Luka 6
6
1Hasabata yimu wadiŋi nakuhita mumaha atidiku; atumbanji twindi hiyakukotola nyitu yatidiku, hiyakuchikita mumakasawu, hiyakudya. 2AFwarisi amakwawu hiyakwila nawu, Mudi nakwililadi chuma chajila kwila hasabata? 3Yesu hakuyakula nindi, Himunataŋi cheliliyi Davidi, hatiyiliyi nzala hamu nanowu adiŋiyi nawuku, tahindi? 4Hepililiyi mwitala daNzambi, hakutambula mankendi akutenteka kumesu aNzambi, hakudya, hakwinkaku ninawa adiŋiyi nawu, adiŋi ajila akudya, chiŋa atupristu hohu. 5Hakuyila nindi, Mwana kamuntu diyi Mwanta wasabata.
6Hasabata yacheŋi nawa, hakwuŋila mushikola nakuleja antu; mwadiŋi muntu wawulepa wachikasa chachidiilu. 7Ansoneki nawaFwarisi hiyakumutala, amoni neyi wukuuka hasabata, kulonda amoni hakumwinkela muloŋa. 8Yena welukili yitoŋojoka yawu; hakumwila owu muntu wachikasa chawulepa nindi, Nyamukaku, wimani mukachi. Yena hakunyamuka, hakwimana mukachi. 9Yesu hakuyila nindi, Nayihuli nami, hasabata chaloŋa kwila chachiwahi, tahindi kwila chatama? kuhandisha muntu, tahindi kumujaha? 10Hakuyitala wejima wawu kwi-ndo, hakumwila owu muntu nindi, Ololaku chikasa cheyi. Ela nikwila, chikasa chindi chikola nikukola. 11Wena asweja nikuzaluka, hiyakutiyaloŋana muntu namukwawu mwakamukoŋawu Yesu.
12Wena mafuku owu hakuya hampidi nakulomba, hakuchiisha nakulomba kudi Nzambi wufuku wejima. 13Chikunachi hakutambika atumbanji twindi, hakutondahu ikumi nayedi, hakuyitumba nindi apostolu. 14Shimona hakunamutumba ijina di kwawu nindi Petulu, namana kwindi Anderi, Yakoba naYowanu, Fwilipu naBatolomewu, 15Matewu naTomasi, Yakoba mwana kaAlafwewu naShimona atenaŋawu nawu kaZeloti, 16niYuda waYakoba, niYudasi Isakaroti diyi wamufukejeli.
17Hakukunkumuka nawu, hakwimana hasalala nezaza dawatumbanji twindi dadeni; niantu amavulu nankashi afumafumini mwahita Yudeya yejima, nikuYerusalema, nikuchikumu chakaluŋalwiji chakuTira naZidoni, enjili nakumutiya kulonda akayuki ninyisoŋu yawu. 18Hakuuka akabishilaŋawu kudi ademoni azonda. 19Izaza dejima hidikukeŋaŋa yowu kumukunka hohu; muloŋa mudi yena mwedikilaŋa Ŋovu yakuuka wejima wawu.
20Yena hakufumbula mesu indi hadi atumbanji twindi, hakuyila nindi. Enu atuzweŋi munako-oleki, muloŋa wanta waNzambi wunekali wenu.
21Enu mudi nakutiya nzala katataka munako-oleki, muloŋa mwakekuta. Enu mudi nakudila katataka munako-oleki, muloŋa mwakaseha.
22Chakayihelawu kudi antu, nichakayikinjikawu, nichakayisawulawu, nichakayitenawu nawu mwatama kukoola Mwana kamuntu, munakooleki. 23Kazaŋalalenu dena ifuku odu, nikukiloka chikupu. Tiyenu, amba kayinka wufwetu weneni mwiwulu, muloŋa dichi chayililuwu atuprofwetu kudi ankakulula.
24Hakwila enu mwaheta, o yihuŋu yimwamba kamona! muloŋa anayikundeji dehi.
25O nzala yimwamba katiya enu munekuti katataka! O vihuŋu yimwamba kamonenu mudi nakuseha katataka! mwamba kadila nikutumpa.
26O yihuŋu yimwamba kamonenu adi nakuhamekawu kudi antu ejima! muloŋa dichi chahamekeluwu atuprofwetu akutwamba kudi ankakulula.
27Ilaŋa enu mudi nakutiya, nukuyileja nami keŋenu ayilumbu jenu, koŋenu chachiwahi antu akuyihela. 28Antu akuyishiŋa yikiswilenu nkisu; akuyikoŋa chatama yilombelenu. 29Muntu wukukweta kwikidi dimu, mwinki nidikwawu nawa; muntu wukukutambula chi kovwelu cheyi, atambuli nikahuma keyi nawa. 30Yinkenuŋa antu ejima akuyilomba; muntu wukutwala yuma yeyi, bayi wakamwihulayi nawa cheŋuku. 31Mwomukukeŋa antu kuyilenu ninenu nawa yililenu wena chochimu.
