Likezo 5

1Ilaŋa kwadiŋi iyala wumu, ijina dindi Ananiya, naŋodindi Safwira, hakulandisha kapata kindi. 2Hakunonahu chibalu chawuseya, Iŋodindi nawa niyena nachiluki, hakuleta chibalu chimu, hakuchitulila kunyendu yawapostolu. 3Petulu hakwila nindi, Eyi Ananiya, Satana nenzehdi mumuchima weyi, mwaka wutwambi kudi Spiritu Wajila, wusweki chibalu chawuseya wakapata keyi? 4Hadiŋi kapata kanda wukilandishi, hikadiŋi keyeyi awenuku? Hela mali wunakilandishi dehi, hiyadiŋi eyeyi aweni akwila nachu mwejima muwunakeŋuku? Muchima weyi wunatoŋojokelidi mwenimu? Hiwunatwambi kudi antuku, wunatwambi kudi Nzambi. 5Ananiya hakutiya mazu awa, adimbuka niheseki, yofwa ni kufwa. Woma waweni wukwata niantu ejima anachitiyi. 6Anyikwenzi hiyakunyamuka, hiyakumujiŋajiŋa, hiyakumutwala hanzi, hiyakumutembeka nakumujiika.

7Chikuneli munahiti dehi kwiji ora jisatu, Iŋodindi niyena hakwijila mu, chakadi kwiluka chuma chinasoŋi. 8Petulu hakumwihula nindi, Nleji, wuseya wumwalandisha kapata wowenowu, tahindi? Yena nindi, Eŋa, wowenowu. 9Petulu hakumwila nindi, Munatiya ŋenidi kweseka Spiritu yaYehova? Tiya nshindu janyendu yawantu anajiiki nfumweyi oju jikwinza kuchisu oju, nineyi nawa akukutwala hanzi. 10Hohenohu hakudimbukila kunyendu yindi, hakufwa. Anyikwenzi hiyakwijila mu, kumuwana wafwa dehi, hiyakumutwala hanzi nakumujiikila hamu nanfumwindi. 11Chipompelu chejima chitiya niwoma waweni, niantu ejima atiyili yumiyi.

12Apostolu hiyakukoŋa namakasawu niyinjikijilu niyihayamisha mukachi kawantu. Hiyakupompaŋa wejima wawu namuchima wumu hohu mwikeki daSolomoni. 13Anashali hiyakutiya woma wakudibomba nawu; ilaŋa hiyakuyilemesha kudi antu. 14Akwakwitiya asweja nikusweja kuvula, adibombeli kudi Mwanta, mazaza aweni amayala nawambanda; 15chakwila hiyakweleka akata hanzi nakuyisha munyikwakwa, nakuyikamika hela hatudidi hela hayikaŋa, kulonda chakuhitayi Petulu, hela kwamwevulu windi hohu wuyilewukili. 16Hikukupompa izaza dafumini munyikala yadiŋi kwakwihi naYerusalema niniku niniku kwi-ndo; hiyakuleta antu awu akata, niejima azakukilaŋa ademoni azonda, hiyakukola wejima wawu.

17Henohu kapristu muneni niejima adiŋiyi nawu, wowu achaaku chawaSadusi, hiyakusaŋumoka, anatiyi dehi ichima mbe. 18Hiyakukwata apostolu, hiyakuyisha mukaleya mwashilaŋawu antu onsu. 19Ilaŋa kaŋelu kaYehova wumu hakwinza nawufuku nakwenzulula yenzelu yakaleya, hakuyiidisha hanzi, 20nindi, Yenu mwimani mutembeli, muleji antu mazu ejima awumi wunu. 21Chanachitiyuwu, hiyakwijila mutembeli hankunku yakucha, hiyakuleja antu.

