Ndanyele 7
7
Shimono sha Ndanyele ha batunzama banaa
1Mu mwaka wakutatika oho Mbeleshaza engile mwene wamu Mbambiloni, Ndanyele walotele wushiku kami wamonene shimono, oho alanganine ha wulili wendi. Niho atikitile owe mulo na ku shimika ebye amonene mu mulo wushiku. 2Ebye nibyo atikitile Ndanyele ngayi, mu shimono shami wushiku napenzele pe namonene zimpepo zinaa za muyilu za nkwancanishile liwate lyalinene. 3Batunzama banaa babanene bafumine mu liwate, umo wabulile kulifweka na baminendi. 4Wakutatika walifwekele na shimbwi ngoboni wekalile na mbando ngonehe za ngonga. Aha na mupenzelenga, mbando zaketokele. Kanzama wakatuliwile wemanine na mawulu abili ngonehe muntu. Niho apanikiwile kami mutima wa muntu. 5Namonene kanzama wa wubili wamonekele ngonehe mbeya, unemana na mawulu wendi akunyima. Mu kanwa kendi wekalile na mpati zihatu, watongweziwile ngayi, “Katuka uvwote nyama yayingi.” 6Oho byapitile ebye, namonene kami kanzama wamina. Wamonekele ngonehe kampulu. Ha mongo wendi hekalile mbando zinaa, za kufweka ngonehe mbando za kayoni. Owe kanzama kami wekalile na mitwe yinaa. Wapanikiwile ngovu za kulela. 7Niho namonene kanzama wawunaa. Wengile wakukomokesha, kami wengile wakutinisha na ngovu shikuma. Wabilyatalyatile na mawulu wendi, ebye abulile kuvwota na mayewe wendi amanene a byondo. Kanzama kaliha walifwekele ngonehe batunzama bamina, kami wekalile na mashengo likumi. 8Shikati nahanganikilenga ha bya ncengo, namonene lishengo lyalishe lyatutikilenga mukati ka mashengo amina. Nilyo lyazulileho mashengo ahatu aya ekalileko mwaka. Elye lishengo lyekalile na meho na kanwa kakufweka ngo ka muntu, kaya kambilenga bya kulitemba na kuliyemeza.
Shimono sha muntu umo wakushikale
9Oho natilamininenga, namonene matanda ayakiwile mu mwanya na umo waku shikale, wekalile ha litanda limo hakati ka matanda. Bivwalo byendi na huki zendi byengile bya kutuba shikuma ngonehe wutonge. Litanda lyendi lyalashekelenga na mundilo na mibalo yalyo ya bangilenga. 10Kashinzi ka mundilo kakunkwilenga zimbalila nimwazo za muzingulukile. Kwekalile bantu makulukazi na makulukazi aba bamutendelelenga milimo nama miliyoni a bantu emanine kumbili yendi. Bashinkulwile nkuta na mabuka afwikululiwile.
11Natilaminine ndaba nayuvwile lishengo lyalishe hililitemba na kuliyemeza. Aha nashengezelele uya kanzama wawunaa wazihiwile, lutu lwendi balushanyozwele pe baluyumbilile mu milangi ya mundilo. 12Tunzama bamina bayanguliwile ngovu zabo, ngoboni babetabilishile kuya mukwikala shikati shapanikiwile. 13Shikati sha shimono shami sha wushiku, namonene wamina ou wamonekele ngonehe mwana muntu. Wezilenga hinga amuzinguluka makumbi akuyilu, wahenyenene ku umo waku shikale, pe bamuletele kukwendi. 14Bapanikile ngovu na maleema na ngovu za wene, pe bakamatunga nimwawo na zindimi nimwazo bamutendelele milimo. Ukalela mwaya myaka na wene wendi ufwako kukamana.
Kutontolola kwa bimono
15Ami Ndanyele na kabakanine mu mutima wami na kuyuma mu meho, ndaba ya bimono namonene. 16Nayile ku muntu umo ku baya bemaninenga kuyo na kumwipula ngayi atontolole nimwabyo. Nohobene niye wantongwezele kutontoloka kwanebye byuma ngayi, 17“Aba batunzama banaa babanene banengi wene wunaa wawunene ou ukatumpuka hano hanci. 18Bantu ba kuyela ba Wakukangana bakatambula wene na kuwulama mwaya myaka.”
19Nashingilenga kulimuka bya kanzama wawunaa, uyo wabulile kulifweka na bamina, ngoboni wengile wakutinisha na mayewe wendi a byondo na manyala a lubemba. Wabilyatalyatile na mawulu wendi, ebye abulile kuvwota. 20Nashingilenga kami kulimuka bya mashengo likumi aha mutwe wendi na lishengo limo liya lyamenene hayilu yawo, pe lyawishile mashengo ahatu aya ekalile hayilu. Lyekalile na meho na kanwa, pe lyaliyemezele shikuma. 21Oho natilamininenga, liya lishengo lyalwishile bantu ba Nyambi pe lya bakomene, 22hantu noho waku shikale ezile na kuyata kwa kuyamiziza bantu ba Wakukangana, pe shikati sha kumine osho ba kuyela mitima ba Nyambi batambwile wene.
23Okwe nikwo kutontoloka ampanine ngayi, “Kanzama wa wunaa, unengi wene wa wunaa uya ukekala hano hanci, kami ukenga wakutapuluka ku wene wamina. Ukavwota kaye nimwako na kukalyatangila na kukacancola. 24Mashengo likumi anengi bamyene likumi bakafuma mu wene uyo. Kunyima yabo kuka katuka mwene wamina, ou ukalishiya na bamyene bamina, pe ukakoma aba bamyene bahatu. 25Ukakananganisha Wakukangana na kuyandisha bakanyambi. Ukezeka kufutula ndayano na bikati bya kwimikiwa, pe bakanyambi bakekala mu ngovu zendi mu myaka 3.5. 26Ngoboni nkuta yikamuyata na kumuyangula ngovu zendi, na kumulobesha peluu. 27Ngovu na wunene wa wene nimwawo wa hano hanci bikapanikiwa ku bantu ba Wakukangana. Wene wabo ukekala mwaya myaka pe batulela nimwabo ba hano hanci bakabatendela milimo na ku bombatala.”
28Awa niwo mamaninino aneshe shambo. Ami Ndanyele natinine shikuma na lupala lwami lwafutukile, ngoboni nalamine eshe shambo mu mutima wami.
Currently Selected:
Ndanyele 7: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
