Ndanyele 4
4
Mulo wawubili wa Nembukandineza
1Mwene Nembukandineza, ukutuma lizu ku bantu nimwabo bamu matunga na zindimi nimwazo mukaye bekala nimwamo.
“Ku mwena kwikale nanenu.” 2Shikungwahilisha kumitongweza bilimukisho na bikomokesho ebye amoneshele Nyambi Wakukangana.
3Bilimukisho byendi eshe byaneneha,
na bikomokesho byendi eshe byekala na ngovu,
Wene wendi wenga wa mwaya myaka,
kulela kwendi kukekala kufuma ku mukoka kuya kuwamina.
4Ami Nembukandineza, nekalilenga mu musheke wami shiwahewahe na ku wahilila shikuma na kutangama. 5Ngoboni nalotele mulo uya wantinishile. Pe oho hinga nalangana ha wulili wami, bifwekesha na bimonekesho biya namonene ku mutwe wami byanyingishile bowa. 6Niho nehanine baka ngana bankongo nimwabo ba kuwene bamu Mbambiloni ngayi baletiwe kukwami bantontwelele eshe ukutontoloka mulo wami. 7Niho nimwabo aba babilolo babaletele. Nabatongwezele mulo wami, ngoboni kaliha batweshele ku wutontolola kukwami. 8Ha kumanisha Ndanyele wezile ou lizina lyendi lyamina kami niye Mbeleteshaza, watumbiwile mu lizina lya nyambi yami. Moyo wa banyambi ba kuyela uli mumwendi, pe namutongwezele ebye nalotele. 9Nambile nehe kukwendi ngayi, “Obe Mbeleteshaza mukulwane wa bakamalele, hinilimuka ngayi moyo wa banyambi ba kuyela uli mumwobe, kami kowa bikomokesho bya kulimba byenga byabikalu kukwobe. Uno niwo mulo wami. Ntongweze eshe ukutontoloka. 10Bino nibyo bimonekesho namonene oho hinga nalangana ha wulili wami. Natilaminine, pe kumbili yami kwemanine mutondo mukati ka litunga, wutali wawo wengile wawutali shikuma. 11Mutondo wakulile na kuneneha shikuma na kutaliha shikuma pe ku mutwe wawo wakakumine mu likumbi, watweshele ku moneka ku bantu bamu kaye nimwabo. 12Mabizi wawo engile amawahe, kami wayiminenga mikabo yayingi, ya kukonkana kulya na kaye nimwako. Kami mu mubombola wawo batuyamana ba mu lishaka nimo balanganinenga na batuyoni batendelelenga mahwa wabo ku myahi yawo na byuma nimwabyo bya kuyoya byalilenga mikabo yawo.
13“Mu bimonekesho byami oho hinga nalangana ha wulili wami namonene lingeloyi lya laminenga shikati nimwasho kumbili yami ha shuluka hanci kufuma muyilu, wengile wa kuyela. 14Wabilikizile na lizu lyalinene ngayi, ‘Temenu owo mutondo hanci na ku tetela myahi yawo na kupulula mabizi wawo na kupanzanisha mikabo yawo. Batuyamana mwanga bafume mu nceto yawo na batuyoni bafume ku myahi yawo. 15Ngoboni leha shishinzi shawo na mipishi hanci na kumangasho na liwenge lya shondo na lubemba. Shishale muyo mu mwila wamu mfuba. Leha mume wa muyilu wuwile ha nou muntu, mulehenu ekale na batuyamana mukati ka bitondo bya hanci. 16Mutima wendi ufutuke kubula kwinga wa muntu, kami akekale na mutima wa kayamana hantu myaka mutanu na yibili yinapiti hahendi. 17Eze ndayano zafumine ku mangeloyi alaminenga shikati nimwasho, zabilikiwile nanaba ba kuyela. Nohobene ngayi bantu nimwabo balimuke ngayi Wakukangana uli na ngovu ha wene wa bantu. Ukutwesha kuwu pana ku muntu nimwendi ou akuhata, ukukatula wamushe shikuma ku bantu babanene.’
18“Mbeleteshaza, owe niwo mulo nalota. Haya obe untongweze eshe ukutontoloka. Ndaba kowa muntu ku bankongo bami ba ku wene wakutwesha kuntongweza ngoboni obe ukutwesha, ndaba moyo wa banyambi ba kuyela uli mu mwobe.”
Ndanyele ukutontolola mulo
19Niho Ndanyele ou watumbiwile kami ngayi Mbeleteshaza walikomokelele shikuma, pe bihanganiko byendi byamutinishile. Niho Mwene ambile kukwendi ngayi, “Obe Mbeleteshaza, hinga witabila ngayi mulo na kunungulula kwawo bikulakamishe.”
