Milimo 8

1Na Shaulu wetabilile ngayi Shetefwano afwe.

Shaulu ukuyandisha litengo

Ha mutena uyo, batatikile kuyandisha shikuma litengo mu Yelushalema. Bakakukulupila nimwabo bapanzaninine mu matunga amu Yundeya na mu Shamaliya, kwashalile tuhu bantumwana. 2Balume bakakulipana kuli Nyambi bashimbile Shetefwano bakamufundile, kami bamulilile shikuma.

3 # Mil 22:4-5; 26:9-11. Ngoboni Shaulu washingile kunongesha litengo, wenginine mu matala nimwawo, wafumishile balume na bambuyama bakakukulupila ha munkanda, wabengizile mu tolongo.

Ncango zaziwahe zikushimikiwa mu Shamaliya

4Nohobene bakakukulupila aba bapanzanine, bashimikilile lizu nimwako oku bayile. 5Fwilipu wayile ku munzi wa Shamaliya, washimikilile Kilishitu kukwabo. 6Na mutima umo, likunge lya bantu bayuvwishishile ebye ambilenga Fwilipu, oho bamuyuvwile na ku mona bikomokesho ebye atendele. 7Mayimbwe afuminenga ku bantu babengi abilikiza na lizu lyalinene, kami bakakalepa babengi na ba kupenga banyongomanine. 8Pe kwekalile ku wahilila kwakunene mu munzi uyo.

9Ngoboni kwekalile muntu umo watumbiwile Shimoni, watendelenga malele mu munzi wa Shamaliya bikati bya kunyima, pe bantu nimwabo bamukomokelenga. Waliyemezelenga niye mwine ngayi wamunene. 10Bantu nimwabo mu munzi bamuyuvwilenga ku balika ku babashe kutwala ku babanene bambilenga ngayi, “Ou muntu uli na ngovu za Nyambi zikutumbiwa ngayi, ‘Ngovu Zazinene.’ ” 11Pe bamuyuvwilenga, ndaba shengile shikati shashitali abongezelenga na malele. 12Ngoboni baya bakulupilile Fwilipu oho ashimikilenga bya Wene wa Nyambi na lizina lya Yeshu Kilishitu, bazubilishiwile balume na bambuyama. 13Na Shimoni kami wakulupilile, niho azubilishiwile. Wekalile na Fwilipu, pe oho amonene bikomokesho na bimonekesho byatendiwilenga wakomokele.

14Oho bantumwana aba bekalile mu Yelushalema bayuvwile ngayi Bakashamaliya banatambulu lizu lya Nyambi, batumine Pita na Yowano kukwabo. 15Oho bakumine babalombelelele ngayi batambule Moyo wa Kuyela. 16Ndaba Moyo wa Kuyela oho shilolo ukume hali umo kukwabo, ngoboni bazubilishiwile tuhu mu lizina lya Mwene Yeshu. 17Niho Pita na Yowano bakambikile maboko wabo hahabo, pe batambwile Moyo wa Kuyela.

18Shimoni amonene ngayi Moyo wa Kuyela unapanikiwi ku bakakukulupila oho bantumwana banakambiki maboko hahabo, wapanikile mali kuli Pita na Yowano, 19wambile ngayi, “Mpanikenu na nami eze ngovu, ngayi ou nimwendi nikakambika maboko mwanga atambule Moyo wa Kuyela.”

20Ngoboni Pita wambile kukwendi ngayi, “Mali wobe anonge hamo na nobe, ndaba ukuhanganika ngayi ukutwesha kutambula shishemo sha Nyambi na kulanda na mali! 21Mbalila hinge shitapilo mu nou mulimo ufwabyo, ndaba mutima wobe kaliha uli shiwahe ku meho a Nyambi. 22Nohobene tenguluka ku kuluwa kwobe, kami lombela kuli Mwene, ngayi shinga shikutwesheka akuyatile hanebye bihanganiko bya mu mutima wobe. 23Ndaba namono ngayi uli na mwili shikuma kami uli mu tolongo ya wubi.”

24Niho Shimoni akumbwile Pita na Yowano ngayi, “Ndombelelenu kuli Mwene ngayi ebye munamba hinga bitendiwa hahami.”

25Haya oho bapanine wupaki wabo na ku shimikila lizu lya Mwene, Pita na Yowano babokele ku Yelushalema, hibashimikila ncango zaziwahe mu minzi yayingi ya mu Shamaliya.

Fwilipu na shilolo waku Etopya

26Lingeloyi lya Mwene lyambile kuli Fwilipu ngayi, “Katuka, yanga ku mabukubuku, ku nzila yikufuma ku Yelushalema kuya ku Ngaza, nzila ya libelelengwa.” 27Wakatukile, wayile. Waliwanine na ntatula waku Etopya, wengile shilolo wamunene, ou walaminenge wuheti nimwawo wa Kandashi mwene wa mbuyama wa litunga lya Etopya. Uya muntu wafuminenga ku Yelushalema kuya ayile na kulemesha Nyambi. 28Wabokelenga kukwabo, hinga ekala mu koloyi yendi, halaba mu libuka lya muluwe Ishaya. 29Niho Moyo wambile kuli Fwilipu ngayi, “Yanga kwakwipi na iya koloyi.” 30Fwilipu wetukilile ku koloyi, pe wayuvwile uya muntu halaba mu libuka lya muluwe Ishaya. Wamwipwile ngayi, “Hiwuyuvwishisha ebye ukulaba ndi?”

31Shilolo wakumbwile ngayi, “Nikutwesha ku yuvwishisha nahiti ndi kowa wakundubulwila?” Wanyepele Fwilipu ngayi akandame mu koloyi, ekale nendi. 32#Isha 53:7-8. Walabilenga mazu atikitiwa ngayi,

“Ngo mbelele ukutwaliwa na kuzihiwa

ngonehe amwenanga mwana mbelele

ndi bali na kumusheha wushako,

kaliha wambile shimina.

33Walilimbwilishile,

pe kaliha bamuyatile na kupwisha.

Kati yani ukutwesha kutontolola mukoka wendi?

Ndaba wumi wendi hano hanci unamana.”

34Shilolo wepwile Fwilipu ngayi, “Nikukunyepa ntongweze, kati muluwe mu mazu awa ukulitoya niye mwine ndi ukutoya muntu washenge?” 35Niho Fwilipu atatikile kumutongweza bya aya mazu atikitiwa, pe wamushimikilile ncango zaziwahe za Yeshu. 36Oho bendelenga mu nzila, bakumine kuya kwekalile mema, pe shilolo wambile ngayi, “Mona, mema awa. Haya bishini nikubula kuzubilishiwa?” 37Fwilipu wambile kukwendi ngayi, “Ndi ukukulupila na mutima wobe nimwawo, ukutwesha kuzubilishiwa.” Wakumbwile ngayi, “Nikutwesha ninakulupili ngayi Yeshu Kilishitu niye Mwana Nyambi.” 38Niho shilolo emikile koloyi, pe ba kunkulukile mu mema wubili wabo, Fwilipu na uya shilolo, pe Fwilipu wamuzubilishile. 39Oho bazabukile mu mema, Moyo wa Mwene washimbile Fwilipu, pe shilolo kaliha wamumonene kami, ngoboni wayile mu nzila yendi hinga awahilila. 40Ngoboni Fwilipu wakaliwanine uli mu Azotashi, wayile na ku shimikila ncango zaziwahe mu minzi nimwayo kukakuma na ku Sheshaliya.

Currently Selected:

Milimo 8: LLK

Highlight

Compare

Copy