Milimo 5

Ananiyashi na Shafwila

1Ngoboni mulume watumbiwile Ananiyashi, hamo na mukazendi Shafwila balandishile limvu lyabo. 2Waliyuvwashanine na mukazendi, walitentekelele mali amo, pe amina ashalileho watwalile ku bantumwana. 3Ngoboni Pita wambile ngayi, “Obe Ananiyashi, kati shumangani Shatana anengini mu mutima wobe ngayi ushimike mahalo ku Moyo wa Kuyela na kuholeka shitapilo sha mali a limvu lyobe? 4Kati oho shilolo ulilandishe, kaliha lyengile limvu lyobe ndi? Munyima ya kulilandisha, kati mali kaliha engile obe ndi? Shumangani unahanganiki kutenda shuma eshe mu mutima wobe? Kushimika mahalo ku bantu wufwako ngoboni kuli Nyambi unashimiki mahalo!” 5Oho Ananiyashi ayuvwile awa mazu, wawile hanci, pe wafwile. Bantu aba bayuvwileko nimwabo bekalile na bowa wawunene. 6Bandumbana bezile na kumuvungila mu likwiza. Niho bamukatwile kuya na kumufunda.

7Oho kwapitile mahola akushinga kukuma ku ahatu, mukazendi wenginine, hinga abula kulimuka eshe shatendiwile. 8Pita wamwipwile ngayi, “Ntongweze, kati oho mwalandisha limvu lyenu, ndando yayo yengile mali awa ndi?”

Wakumbwile ngayi, “Ingoi, niyo.”

9Niho Pita amwipwile ngayi, “Kati munaliyuvwashana nahiti hamo kwezeka Moyo wa Mwene? Mona, mawulu a bantu baya na kufunda mukokwobe ali ha shipana, bakakutwala nobe na kukufunda!” 10Hohobene wawililile ku mawulu a Pita, pe wafwile. Bandumbana benginine, bamuwanine unafu. Bamukatwile bayile na kumufunda ku nkumo ya mukokwendi. 11Shikungulukilo nimwasho na bantu nimwabo aba bayuvwile byuma ebye, bekalile na bowa wawunene.

Bimonekesho na bikomokesho bya bantumwana

12Bantumwana batendelenga bimonekesho na bikomokesho byabingi ku bantu. Bakakukulupila nimwabo ba kungulukilenga na mutima umo mu mazezelo a Sholomoni. 13Kowa muntu wa kwashenge wazamukile kukunguluka nabo hamo, hinge noho bantu babayemezele shikuma. 14Ngoboni bantu babengi balitabilile muli Mwene, pe lyengile likunge lya balume na bambuyama. 15Ndaba yanebye batendelenga bantumwana, pe bantu baletelenga bakakukola mu zinzila, babalangikile ha malili na ha manala, ngayi Pita akapitilaho mumvulu wendi ufwike bamo kukwabo. 16Likunge lya bantu bafumine ku minzi ya hahepi na Yelushalema, kami lya kungulukile, baletelenga bakakukola na bayo bayandilenga ku mayimbwe, pe nimwabo banyongomanine.

Bantumwana bakuyandishiwa

17Niho Mukulwane wa Bakankombela Nimwabo hamo na baya ekalilenga nabo, baya bengile bakakanzunga ka Bashanduki, bekalile na lihungu na bantumwana. 18Bakwatile bantumwana, pe babayakile mu tolongo. 19Ngoboni wushiku lingeloyi lya Mwene lyashinkwilile bipana bya tolongo na ku bafumishamo. Lyambile ngayi, 20“Yenunga, mukemane mu Litala lya Nyambi mukambe ku bantu mazu a wumi wawupya.” 21Oho bayuvwile ebye benginine mu Litala lya Nyambi lumenemene, pe batatikile ku longesha.

