Roma 4
4
Goonɗinki Iburaahiima
1Ume bi'eten dow Iburaahiima maama lenyol meeɗen? Ume o heɓi? 2To Iburaahiima laatinaama poonnitiiɗo gam gaɗu mum, den o waawan ko mawnitii, amma yeeso Alla bane. 3Gam Dewtere wi'i: «Iburaahiima goonɗinii Alla, go Alla daari mo poonnitiiɗo sabbu goonɗinki makko.» 4To goɗɗo gollake, sey joomum yoɓee joddi mum, moƴƴere bane o waɗanaa, ko haanani mo nun. 5Hande jon bi'en goɗɗo waɗay golle, amma o goonɗinii Alla laatinoowo hakkeeɓe foonnitiiɓe. Alla daaran mo poonnitiiɗo gam goonɗinki makko. 6Hande non Dawda batirani barke ɗe neɗɗo heɓata to Alla, baa to o waɗay gaɗu geetu. O wi'i:
7«Barke laatanii ɓe boofi mum yaafaa, e ɓe hakke mum moytaa.
8Barke laatanii neɗɗo mo Joomiraawo limay hakkeeji mum.»
9Barke ɗen juulniiɓe tan nun resanaa ɗe na? Ɗe laatanaaki ɓe juulnaaki na? Gam en bi'ii: «Alla daarii Iburaahiima poonnitiiɗo gam goonɗinki mum.» 10Wakkati dey nun Alla daari Iburaahiima poonitiiɗo? De o juulnii na? Naa, de o juulnaaki? De o juulnii bane, amma diga o juulnaakino nun. 11Juulnol ŋol Alla wi'i o juulnoo laatake alaama foonnitaare ne o heɓi. E goonɗinki o heɓiri ne diga o juulnaakino. Hande non, o laatorii maama goonɗinɓe fu, baa e ɓe juulnaaki, gam kamɓe bo ɓe daaree foonnitiiɓe. 12O laatake bo baaba juulniiɓe. Ɓe daroraaki juulnol tan nun batananmi, amma tokkuɓe laawol goonɗinki maama meeɗen Iburaahiima, diga o juulnaaki.
Alkawal Alla
13Iburaahiima e lenyol mum haɓɓanaama alkawal rona duuniyaaru nu. Hinaa gam oo tokkii tawreeta. O haɓɓanaama alkawal ŋal gam foonnitaare makko ne o heɓiri diga e goonɗinki. 14To tokkugo tawreeta nun hokkata donŋu, den mum goonɗinki laatake baanji, alkawal bo moytaama. 15Tawreeta waddan nun mone Alla. To tawreeta walaa, ƴaartaago ka bo walaa.
16Gam majjum, alkawal Alla dow goonɗinki nun darii, gam ŋal laatoo e moƴƴere ne Alla waɗani lenyol Iburaahiima fu. Hinaa tokkuɓe tawreeta tan ŋal laatanii, amma goonɗinɓe hande no Iburaahiima laatiiɗo maama meeɗen en fu goonɗiniri. 17Dewtere wi'ii: «Mi waɗii maa baaba himɓe lenyi ɗuuɗɗi.» Iburaahiima woni maama meeɗen en fu, yeeso Alla mo o goonɗini. Alla pintinoowo maayɓe, accoowo ko walaano laatoo. 18Iburaahiima hoolake Alla, baa no o woodaa tammuhe kade. O hoolake, o goonɗini. Non nun o laatorii baaba himɓe lenyi ɗuuɗɗi, hande no Alla wi'unoo mo: «Nii lenyol maaɗa laatoyto.» 19Goonɗinki Iburaahiima tampay, baa no duuɓi makko waɗan hewre (100). Oo anni ɓannu makko naywii, Saratu debbo makko bo rimataa kade. 20O waɗay seko dow alkawal Alla, o saloo goonɗingo. Amma goonɗinki makko semmiɗinii mo, o teddini Alla. 21O tabbitini no Alla e woodi baawɗe hebbingo alkawal mum. 22Gam majjum, Alla daari mo poonnitiiɗo. 23Amma hinaa gam makko tan haalaaji ɗii ɗo winnaa, bi'uɗi: «O daaraama poonnitiiɗo.» 24Ɗi binnaama bo gam meeɗen, enen ɓe Alla laatini foonnitiiɓe gam sabbu en goonɗinii mo, kanko pintinɗo Joomiraawo meeɗen Yeesu diga maayde. 25Yeesu on maayi gam boofi meeɗen, go Alla fintini mo gam laatoɗen foonnitiiɓe.
Bible Fulfulde Bénin © SIM International 2015, 2024.