Mukakushimikila 2
2
1Nalyambashanine mu mutima wami ngayi, “Nikwezeke ku bya mwelembo, mwanga uwane ngayi byabiwahe biti.” Ngoboni nawanine ngayi binengi byabikalu ku yuvwishisha. 2Nawanine ngayi lihepela kwenga kupempela, kami mu myelembo mwabula wuwahe. 3Nezekele ku nwa waine ngayi niliyuvwe shiwahe mu mutima wami na kuhanganika kami zinzila za kutenda byuma byowa. Ha bikati ebye nimwabyo ngana zatwalilileho kwendesha mutima wami. Nahanganikile ngayi nkampe eye niyo nzila ya ku fwanina kuyoyelamo hano hanci.
4 #
1Bamy 10:23-27; 2Bya 9:22-27. Natendele milimo yayinene shikuma. Nazikile matala na kulima mafuba a mikabo ya shinyanca. 5Naliliminine mafuba amimwine omo na kunine mitondo ya mikabo nimwayo. 6Nakabile mashima a mema akuyitilila awa mafuba a mikabo. 7#1Bamy 4:23. Nalandile bandungo babengi babalume nanaba babakazi, kami kwekalile bamo bahemuwilile mu litala lyami. Nahetele bimuna byabingi kupitakana bantu nimwabo bekalile mu Yelushalema oho shilolo nishwane. 8#1Bamy 10:10, 14-22. Nalikungwilile shiliva na ngolinde owo baletelenga bamyene ou wekalile mu zimfuma za wene wa matunga nalelelenga. Balume na bambuyama banyimbilililenga na kungwahililisha, kami nekalile na banjenge babengi. 9#2Bya 29:25. Niho nengile wamunene shikuma kupitakana nimwabo baya bekalileko mu Yelushalema oho shilolo nishwane, kami nekalile na ngana ha nimwabyo ebye natendelenga. 10Byuma na shingile nimwabyo nabiwanine. Kaliha nakanine shuma sha kungwahililisha. Naliyemezele ha byuma nimwabyo nalitendelele, kami nimwabyo ebye byengile ncuungu ya mulimo wami. 11Niho nahanganikile milimo nimwayo ya maboko wami natendele, kami namonene ngayi nimwabyo byengile byowa, shinengi ngo kutanda mpepo, kami kowa ebye nikawanaho hano hanci.
12Niho na balikile kuhanganika byuma binayili ha ngana na ha kupempela na kubula ngana. Kati muntu nashwana kwinga mwene, ukutwesha kutenda Byumangani bya kubula kutenda wakutatika? 13Pe niho namonene ngayi ngana zikuyavwa shikuma, zikupitakana wuleya ngonehe liyeye likupitakana mincimpwe. 14Bantu bangana ba kutwesha kulimuka oku bakuya, bileya bakwenda mu mincimpwe, ngoboni hinge noho nalimuku ngayi shuma sha kutamwa shikeza ku nimwabo. 15Niho nalihanganikile ngayi, “Shuma shatendiwa ku wakuyeba nisho kami shikatendiwa kukwami, haya shumangani nawanaho hakwikala wangana shikuma?” Niho nalishushutile mu mutima wami ngayi, ebye binengi byowa. 16Ndaba bantu bangana na bakubula ngana kowa ukanukiwa mwaya myaka. Ku matena a kumbili nimwabo bakavulamiwa. Wangana ukafwa na shileya kami ukafwa. 17Nazimbile wumi, ndaba nimwabyo bikutendiwa hano hanci byenga bya wunginga kukwami, nimwabyo binengi ngo kutanda mpepo.
18Nazimbile kami ebye nawanine ha milimo natendele hano hanci, ha ku mona ngayi nimwayo nikayishiyila muntu ou ukancwana. 19Yani ukulimuka ndi ukenga muntu wangana hinge ndi wakuyeba? Niye ukakona nimwabyo biya natendele na ngana ziya nawanine ebye byuma hano hanci. Ebye kami binengi byowa. 20Pe mutima wami watatikile kulihupwiza ha milimo yami nimwayo natendele shikuma hano hanci. 21Ndaba bikati bimo muntu uya unatende milimo na ngana na kalimukisho nimwako na wutungu wendi nimwawo, ebye nimwabyo ukutwesha kubishiyila wabulile kutenda milimo. Ebye kami binengi byowa, kami shinengi sha shibi. 22Kati muntu ukawanamo bishini mu milimo yendi nimwayo na mu litengela lyendi hanebye anatende hano hanci? 23Ndaba matena wendi nimwawo anenzala na makando na manyengo, kami ku wushiku bihanganiko byendi kutula mushali bifwako. Ebye kami binengi byabikalu kubiyuvwishisha.
24Kati kowa shashiwahe ku muntu kupitakana kulya na kunwa na kulikuwa ku litengela lyendi. Hinge noho ebye nimwabyo nabimonene ngayi bikufuma ku liboko lya Nyambi. 25Ndaba kwakubula niye, yani ukutwesha kulya na kulikuwa niyemwine? 26#Yobo 32:8; Zinc 2:6.Ndaba Nyambi ukupana ngana, kalimukisho na ku wahilila ku bantu ba kumuwahilisha ku mutima, ngoboni ku bakawubi, ba kutenda mulimo wakukungulula na kukowezesha na kubipanika ku muntu uya ukuwahilisha Nyambi ku mutima. Ebye kami binengi byowa, Kami binengi ngo kutanda mpepo.
Currently Selected:
Mukakushimikila 2: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.