32Neyi mukukeŋa ayikeŋenu hohu, akuyihamekela hadihi? Hela akwanshidi akeŋaŋa ayikeŋa nawa. 33Neyi mukwilaŋa chachiwahi awa akuyilenu chachiwahi hohu, akuyihamekela hadihi? Dichi chelaŋawu niakwanshidi. 34Neyi mukusondamishaŋa ntu mwakuchiŋeja nenu akayifuntishila cheŋi, akuyihamekela hadihi? Hela akwanshidi asondamishaŋa kwawu akwanshidi, atambuli cheŋi yahenenuwu. 35Ilaŋa keŋenu ayilumbu jenu, ilenuŋa chachiwahi, sondamishenuna chakadi kwakama; wufwetu wenu wakatoha, mwakekala nianyana kaMukwakubadika; muloŋa yena watiyilaŋa luwi niantu abulaŋa kusakilila, niatama 36Ikalenu akwaluwi neyi chekalayi Tata yenu mukwaluwi.
37Bayi musompeshaŋa akwenuku, kulonda ninenu akabuli kuyisompesha. Bayi mutanyishaŋa kwenuku, kulonda ninenu nawa akabuli kuyitanyisha. Anakenenuŋa akwenu, kulonda akayanakeni ninenu nawa. 38Hanenuŋa, kulonda ninenu nawa akayinki; chesekelu chakushikija, chakunyikumuna, chenda chisumpoka, akayinki muwutambwilu wenu. Muloŋa chesekelu chimukuyesekela akwenu, dichi chakayesekelawu ninenu nawa.
39Hakuyitila nawa chishimu nindi, Mputamesu wukutwesha kulombola mukwawu mputamesu, tahindi? Mwayedi wawu hiyakukulukila mwibukuku? 40Kambanji habadikaŋa nkuluŋaŋa yinduku; muntu himuntu neyi nadizi dehi, wukwesekana kwanankuluŋaŋa yindi hohu. 41Wukutaliladi kachuma kanalakumukili mudisu damana kweyi, hakwila chipamba chidi mudisu deyeyi aweni hiwunachimonuku? 42Indi eyi wukutwesha kumwila mana kweyi ŋahi neyi, Eyi mana kwami, tali nikutumbuli kachuma kanalakumukili mudisu deyi; hakwila chipamba chidi mudisu deyeyi aweni hiwunachimonuku? Eyi nfwikŋi, sambilaku kufumisha chipamba chidi mudisu deyeyi aweni, mwaka winzi wumoni kutumbula chachiwahi kachuma kanalakumukili mudisu damana kweyi.
43Hikwekala mutondu wawuwahi wasoŋaŋa nyikabu yatamaku; hela mutondu watama hiwasoŋaŋa nawa nyikabu yayiwahuku. 44Muloŋa nyitondu yejima ayilukilaŋa kwokunyikabu yayu, iwu nanyikabu yawu, iwu nanyikabu yawu. Antu hiyakumunaŋa mawundu achikuyu kunyiŋaku; hiyakumunaŋa nyikabu yavinyu kuchikwataku. 45Muntu wamuwahi wukwidisha nawa yuma yayiwahi yaswekayi mumuchima windi; muntu watama wukwidisha nawa yoyuma yatama, muloŋa kanwa kindi kahoshaŋa yoyuma yalumbama mumuchima.
46Mwantenanaŋadi nenu, Mwanta, Mwanta; hakwila yuma yinahoshaŋa himwayilaŋaku? 47Ejima akwinza nakutiya mazu inahoshaŋa, hiyakwilamu, tiyenu niyileji anafwanuwu. 48Anafwani neyi muntu watuŋili itala, wapundili chakunama, hakusha chikuku helola. Chenjili dibaji, cheji hichikweta hetalodu, hichatwesheli kudinyinkeshaku, muloŋa aditupilili helola. 49Hakwila watiyaloŋa chakadi kwilamu, nafwani neyi muntu watuŋili itala heseki damukunkulu. Cheji chichineti italodu, hohenohu dihumuka nikuhumuka buvu; kuhumuka kwetalodu kwaswejeli kutoha.
Currently Selected:
Luka 6: MW62
Highlight
Share
Copy
Want to have your highlights saved across all your devices? Sign up or sign in
The Bible in Lunda: Ndembu (Lunda of Kalunda) © B. F. B. S. 1962.