Loma 7

Kukasunuka kuJishimbi jaMose

1Nyi enu vandumbwami, kamwatachikizako tahi? (Mwomwo nguli nakuhanjika naava vatachikiza Jishimbi). Ngwami, mutu akashiwa kuJishimbi shimbu achili wamutonyi.

2Mwomwo pwevo wakusomboka akashiwa kuli lunga lyenyi haJishimbi, shimbu uze lunga achili wamutonyi. Oloze nge lunga lyenyi mwafwa, kaha mwakasunuka kulushimbi kana lwaulo.

3Shikaho, nge uze pwevo mwasomboka kuli lunga weka shimbu lunga lyenyi achili wamutonyi, navamuvuluka ngwavo muka-ujila. Oloze nge lunga lyenyi mwafwa, kaha mwasokoka kulushimbi kana, kaha chipwe tuhu mwasomboka kuli lunga weka, keshi kupwa muka-ujilako.

4Shikaho, enu vandumbwami, nayenu nawa, mumujimba waKulishitu mwafwa lyehi nakuhandunuka kuJishimbi mangana mulinunge naweka, Ikiye Ou vásangula muvafu, mangana twiminenga Kalunga mihako.

5Mwomwo shimbu twapwile nakuyoyela mwaya chisemwa chamujimba, jipeha jashili vásangumwine kuJishimbi, jazachilenga muvilyo vyamijimba yetu nakwima mihako yakutwala kukufwa.

6Oloze jino vatukasununa lyehi kufuma kuJishimbi, omu twafwa nakuhandunuka kuchize chatukashile, mangana tuzenekenga kuzachila muundungo wamazu akusoneka amwaka, oloze tuzatenga muundungo wauhya waShipilitu.

Kukaluhwa chashili yatwama muli ami

7Shikaho natwamba ngwetu ika, Jishimbi japwa shili tahi? Chijilocho! Oloze chakuzeneka Jishimbi, kachi kangwatachikijile shiliko. Mwomwo ami kachi kangwatachikijile mwalumbunukila lwisoko nge Jishimbi kajambile ngwajo,

Kanda ukapwa nalwisoko.

8Oloze shili, hakuwana kengililo haJishimbi, yasangumwine jipeha jeka najeka jajipi muli ami. Mwomwo chikeshi Jishimbi kachi shili hanga yafwila#7:8 Nge ngwavo, kayeshi nangoloko..

9Jino, ami hamwaka ngwapwile nguwamutonyi chakuzeneka Jishimbi. Oloze omu ejile mazu akungukanda, shili yayoyele#7:9 Nge ngwavo, yakwachile cheka ngolo. cheka, kaha ami ngwafwile.

10Kaha aze vene mazu ákungukanda átelele kungunehela mwono, ngwaawanyine akungunehela kufwa.

11Mwomwo shili hakuwana kengililo hamazu akungukanda, yangwongele nakungujihila haaze mazu.

12Ngocho Jishimbi japwa jajila, kaha nawa mazu akukanda apwa ajila, oloka, amwenemwene.

13Kumana echi chámwenemwene chinangunehela kufwa, numba? Chijilocho! Oloze shili, mangana yilumbunuke kupwa shili, yanehele kufwa muli ami hakuzachisa chize chamwenemwene, mangana hamazu akukanda, shili yilumbunuke kupwa yayipi chikuma.

14Mwomwo tunatachikiza ngwetu, Jishimbi japwa jauShipilitu, oloze ami ngumuka-chisemwa chamujimba kaha, nguwakuhetuwa muundungo kushili.

15Mwomwo muze ngwalinga kamwangulumbunukilako, mwomwo kangwalinga muze ngwasaka kulingako, oloze muze ngwahunga mukiko ngwalinga.

16Shikaho, nge ngwalinga muze kangwasaka kulingako, kaha Jishimbi ngwajitavila ngwami, Jinawahe.

17Kumana jino, keshi yami cheka ngwalingamoko, shina shili yize yatwama muli ami.

18Mwomwo ngunatachikiza ngwami, muli ami, muchisemwa chami chamujimba, kamwatwama chuma nachimwe chamwenemweneko. Mwomwo muli ami kufwila kulinga mwamwenemwene muchatwama, oloze uhashi wakulingamo kangwatwama nawoko.

19Mwomwo mwamwenemwene muze ngwasaka kangwalingamoko, oloze mwamupi muze ngwazeneka kusaka, mukiko vene ngweji kulinganga.

20Kumana jino ami hakulinga muze kangwasakako, keshi yami cheka nguli nakulingamoko, shina shili yize yatwama muli ami.

21Shikaho ngunawane ngwami kuli lushimbi — haze nangusaka kulinga mwamwenemwene, kupihya hanga chapwila muli ami.

22Mwomwo Jishimbi jaKalunga ngwajivwa kuwaha mumutu wamutulo.

23Oloze ngunamono lushimbi lweka muvilyo vyami, olu lweji kulwanga jita nalushimbi lwamumuchima wami, nakungutwala muufunge walushimbi lwashili olu luli muvilyo vyami.

24Omu ngwayanda ami papu! Iyaze mwanguyovola mumujimba uno waufu?

25Vamusakwililenga Kalunga, mwomwo kuyovoka chili muli Yesu Kulishitu Mwata wetu! Ngocho ami ivene namuchima wami ngweji kuzachilanga Jishimbi jaKalunga muundungo, oloze muchisemwa chamujimba ngweji kuzachilanga lushimbi lwashili muundungo.

Currently Selected:

Loma 7: LUE

Highlight

Copy

Compare