Milimo 15

Shikungulukilo sha ku Yelushalema

1 # Bal 12:3. Bantu bamo bezile ku Antiyoke kufuma ku Yundeya, balongeshelenga bakakukulupila ngayi, “Kutwesha kupuluka mufwako ndele muye ku mukanda, ngonehe kwatikitiwa ku Ndayano za Moshesha.” 2Paulu na Mbanambashi batutukile nabo nkani. Niho bayongwele ngayi Paulu na Mbanambashi na bamo ba ku Antiyoke, baye ku Yelushalema ku bantumwana na ku bakulwane na kubepula ha shambo eshe.

3Litengo lya batumine, bapitile ku litunga lya Fonisha na Shamaliya, babatongwezele eshe Bakamatunga banatengulukili kuli Nyambi. Awa mazu awahililishile shikuma bakakukulupila nimwabo. 4Oho bakumine ku Yelushalema, bakalitengo babatambwile shiwahe na bantumwana na bakulwane. Paulu na Mbanambashi babatongwezele byuma nimwabyo ebye Nyambi atendele kupitila mumwabo. 5Ngoboni bakakukulupila bamo aba bengile ba kumbalila ya Bafwalishi bemanine bambile ngayi, “Shinafwanini ngayi Bakamatunga babatwale ku mukanda na kubatongweza ngayi balame Ndayano za Moshesha.”

6Bantumwana na bakulwane ba litengo bakungulukile hamo mu kuhanganika ha shambo eshe. 7Oho bambwele shikati shashitali, Pita wemanine, pe wambile kukwabo ngayi, “Bawushinda wami, mu kulimuka ngayi shikati sha kunyima Nyambi wahatile mukati kenu, ngayi nishimikile ncango zaziwahe ku Bakamatunga, mwanga bayuvwe na kukulupila. 8Kami Nyambi ou ukulimuka mitima ukupaka kukwabo Bakamatunga na kubapana Moyo wa Kuyela, nehe awupanine kukwetu. 9Nyambi kaliha watutapulwile mukatiketu nanibo, ngoboni wayeleshele mitima yabo na kukulupila. 10Haya, shumangani mukwezeka Nyambi na kuyaka mpongoho ha zincingo za bandongesha, eye babulile kutwesha batatizetu hinge etu kuyishimba? 11Ngoboni tukukulupila ngayi tukapuluka na nceshe za Mwene Yeshu Kilishitu, ngonehe bakapuluka nibo.”

12Pe mu shikungulukilo nimwabo bamwenene, bayuvwililile kuli Mbanambashi na Paulu oho bambilenga bya bimonekesho na bikomokesho ebye atendele Nyambi ku Bakamatunga hahabo. 13Oho bamanishile kwamba, Yakoba wakumbwile ngayi, “Bawushinda wami, Nyuvwililenu! 14Shimoni unatontololo eshe Nyambi azingwile Bakamatunga ha kutatika, ngayi ahate mukati kabo bantu bakatumbiwa na lizina lyendi. 15Mazu a bamiluwe akulitabila nanebye, nehi kwatikitiwa ngayi,

16 # Amos 9:11-12. ‘Munyima yanebye nikaboka,

nikemika litala lya Ndavita liya lyawile.

Nikatendulula mapembe alyo,

pe nikaliwahisha.

17Nikatenda noho ngayi bantu nimwabo bashinge Mwene,

na Bakamatunga baya ba kutumbiwa na lizina lyami.

18Nisho ambile Mwene uya waholwele byuma ebye nimwabyo ku shikale.’ ”

19Yakoba wazaminine kwamba ngayi, “Eshe shinengi shihanganiko shami ngayi, hinga tuyandisha Bakamatunga banatengulukili kuli Nyambi. 20#Kut 34:15-17; Bal 17:10-16; 18:6-23. Ngoboni tubatikitile liñwati lya kubatongweza ngayi hinga balya bya mazilo ndaba binakombeleliwi ku tunankishi, bafume ku wunjenge na kubula kulya kayamana wakushika nkozo, hinga mukeza. 21Ndaba Ndayano za Moshesha zalabiwilenga bikati bya kunyima mu mashinangonge ha Matena nimwawo aku Katala, pe mazu wendi ashimikiwilenga mu minzi nimwayo.”

