Roma 7
7
Goonɗinɗo rinɗinaama diga e tawreeta
1Banniraaɓe, mii badda on onon annuɓe tawreeta. Oon anni tawreeta dawrantaa maa neɗɗo to emo wuuri. 2Hande non debbo ɓaŋaaɗo, tawreeta haɓɓiri mo e gorko makko wakkati guurnam goriiko. Amma to goriiko maayii, o firtake e tawreeta kaɓɓunooka mo e goriiko. 3Amma to o laatake debbo goɗɗo diga goriiko e wuuri, o noddete jeenoowo. Amma to goriiko maayii, o firtake e tawreeta, o noddataake bo jeenoowo baa to gorko goɗɗo hoowii mo. 4Hande non ɗum laatii e mooɗon onon bo, banniraaɓe am. Sabbu maayde *Almasiihu on dimɗinaama diga e tawreeta. On laatake himɓe *Almasiihu mo Alla fintini diga maayde gam gaɗen ko fottanta Alla. 5Wakkati tokkitaniɗen suunooji ɓalli men, en tokkiino giɗaaɗi hakke ƴiwuɗe e tawreeta. Tawreeta kan gollotonoo der men e yaara en e maayde. 6Amma jooni, en dimɗinaama e tawreeta, en maayii dow wecco makka. Gam majjum en cujidantaa Alla e laawol kiinŋol ŋol tawreeta binnaaka. Amma een cujidana mo e laawol kesol ŋol Ruuhu makko.
Tawreeta moytataa hakke
7Den, ume bi'eten kade? Tawreeta laati nun hakke na? Abada! Amma, diga e tawreeta nun annirmi ko woni hakke. Gam mi annataano ko woni suuno to tawreeta wi'ayno: «Taa suuna.» 8Hakke heɓii laawol diga e tawreeta, ɗe gattimmi suunooji iri ɗiye fu. Gam to tawreeta walaa, hakke bo walaa. 9Denno de mi annaano tawreeta, emi wuurunoo. Amma no tawreeta wari, hakke heɓii baawɗe, 10den min, maayumi. Tawreeta kaanunooka hokkammi yonki, waddanii am maayde. 11Gam hakke heɓii laawol diga e tawreeta, ƴoyrimmi, yaarimmi der maayde.
12Hande non, tawreeta e laatii ceniika. Sariyaaji makka bo e laatii ceniiɗi, poonnitiiɗi, booɗuɗi. 13Jooni, ko wooɗi laatanike am maayde na? Abada! Amma gam hakke hollitoo no ɗe laati nun hakke e gooŋa, ɗe gollirii ko wooɗi, go ɗe barimmi. Hande non, diga e tawreeta, hakke heɓi hollitiri hallande mum fu.
Haɓidingo e hakke
14Een anni tawreeta ƴiwii diga Ruuhu. Amma min, mii laatii neɗɗo tampuɗo, mii laatii maccuɗo hakke. 15E gooŋa, mi faamataa ko gaɗanmi. Ko jiɗumi, mi waɗataa ɗum, amma ko banyumi, gaɗanmi. 16To mii waɗa ko mi yiɗaa, eɗum hollita no mi nootake tawreeta e wooɗi. 17Jooni, min bane waɗata ko gaɗanmi, hakke gonuɗe der am waɗata ɗum. 18Gam mii anni, ko wooɗi walaa der am, waato der ɓannu am. Mii yiɗi waɗugo ko wooɗi, amma mi waawataa ko waɗi ɗum. 19Mii yiɗi waɗugo ko wooɗi, amma mi waɗataa ɗum. Kalluɗum ɗum mi yiɗaa nun gaɗanmi. 20To mii waɗa ko mi yiɗaa, min bane waɗata ɗum, amma hakke gonuɗe der am waɗata ɗum.
21Daa ko ji'umi e waɗoo der am: de jiɗumi waɗugo ko wooɗi, kalluɗum nun haɗatammi waɗugo ɗum. 22Der lugguɗum ɓerne am, mii seyorii tawreeta Alla. 23Amma mii yi'a tawreeta gokka der am, kaɓidoowa e tawreeta ka hakkillo am jaɓi. Ka laatinimmi maccuɗo tawreeta hakke gonuɗe der am. 24Kayto! Mii laatii neɗɗo jurminiiɗo! Moy rinɗintammi diga e ɓannu maayoowol ŋol ɗo? 25Yettoore laatanoo Alla, diga e Joomiraawo meeɗen Yeesu *Almasiihu!
Min, der hakkillo am, mi laati nun maccuɗo tawreeta Alla, amma der am, mii maccuɗo tawreeta hakke.
Bible Fulfulde Bénin © SIM International 2015, 2024.