Ilaŋa kapristu muneni hakuya, ninawa ekalayi nawu; hakupompesha chota, nichota chawaIsarela chikwawu chalema chejima; hiyakuyitumesha kukaleya ayileti. 22Ilaŋa chayiluwu atulama, hiyakuwana mukaleya mwosi, hiyakufunta nakushimuna, 23nawu, Kaleya chalala twawana kakupata chakola, niatulama saŋa emenawu kuyenzelu; ilaŋa chitwela netu twenzululuku, tuwana mukachi nimuntu mwosi. 24Mukulumpi wamashidika akutembeli, niakulumpi jawatupristu, chatiyiluwu mazu awa, hiyakujinoka nankashi mukuya yumiyi. 25Hikukwinza muntu nakuyileja nindi, Tiyenu, awa amayala mwasha mukaleya adi mutembeli, hiyakwimana nakuleja antu. 26Mukulumpi wamashidika naawatulama hiyakuya nakuyileta chakadi ndombu. Muloŋa hiyakutiya woma wawantu, nawu akenda katwasa malola.

27Chanayiletuwu, hiyakuyimika muchota. 28Kapristu muneni hakuyila nindi, Twayilejeli chakola, netu bayi muleja antu mwŋiniduku. Tiyenu ntahi, muYerusalema mwejima mwawanina dehi kuleja kwenu hohu; munatoŋojoki nenu mutwinki muloŋa wamashi aniwu muntu. 29Ilaŋa Petulu nawapostolu hiyakwakula nawu, Chiŋa twovwahila Nzambi, bayi antuku. 30Nzambi yawankakulula jetu wamusaŋwili Yesu mudi afu, mwajahilenu nakumukudika kumutondu. 31Yenowu anamutuumbakeshi dehi kudi Nzambi nachikasa chindi chachidiilu, ekali Mwanta niChamwinu, kulonda aleti kudi Isarela jakubalumuka munyichima, nikuyanakena nyiloŋa. 32Etu yetu ayinsahu yayumiyi; niSpiritu Wajila nawa anenkiyi Nzambi akwakumwovwahila.

33Wena chanachitiyuwu, chiyitapa nikunyichima, hiyakutoŋojoka nawu ayijahi. 34Muchota himukwimana kaFwarisi wumu, ijina dindi Gamaleli, nkuluŋaŋa wanshimbi, amuhameka kudi antu ejima; hakuyileja nindi ayiidishi awa amayala kapinji kanti. 35Hakuyila nindi, Enu amayala aIsarela, babalenu chimukukeŋa kuyila awa amayala. 36Muloŋa mafuku adiŋuku, Teyudasa wanyamukili nakudisamba nindi nalema; yena hakudibomba nawamayala amakwawu, kwiji makulakaji awana. Amujaha dehi, niantu ejima amwovwahilili ayipalaŋesha dehi; akaŋanya nipukwa.

37Kulondela hadi yeniwu, hasonekeluwu antu, Yudasi wakuŊaliliya niyena nawa, hakwambula antu amakwawu, nindi adikumi nayena. Yena nawa wanoŋa dehi, niamakwawu ejima amwovwahilili ayipalaŋesha dehi ndu-ndu.

38Ichi dinu nukuyileja nami yambulukenu amayalawa, yilekenu kwawu. Muloŋa neyi mpùŋaiyi hela mudimu iwu wawantu, wukwi kala wamukunkulwayi. 39Ilaŋa neyi himudimu waNzambi, himwakatwesha kuyifwomonaku, mwakenda kela mudi nakulwisha naNzambi yomweni.

40Hiyakwiteja mwanahoshiyi. Chanatambikuwu apostolu, hiyakuyeta, hiyakuyileja naŋovu nawu, Bayi muhosha mwijina daYesuku. Ayumbaku nikuyumbaku. 41Dichi hiyakufuma muchota nakuzaŋalala, nanochu chanayifuukwiluwu kutela kusawuka nakukoola ijina. 42Hiyalekeli kuleja antu hefuku hefuku, nimutembeli, nikumatalawuku, nakushimuna Yesu nawu diyi Kristu.

Currently Selected:

Likezo 5: MW62

Highlight

Copy