Mukulwane wa Bakankombela Nimwabo na baya ekalilenga nabo ba kungwile nkuta yayinene ya bakulwane ba Bayunda. Niho batumine bantu ku tolongo mu kuleta bantumwana. 22Ngoboni oho babilolo bakumine ku tolongo, kaliha babawaninemo, pe babokele na kubatongweza ngayi, 23“Tunawana tolongo ya kushinka na bakakulama banemana ha munkanda wa shipana, ngoboni oho tunashinkululu, shilolo tuwanemo muntu.” 24Oho mukulwane wa bakakulama ku Litala lya Nyambi na bakankombela ba bakulwane bayuvwile mazu awa, bakomokele shikuma shuma shatendiwile ku bantumwana. 25Niho kwezile muntu umo wabatongwezele ngayi, “Bantu baya mwayakile mu tolongo, banemana mu Litala lya Nyambi na ku longesha bantu!” 26Niho mukulwane wa bakakulama ku Litala lya Nyambi hamo na bantu bendi bayileko, pe bakaletele bantumwana ngoboni kaliha na mushunga, ndaba batinine ngayi bantu ba kubapuha mamanya.

27Oho baletele bantumwana, babemikile kumbili ya nkuta, niho Mukulwane wa Bakankombela Nimwabo abepwile ngayi, 28#Mat 27:25. “Kaliha twamikanishile ngayi hinga mulongesha mu lizina elye ndi? Ngoboni mwenzalisha kale Yelushalema na ku longesha kwenu, kami mukushinga ngayi lufu lwa nou muntu lwikale hahetu!”

29Niho Pita na bantumwana bamina bakumbwile ngayi, “Tuku fwanina kwombatala Nyambi kupitakana bantu. 30Nyambi wa batatizetu, washangwile Yeshu ou mwazihile ha kumukoleka ha shishempakano. 31Nyambi wamutumbalalishile na kumuyaka ku liboko lyendi lya shilyo, ngayi enge Mukakutwaminina na Mukakupulwisha, mu kupana ku bantu ba Ishalela kutenguluka na kuyatila kwa wubi. 32Etu tuli bapaki ku byuma ebye, hamo na Moyo wa Kuyela ou anapana Nyambi kukwabo ba kumwombatala.”

Ngamaliyele ukunangula bakulwane ba Bayunda

33Oho bayuvwile ebye bapilamine, pe bashingile ngayi bazihe bantumwana. 34Ngoboni umo kukwabo, Kafwalishi wa lizina lya Ngamaliyele, mulongeshi wa ndayano, wakulemeekiwa mukati ka bantu nimwabo, wemanine mu nkuta. Wabatongwezele ngayi batutwishe bantumwana ha munkanda kashikati. 35Pe wambile ku bakankuta ngayi, “Enu Baishalela, keyenu nanebye mukushinga kutenda aba bantu. 36Anukenu ku matena akunyima kwezile muntu watumbiwile Teundashi, waliyemezele ngayi nengi wamunene, bantu balifungilile kukwendi bashingile kulingana myanda yinaa. Ngoboni wazihiwile, kami baya bamukonkele bapanzanine, pe bamanine. 37Munyima ya muntu owe, ha shikati sha kulaba bantu, kwezile kami Yundashi waku Ngalileya, wakokele bantu babengi munyima yendi, pe niye kami wanongele na baya nimwabo bamukonkele bapanzanine. 38Nohobene nikumitongweza ngayi ha shambo eshe hinga mutenda shimina ha naba bantu, balehenu baye. Ndaba ndi ebye ba kuyongola hinga ba kutenda bikufuma ku bantu, bikamana, 39ngoboni ndi bya kufuma kuli Nyambi, kukatwesha kubimanisha mufwako. Kutina mukawaniwe ngayi munakulwisha Nyambi!”

Nkuta yakonkele ku nangula kwa Ngamaliyele. 40Behanine bantumwana mukati, babakamine, babakanishile ngayi hinga bamba kami mu lizina lya Yeshu, niho babalehele ngayi baye. 41Bantumwana bafumine mu nkuta na ku wahilila ndaba balabiwile ngayi ba ku fwanina kuyenena lizina lya Yeshu. 42Pe ha mutena ha mutena balongeshelenga na ku shimikila mu Litala lya Nyambi na mu matala a bantu, ncango zaziwahe ngayi Yeshu niye Kilishitu.

Currently Selected:

Milimo 5: LLK

Highlight

Compare

Copy