Ndanyele 12
12
Shikati sha Kukotoka
1Lingeloyi lyavwalile bivwalo bya kulelema lyambile ngayi, “Ku shikati shiyo, Mayikulu lingeloyi wa mukulwane, ou walamanga bantu bobe, ukamoneka. Niho kukekale shikati sha makando, aya akwinga hinga atanga ku moneka kufuma ku kutatika kwa matunga na ku shikati shiyo. Bantu nimwabo ba ku matunga wobe aba mazina wabo atikitiwile mu libuka lya Nyambi bakapuluka. 2Babengi hakati kabo baya bafwile mwaka bakashanguka. Bamina kukwabo bakawahilila mwaya myaka, pe bamina bakekala na lisheni lya mwaya myaka na kuyena. 3Bakukeya bakabyazima ngo zimuni zamu mayilu. Na baya batengulwile bantu babengi ku kulunga bakabyazima ngonehe nyenye mwaya myaka. 4Ngoboni, obe Ndanyele, fwika libuka na kuyakaho limango hantu shikati sha kukotoka shinakumu. Bantu babengi bakayituka tuka noku na noku, pe kalimukisho kakavula shikuma.”
5Niho ami Ndanyele napenzele, namonene bantu babili hinga bemana kumbili yami, umo ha shibumbo shimo sha mushinzi na wamina ha shibumbo shamina. 6Umo kunaba balume wepwile lingeloyi ou wavwalile makwiza a kulelema amawahe, ou wemanine hayilu ya mema ngayi, “Kati kukapita myaka yinga ngayi ebye byuma bya kukomokesha bikamane?” 7Lingeloyi ou wavwalile makwiza a kulelema amawahe, wakatwile maboko endi kuyilu kami namuyuvwile habeza mu lizina lya nou Wayoya mwaya myaka. Nayuvwile hamba ngayi, “Yikenga myaka yihatu na shitika. Byuma nimwabyo bikamana, oho makando akeza ha bantu ba Nyambi akamana.” 8Nayuvwile ebye ambile, ngoboni nabulile ku yuvwishisha. Niho nepwile ngayi, “Hekulu, kati ebye byuma bikamana mwakangani?” 9Wakumbwile ngayi, “Obe Ndanyele, haya yanga tuhu ndaba awa mazu anengi akuholeka shiwahe na kuyakiwa limango hantu shikati sha mamaninino shinakumu. 10Bantu babengi bakayeleshiwa na kubatenda kwinga bakubula libala. Bantu bababi bakazamina kwinga bakuluwa, kowa umo wabakakuluwa ukayuvwishisha, baya ba kukeya nibo bakayuvwishisha. 11Ku balika shikati shiya bakanishile zinkombela za ha mutena ha mutena na kwimika biya bikaleta kunonga matena 1,290 akapita. 12Bali na mfuywezi baya ba kutatilila na kukuma kukumana kwa matena 1,335. 13Neheboni obe Ndanyele, yanga tuhu mu nzila yobe kutwala naku mamaninino. Niho ukalala na bankakazobe, ngoboni ukashanguka mu kutambula ncuungu yobe ku mamaninino a shikati.”
Currently Selected:
Ndanyele 12: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
