, mu lulimi lwa litunga liyo namu ntikitilo yalyo na kwamba ngayi mulume nimwendi wafwanina kwinga mutwe mu litala lyendi, kami uli na ngovu za kuketula byambo nimwabyo.
Currently Selected:
Eshita 1: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.