Vilinga 28
28
Paulu kulitungu lyaMelita
1Omu twayovokele, numba jino tutachikize ngwetu litungu kana valivuluka ngwavo Melita.
2Kaha venya-litungu lize vatusolwelele zangi yakukomwesa, vatutambwile tuvosena kanawa nakutuwikila kakahya, mwomwo vula yaputukile kunoka, kaha kwapwile chishika.
3Jino omu Paulu ambachile mukuta wajitete nakuuhaka hakakahya, hasolomokele chiyenge hakwivwa liyena lyakakahya, kaha amusumine nakumukakachila kulivoko.
4Omu vaze venya-litungu vamwene uze kapela wamupi#28:4 MuchiHelase ngwavo, kanyama wamupi. nazezalala kulivoko lyenyi, valihanjikishile ngwavo, Chinalumbunuka vene, ou mutu chihwanga. Chipwe tuhu nayovoka kukalungalwiji, oloze kalunga wapwevo vavuluka ngwavo Chiyulo chakwoloka#28:4 Vaka-Melita valifukwilenga kuli kalunga kavo wapwevo lijina lyenyi Chiyulo chakwoloka, nge ngwavo muka-kuzangamisa vaka-kulinga mwamupi. kamwitavishile ayoyeko.
5Oloze Paulu amumijilile uze kapela wamupi hakakahya, kaha kakwasolokele ukalu kuli ikiyeko.
6Oloze vakiko vamutalijijile ngwavo mwajimba, chipwe mwandumuka nakufwa. Oloze omu vatwalilileho nakumutalijiza, kakwasolokele ukalu kuli ikiyeko, valumwine michima yavo nakwamba ngwavo ou kalunga.
7Jino kwakamwihi nayize ngalila, kwapwile musuka wamavu amukulwane walize litungu, lijina lyenyi Puvuliu. Atutambwile nachisambo nakutuzumbula kanawa hamakumbi atatu.
8Jino ise yaPuvuliu apwile mukahela namusongo wachishika nakuhichisa manyinga. Kaha Paulu engililemo, alombele nakumunangika mavoko, amuhindwile.
9Omu chasolokele ngana, navakwavo vapwile namisongo haze halitungu navakiko nawa vejile, kaha vavahindwile.
10Vatuvumbikile chikuma, kaha omu twapwile kwakamwihi nakukatuka, vatuhanyine vize twákalikijile.
Paulu mwaheta kuLoma
11Omu mwahichile tukweji vatatu, twasunukile nakuya muwato wakuAlekesandelya uze wapwile kulitungu lize ngonde yachishika yosena, wapwile nakaponya wakusonga hatongo yawo wachifwanyisa chavapasa vaze vavulukilenga ngwavo tulunga#28:11 Vaze vapasa, vaKashita na Polushi, vapwile tulunga valifukwilengako vaka-kutambukisa mato..
12Kaha omu twahetele kuSulakuse twasulikile wato, twavandamineko makumbi atatu.
13Kufuma haze twafumishile vilimbikiso mumeya, twayile nakuheta kuLejume. Kaha omu mwahichile likumbi limwe, peho yakumutamba wachilyo chamututuko yahuhwile nakutushinjika, shikaho twahetele kuPuteyole halikumbi lyamuchivali.
14Kuze twawanyineko vandumbwetu vamwe vátusanyikile tutwame navo, twatwamine navo makumbi atanu naavali, kaha twayile kuLoma.
15Kaha omu vatwivwile vandumbwetu kuLoma, vejile nakutusesa kuChilanjilo chaApiu, vakwavo nawa vatusesele kuze vavuluka ngwavo Jizuvo Jitatu jakushikila Vangeji. Omu Paulu avamwene, asakwililile Kalunga nakulikolezeza.
16Kaha omu twahetele twengilile muLoma, Paulu vamwitavishile kutwama mwauka wenyi, naliswalale wakumulama.
Paulu mwambulula mazu kuLoma
17Jino omu mwahichile makumbi atatu, Paulu asanyikile vatwamina vavaYuleya vapwile muLoma vezenga kuze ápwile. Kaha omu vakungulukile, avambile ngwenyi,
Enu malunga vandumbwami vaYuleya, chipwe kangwapihishile vaka-muyachi wetuko, chipwe vilika vyavakakuluka jetu, oloze vaka-Yelusalema vanguhanyine kumavoko avaLoma kupwa ngufunge.
18Omu vakumishile kungushinjisa, vasakile kungwecha nguliyile, mwomwo kavawanyine mulonga wakungujihilako.
19Oloze omu vaYuleya vakanyine, changulingishile kulomba Kesale avatule chihande — keshi nge ngwasakile kuwanyina vaka-muyachi wami mulongako.
20Hachihande echi, hakiko ngunamisanyikila ngwami tuliwane nakushimutwila, mwomwo halutalililo lwavaIsalele hakiko ngunakashiwila nalilenge eli.
21Vakiko vambile ngwavo, Etu katwatambwíle mikanda yakufuma kuYuleyako, kaha naumwe ndumbwetu neza nakutulweza chipwe kuvuluka vyavipi hali ove wauchi.
22Oloze etu tunasake twivwenga vishinganyeka vyove, mwomwo tunatachikiza ngwetu mukana kana ou, vali nakuukana kwosena.
23Omu vatongwele likumbi lyakuliwana nenyi, vaYuleya vavavulu chikuma vejile kuli ikiye kuzuvo yize átwaminenga. Kaha kufuma kuchimene, swi-i nakukulauka chalikumbi, avalumbunwinyine nakuvahuhumuna havyawangana waKalunga, nakweseka kuvakunyula namazu akuJishimbi jaMose naawa avapolofweto akuvuluka Yesu.
24Kaha vamwe vakunyukile havize ahanjikile, oloze vakwavo vakanyine kufwelela.
25Kaha omu vazenekele kulivwa mukachi kavo hinavaliyila, ohonyi Paulu nahanjika lyehi mazu amwe ngwenyi,
Shipilitu Wajila ahanjikile mwakwoloka kuli vakakuluka jenu muli kapolofweto Isaya ngwenyi,
26 Yako kuli vatu ava nakuvamba ngwove,
Kwivwa namwivwa, oloze kacheshi kumilumbunukilako.
Kumona namumona, oloze kacheshi kumitumbunukilako.
27Mwomwo michima yavatu ava yinambumbula,
Matwitwi avo kwivwa kanawa chiku,
Meso avo vanawalalavika,
Kuchina navamona nameso,
Nakwivwa namatwitwi,
Nakuvalumbunukila mumichima,
Mangana vakinduluke nguvahindule.
28Shikaho, tachikizenu ngwenu, Kalunga natumu ulwilo wenyi kuli vaka-mafuchi — navawivwilila!
29[Kaha omu ahanjikile mazu awa, vaYuleya vafumineko nakulipula jipami chikuma mukachi kavo.]
30Hamyaka yivali yamuundu atwaminenga muzuvo yenyi yakulifwetela ivene, atambwilenga vosena vejilenga kuli ikiye.
31Ambulwilenga wangana waKalunga, nakunangula vyaMwata Yesu Kulishitu, nakumika chikuma, chakuzeneka kumukanyisa.
Currently Selected:
Vilinga 28: LUE
Highlight
Copy
Compare
Share
Want to have your highlights saved across all your devices? Sign up or sign in
Bible Society of Zambia
