Ndanyele 1
1
Bandumbana mu Shinzanza sha Nembukandineza
1Mu mwaka wa wuhatu wa kulela kwa Yehoyakimu wa Yunda, Mwene Nembukandineza wamu Mbambiloni wezile ku Yelushalema na kuzinguluka lukena. 2Nyambi ya Ngula walehele Nembukandineza kukwata Yehoyakimu mwene waku Yunda na kushimba byuma mu Litala lya Nyambi. Wabitwalile ku litala lya banyambi bendi mu Mbambiloni, pe wayakile byuma mu shikongelo sha ku litala lya nyambi yendi.
3Niho Mwene atongwezele Ashipanazi shilolo wendi wa mukulwane, kuleta hakati ka bantapwa ba Baishalela bandumbana bamo baku ba lupashi lwa wene na ku ba lupashi lwa babalemu. 4Bandumbana bakubula muhendo babawahe, bawutungu ku ngana, ba kufunda shiwahe na kanyangunyangu kakulilongesha, banakokoko kutenda mulimo ku musheke wa Mwene. Ashepanazi wabalongeshelenga kulaba na kutikita mu lulimi lwa ba Mbambiloniya. 5Mwene wabatongwezele kulyanga byakulya bya ha mutena ha mutena byakulya bimo alilenga Mwene na waine anwinenga niyemwine mwene. Ha kumanisha myaka yihatu ya kufunda okwe bakamoneke kumbili ya mwene. 6Hakati ka baya bahatiwile bengile Ndanyele na Hananiya na Mishayela na Azaliya, nimwabo aba bengile ba Yunda. 7Shilolo wa mukulwane wabatumbile mazina, Ndanyele ngayi Mbeleteshaza na Hananiya ngayi Shandiliki na Mishayela ngayi Mesheki na Azaliya ngayi Ambendinengo.
8Ndanyele waliyatile niye mwine mu mutima wendi ngayi kulizilulula na byakulya alyanga mwene hinge na waine anwanga mwene wufwako. Ndanyele wepwile Ashepanazi shilolo wa mukulwane kumwitabilisha ngayi hinga alibipisha mu nzila eye. 9Nyambi wapanine Ashepanazi kuyamiziza Ndanyele na kumuyuvwila nceshe. 10Ngoboni Ashepanazi watongwezele Ndanyele ngayi, “Nili na bowa wakutina hekulyami mwene, ou wamipana byakulya byenu na bya kunwa byenu, ndi ukamona ngayi ku moneka shiwahe ngonehe bandumbana munezeke nabo ku myaka mufwako, pe mukanzihisha kuli mwene.” 11Niho Ndanyele ambile kuli shamanga ou emikile Ashepanazi hali Ndanyele na Hananiya na Mishayela na Azaliya ngayi, 12“Ezeka bakamilimo bobe ha matena likumi. Tupanikenga tuhu mashiha akulya na mema akunwa. 13Niho utufwanikize na bandumbana aba ba kulyanga byakulya bya wene, nihoboni uwane mwa kutendela bakamilimo bobe kunebye uku mona.” 14Niho etabilile kuneshe ambile ngayi bezekiwe ha matena likumi.
15Oho matena likumi amanine bamonekele kukanguka ku lutu na kuleliwa shiwahe kupitakana nimwabo baya balilenga byakulya bya wene. 16Niho shamanga afumishile byakulya bya hatiwile na waine bafwaninine kunwa pe wabapanikile mashiha.
17Neheboni kunaba bandumbana banaa, Nyambi wabapanikile kalimukisho kakulilongesha na wutungu mu kutikita mabuka nimwawo na kuwana bya ngana. Kami wapanikile Ndanyele wutungu wakutontolola bimonekesho na milo.
18Ku mamaninino a myaka yihatu eye atoyele mwene, Ashepanazi watwalile bandumbana nimwabo kuli Nembukandineza. 19Mwene wambilenga nabo nimwabo, pe wawanine ngayi Ndanyele na Hananiya na Mishayela na Azaliya bengile babawahe kupitakana bamina nimwabo. Nohobene bengile babilolo ba ku shinzanza sha mwene. 20Mu byambo nimwabyo hinge ndi mwene wepwile liyipu lya nahiti, hinge ndi wukalu ngani aletele, wawanine ngayi aba bandumbana banaa balimukile shikuma bikati likumi kupitakana mukakwawula hinge muka malele mu wene wendi nimwamo. 21Ndanyele wekalile shikuma hantu oho Mwene Shilushi akomene Mbambiloniya.
Currently Selected:
Ndanyele 1: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
