Luka 11
11
1Chadiŋiyi nakulombayi kumu chelili nakumishi dehi, kambanji kindi wumu hakumwila nindi, Mwanta, tuleji kulomba neyi chalejeliyi Yowanu atumbanji twindi. 2Hakuyila nindi, Chimukulomba ilenuŋa nenu, Tata yetu wekala mwiwulu, ijina deyi dijili. Wanta weyi winzi. Muchima weyi awili hamaseki neyi chawilaŋawu mwiwulu. 3Twinkaŋa hefuku hefuku kudya kwetu kutunakeŋi. 4Twanakeni nyiloŋa yetu, muloŋa ninetu nawa twaanakenaŋa antu ejima akweti nyikudi yetu. Bayi wututwala mukwesekaku; twamwini kukutama.
5Hakuyila nindi, Hadenu hadi mwinenwinyi wukweti ibwambu dindi wukuya kudi yena mukachi kawufuku nindi, Eyi ibwambu dami, nsondamishuku mankendi asatu; 6kunenzi ibwambu dami munjila yindi, hinikweti yakumudiishaku. 7Yena amwakuli omu mukachi mwadiyi eli nindi, Kuchisu kwakwenzela dehi; nakama dehi kwami hakadidi, ni anyanami nawa, kutwesha kuhinduka nakukwinka nehi. 8Nukuyileja nami, hela kwonti kwindi kuhinduka nakumwinka nansaŋu yawubwambu, wukuhinduka nakumwinka yuma yejima yanakeŋiyi nansaŋu yakumuka kelayi. 9Nukuyileja nami, lombenu akuyinka; keŋakeŋenu mukuwana; dondomwenenu akuyenzulwila. 10Muloŋa ejima akulomba akutambula; muntu wukukeŋakeŋa wukuwana; wukudondomwena akumwenzulwila.
11Mwinenwinyi wukwila neyi hitata yawantu, amulomba dinkendi kudi mwanindi weyala, amwinki ilola? Hela nalombi inshi amwinki kapela?
12Hela nalombi iteta amwinki kanjimbu? 13Dichi neyi enu atama muneluki kwinka anyanenu yamukunkulu yayiwahi, Tata yenu wamwiwulu wukubadika kuyinka awa akumulomba Spiritu Wajila.
14Wadiŋi nakufumisha demoni wakamama. Demoni chanafumiyi mudi muntu, owu kamama hakuhosha; mazaza awantu hiyakuhayama. 15Amakwawu hiyakwila nawu, Wafumishaŋa demoni naŋovu yamwanta wawademoni Belezebuli. 16Acheŋi hiyakukeŋa chinjikijilu chakufuma mwiwulu kulonda amweseki nachu. 17Yena hakwiluka yitoŋojoka yawu, hakuyila nindi, Mawanta ejima akudambula akulwaŋana, akushala kwamahembi hohu; hela akwetala dimu akudambula hiyakukolaku. 18NiSatana niyena nawa neyi wukudambula yomweni, wanta windi wukukola ŋahi? Nahoshi nanochu chimudi nakwila nenu nafumishaŋa demoni naŋovu yaBelezebuli. 19Neyi ami nafumishaŋa demoni naŋovu yaBelezebuli, indi awa anyanenu ayifumishaŋa naŋovu janyi? Dichi wena diwu akekala akwakuyisompesha. 20Neyi ami nafumishaŋa demoni namunu waNzambi, komana wanta waNzambi wunashiki dehi kudenu. 21Mukwaŋovu namanyeki dehi, neyi wukuhemba chipaŋu chindi yomweni, yuma yindi yikwikala yayiwenyi; 22neyi kudi yena kukwinza wamubadika Ŋovu hakumufwomona, wukumutambula yitwa yindi yejima yakuhwelelaŋayi, yuma yindi yanamupupiyi hakupaŋila akwawu. 23Muntu wabulaŋa kwikala mwinetu, wanhelaŋa; nimuntu wabulaŋa kupompesha hamu nanami, wapalaŋeshapa.
24Demoni wazonda chakufumayi mudi muntu, hakuya nakutambatamba kwakadi meji, amoni kwakunookela; chakukaŋanyayi kumona kwakunookela, wukwila nindi, Nifunti mwitala dami munafumini. 25Chakwinzayi hakuwana akombakombamu dehi, apoŋomwenamu dehi. 26Hakuya nakutambula akwawu ademoni atanu nayedi amubadika yomweni kutama, hiyakwijila mu, hiyakushakamamu; kutama kwanowu muntu kukubadika hadiŋiyi hatachi. 27Hadiŋi nakuhoshayi mazu awa, mwizaza himukubidika mumbanda wumu nindi, Ivumu dakuvweli, nimayeli waamwini anakooleki. 28Yena nindi, Chalala antu akutiya mazu aNzambi hiyakwila, anakooleki.