Liñwati lyatikitiwilile ku Bakamatunga bakakukulupila

22Niho bantumwana na bakulwane, hamo na litengo nimwalyo, bahanganikile kuhata bantu mukati kabo ngayi babatume ku Antiyoke hamo na Paulu na Mbanambashi. Bahatile Yundashi watumbiwile Mbashambashi hamo na Shilashi, bantu ba maleema hakati ka bakakukulupila. 23Batwalile liñwati likwamba ngayi,

“Bawushindawenu bantumwana na bakulwane ba kushangwisha bawushinda bakakukulupila ku Bakamatunga ba mu Antiyoke na mu Shiliya na mu Shilisha. 24Tunayuvwu ngayi, bantu bamo ba mu kazunga ketu banamikabakanishi na kumishipisha ku mitima na mazu awa twabulile ku balaya. 25Pe oho twa kunguluka, twaliyuvwashana kuhata bantu na kubatuma kukwenu. Bakwiza hamo na bakakuhakiwa Mbanambashi na Paulu. 26Aba bantu banalitupulu ndaba ya lizina lya Mwene Yeshu Kilishitu. 27Nohobene tunatumu Yundashi na Shilashi, nibo bakamitongweza byuma na kanwa, ebye tunatikiti mu liñwati. 28Ndaba shinamoneke shiwahe ku Moyo wa Kuyela na kukwetu ngayi, hinga tumitwika muziho wawunene wakupitakana ebye binafwanini. 29Hinga mulya biya binatupuliwi ku tunankishi na mukeza na tuyamana twa kushika nkozo, hinga mutenda wunjenge. Ndi mukalizilika ku byuma ebye mukutenda shiwahe. Yikalenu shiwahe.”

30Bantumwana batumiwile, pe bayile ku Antiyoke. Bakungulwile nimwabo bakakukulupila hamo, babapanikile liñwati. 31Oho balilabile, bawahililile ndaba ya mazu alyo akubashumisha. 32Yundashi na Shilashi aba bengile bamiluwe, bashimikilile ku bakakukulupila mazu amengi na ku bashumisha. 33Oho bekalile matena amashe, bakakukulupila babafunzwile mu ku mwena kuboka ku baya babatumine. [ 34Ngoboni Shilashi wahanganikile ku shala kuyo.]

35Ngoboni Paulu na Mbanambashi bashalile mu Antiyoke, balongeshele na ku shimikila lizu lya Mwene hamo na bamina babengi.

Paulu na Mbanambashi bakulitapa

36Oho kwapitile matena amo, Paulu wambile kuli Mbanambashi ngayi, “Tuyenga kami na kuzingula bawushinda wetu mu minzi nimwayo muya twashimikilile lizu lya Mwene, tukamone ndi bali na hiti.” 37Mbanambashi washingile ngayi baye na Yowano watumbiwile Mako. 38#Mil 13:13. Ngoboni Paulu wahanganikile ngayi kaliha shuma shashiwahe kuya nendi ndaba wabashiyile oho bashili ku Pamfwiliya, kami kufuma haya kaliha wayile nabo ku mulimo. 39Niho kwakatukile nkani zazinene mukati kabo, pe balitapile. Mbanambashi washimbile Mako, benginine mu wato, pe bayile ku Shayipulashi, 40ngoboni Paulu wahatile Shilashi, bakakukulupila babalombelelele nceshe za Mwene. Pe bayile. 41Wayile ku Shiliya na Shilisha na kushumisha matengo.

Currently Selected:

Milimo 15: LLK

Highlight

Compare

Copy