Mbeletesheza wakumbwile ngayi, “Obe mwene ya Ngoma, shinga mulo unakundama ku bamalamo bobe kutontoloka kwawo. 20Mutondo uya wamona wengile wawutali, ngayi wakumine namu mbimbayilu na kutwesha ku moneka ku bantu nimwabo ba hano hanci. 21Wekalile na mabizi amawahe, kami wekalile na mikabo yayingi ya kutwesha kulela kaye nimwako. Na kupana mubombola ku batuyamana bamu lishaka na batuyoni batendelenga mahwa wabo ku myahi yawo. 22Obe Mwene ya Ngoma, obe uya mutondo wawutali na ku shuma unakulu shikuma. Unakulu na kuneneha shikuma wunene wobe unakakumu naku likumbi, kami ngovu za kulela kwobe zinakonkana hanci nimwaho. 23Obe Mwene ya Ngoma wamonene lingeloyi lya kuyela lya laminenga shikati nimwasho, ha shuluka kufuma muyilu pe wambile ngayi, ‘Temenu mutondo hanci naku unongesha, ngoboni shiya shishinzi hanci. Pambako liwenge lya shondo na lubemba, pe shiyasho muyo mu mwila wamu mfuba. Haya mipishi yasho yishili hanci mume wakuyilu umuzabishe ekalenga muyo na batuyamana ha myaka mutanu na yibili.’
24“Obe mwene ya ngoma, kuno haya niko kutontoloka kwa mulo, Wakukangana unamba ngayi nisho shikatendiwa kukwobe. 25Ukatandiwa mukati ka bantu na kwikala na batuyamana bamu lishaka. Ukalyanga mwila ngonehe ngombe na kulala ha munkanda ukakuwilenga mume ha myaka mutanu na yibili. Hantu unakalimuku ngayi Wakukangana ukulela ha wene wa bantu, kami ukutwesha kuwu pana ku muntu enge yani ou ukuhata. 26Ngonehe kwambiwile ngayi shishinzi shishale na mipishi yasho. Eshe shikutontoloka ngayi ukaboka ha wene kami oho ukalimuke ngayi Nyambi wa muyilu niye ukulela kaye nimwako. 27Nohobene haya, Obe Mwene ya Ngoma Hekulyami, konka kubela kwami. Leha kutendanga wubi pe winge wa kwoloka. Na kuleha kuluwa kwobe na kwikala na nceshe ku ba kushepwa. Niho kampe bakanungila ku matena wobe akuzamina ku tumpuka.”
28Ebye nimwabyo nibyo byatendiwile kuli Mwene Nembukandineza. 29Zingonda likumi na zibili oho zapitile, oho niye mwene endelanga hayilu ya shihoke sha musheke wendi wa wene wamu Mbambiloni, 30wambile ngayi, “Mona, kati kaliha nilwo lukena lwalunene lwa Mbambiloni olwe natendele kwinga lukena lwa wene mwakwikala na ngovu zami na nyala na kumoneshelamo maleema wukulwane wami ndi?” 31Mazu awa oho ashili mukanwa kendi, niho lizu lyambiwile muyilu ngayi, “Obe Mwene Nembukandineza, nikukwambila nehe ngayi wene wobe haya unafumishiwi kukwobe. 32Obe ukatandiwa mukati ka bantu pe ukekala na batuyamana bamu lishaka. Ukalyanga mwila ngonehe zingombe myaka mutanu na yibili yikapita hahobe. Hantu unalimuku ngayi Wakukangana ukulela ha wene wa bantu, kami ukutwesha kuwu pana ku muntu nimwendi ou akuhata.” 33Wanguwangu mazu aya ambiwile hali Nembukandineza engile akupwisha. Watandiwile mukati ka bantu pe walilenga mwila ngonehe zingombe. Mume wawilililenga ha lutu lwendi hantu noho huki zendi za kulile na kutaliha ngonehe mahako a ngonga na manyala wendi atalihile ngonehe manyala a kayoni.
Nembukandineza ukuyemeza Nyambi
34Oho shikati shamanine, ami Nembukandineza natilaminine meho wami kuyilu, ngana zami zabokele kukwami. Nayemezele Wakukangana na kumupana maleema na wuwahe ou wayoya mwaya myaka.
Ndaba kulela kwendi kwenga kwa mwaya myaka,
na wene wendi ukalaluka kufuma ku mukoka na kuya ku mukoka wamina.
35Nimwabo bantu bekala hano hanci ba kulabiwa ngo byowa,
kami ukutenda mwaya shifungo shendi ku mangeloyi a muyilu na ku bantu ba hano hanci.
Kowa muntu wakutwesha kukanisha liboko lyendi hinge kumwipula ngayi,
Kati bishini ebye ukutenda?
36Hohobene ha shikati osho ngana zami zabokele,
maleema wami na mpupo ya wulemu wa wene wami byabokele kukwami.
Bankongo bami na bantu bami babalemu bantambwile,
pe napanikiwile kami ngovu zami za wene,
hamo na maleema amanene shikuma kupitakana mwaka.
37Pe haya ami Nembukandineza, nikuyemeza na kunenehesha,
na kumulemeka Mwene wa muyilu.
Ndaba byuma nimwabyo ebye atendanga byakwoloka,
na zinzila zendi zenga zaziwahe.
Kami baya bakwenda na kulilundumika ukabashepesha.
Currently Selected:
Ndanyele 4: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