29Hadiŋi nakuhwila mazaza awantu kudi yena, hakutachika kuhosha nindi, Awa antu achisakichi chatama hiyakukeŋa chinjikijilu, hiyakayilejachuku, akayileja chochinjikijilu chaYona hohu. 30Muloŋa chabalumukiliyi Yona kwikala chinjikijilu kumesu awakwaNineve, dichi chakelayi ni mwana kamuntu kumesu awantu achisakichi. 31Mwanta wamumbanda wakukabeta kakuchidiilu wamba kemana nakuhisha antu achisakichi hakusompesha; muloŋa yena wafumini kwakumina maseki, enzi nakutiya maana aSolomoni; talenu, kunu kudi wabadika Solomoni. 32Antu akuNineve amba kemana nakuhisha antu achisakichi hakusompesha, muloŋa wena abalumukili munyichima hayishimwininuwu kudi Yona; talenu, kunu kudi wabadika Yona.
33Hikwekala muntu wabutulaŋa inoŋu adisha muchisweku, hela kudikuvumika ibaŋuku; wukudisha hamesa kulonda antu akwijila akamoni to-o. 34Inoŋu damujimba weyi disu; neyi disu deyi dikutalaŋa mumu hohu, nimumujimba weyi wejima mukutooka to-o; neyi datama, mumujimba weyi wejima mukwi kala kwamwidima hohu. 35Dichi babalaku wutali chachiwahi ochu chejeji chidi mudeyi, hamwaha himwidima. 36Dichi neyi mumujimba weyi wejima mukwi kala kwachejeji hohu, niheyila hosi, mukwi kala kwachejeji to-o, neyi chelaŋa inoŋu dasweja kutoŋeka, dakutoŋekelaŋa to-o.
37Henohu hadiŋi nakuhoshayi, kaFwarisi wumu hakumutambi ka nindi adiyi nindi; hakwijila, hakushakama nakudya. 38Owu kaFwarisi chanamoniyi wudi nakudya chakadi kusambila kwisuka, hakuhayama. 39Mwanta hakumwila nindi, Enu aFwarisi mwatookeshaŋa hanzi yalupasa nicheŋa, hakwila mukachi kenu chochimwadisoma nanyilami nikutama. 40Enu o kusupa! Welili chahanzi hidiyi welili nichamukachi nawaku, tahindi? 41Kwila yuma yayiwahi yowu wukutookesha mukachi, dichi mukumona yuma yejima yikutooka.
42O yihuŋu yimwakamona enu aFwarisi! Mwamulambu laŋa Nzambi tumafu twamwikumi twamavumba amawahi twejima, hakwila kusompesha nikukeŋa kwaNzambi kuchisha kumuchima nchi; neyi mwela yeniyi, ninoyu yi kwawu himwadi kuyikaŋanya kuyilaku. 43O yihuŋu yimwakamona enu aFwarisi! Mwakeŋa aŋa kushakama mumashikola hayitwamu yalema, nikuyimwosha kuwulandilu. 44O yihuŋu yimwakamona! muloŋa mudi neyi majamu akadi kumwekana, akadi kwilulta antu akwendahu.
45Mukwanshimbi wumu hakumwakula nindi, Eyi Nkuluŋaŋa, ichi chiwunahoshi wunasawuli ninetu nawa. 46Hakumwila nindi, O yihuŋu yimwakamona ninenu akwanshimbi nawa! Mulona mwatwikaŋa akwenu yiteli yakala kusenda, enu aweni kwiteja kukunkaku hela namunu wenu nehi. 47O yihuŋu yenu! Mwaloŋeshaŋa chachiwahi majamu awatuprofwetu ajahiluwu kudi ankakulula jenu. 48Dichi munekali dehi ayinsahu, mudi nskwiteja nyidimu yelili ankakulula jenu; muloŋa wena ayijahili, enu mwenda namutuŋiulula majamu awu. 49Mwomwahosha dehi maana aNzambi nindi, Nukuyitemeshela atuprofwetu nawapostolu; amakwawu akayijaha nikuyikabisha, 50kulonda mashi awatuprofwetu ejima apwekesheluwu kufumisha haaliluwu chikuku champata yamunu mwishina, amba kayihulamu antu achisakichi, 51kufumisha kumashi aAbeli kushika nikumashi aZakariya ajahililuwu hakachi kakameŋa namwajila. Eŋa, nukuyileja nami amba kayihulamu antu achisakichi. 52O yihuŋu yimwakamona enu akwanshimbi! Munafumishi nsaŋi yakwiluka nachu maana; enu aweni kwijila mu nehi, himukulekesha ninawa akukeŋa kwijila.
53Chanedikiyi mwenomu, ansoneki nawaFwarisi atachika nikumweseka naŋovu nankashi, hiyakumuvuloka kulonda ahoshi yuma yayivulu; 54hiya kumuta namazu akukanwa kindi, atiyi chuma chakuhoshayi, amwinkeluhu muloŋa.
Currently Selected:
Luka 11: MW62
Highlight
Share
Copy
Want to have your highlights saved across all your devices? Sign up or sign in
The Bible in Lunda: Ndembu (Lunda of Kalunda) © B. F. B. S. 1962.