Roma 3
3
1Den to non, ume nun *Yahuduujo ɓuriri ɓe lenyi janani? Ume woni nafuwe juulnol? 2Nafuwe majjum e mawni dow laabi fu. Aran, *Yahuduuɓe nun Alla arti yowani haala mum. 3To non, to woɓɓe maɓɓe laataaki hoolaaɓe, ɗum haɗan Alla laataago koolaaɗo na? 4Waɗataako. Ɗum annitinte no Alla laati nun gooŋaajo, himɓe fu bo e laatii fewooɓe. Gam e winnii:
«A annitinte aa laatii poonnitiiɗo diga e haala maa,
to a hiitaama, a jaaloto.»
5Amma to dullere gooŋaaku meeɗen e hollita foonnitaare Alla, den ume bi'eten? Alla laataaki poonnitiiɗo to mone makko ummanake en na? Mii bata ɗo hande no himɓe batirta. 6Gam to Alla laataaki poonnitiiɗo, noy o hiitortoo duuniyaaru?
7Gam to fewre am e ɓeyda laaɓingo gooŋa Alla, e teddina mo, ume kiitanteemi hande mi laati nun hakkeejo? 8Woɓɓe e hallina men e wi'a, menen nun wi'ata: «En gaɗee ko halli gam ko wooɗi wurtoo diga e majjum.» Kamɓe, ɓe kiitete no haaniri.
Poonnitiiɗo walaa
9To non, enen *Yahuduuɓe een ɓuri horiiɓe na? Aawo, baa seɗɗa! Gam mi hollii no *Yahuduujo e mo laataaki *Yahuduujo fu na'on e baawɗe hakke. 10Dewtere wi'ii:
«Poonnitiiɗo walaa, baa gooto,
11mo faamu walaa baa gooto,
daartoowo Alla walaa, baa gooto.
12Himɓe fu majjii, ɓe fu ɓe biisake,
gaɗoowo ko wooɗi walaa,
baa gooto.
13Konoli maɓɓe e nandi e janaale maɓɓitiiɗe,
ɓee jammoo himɓe e ɗelle maɓɓe.
Toni kunnuɗe maɓɓe e hebbi tooke, hande bolle pure.
14Kunnuɗe maɓɓe e hebbi jaa'ooje e boliiɗe naawuɗe.
15Koyɗe maɓɓe e yawɗanoo reƴƴitingo ƴiiƴam himɓe.
16Halkere e bone e woni to ɓe jahi fu.
17Ɓe annaa laawol jam.
18Kulol Alla walaa e ɓerɗe maɓɓe baa seɗɗa.»
19Een anni ko tawreeta bati fu, ka batanay ɗum maa wonɓe e makka. Gam kunnuɗe fu muɓɓoo, himɓe fu annita gacce mum yeeso Alla. 20Gam majjum, walaa laatinteeɗo poonnitiiɗo yeeso Alla diga e tokkugo tawreeta. Gam tawreeta hollan nun himɓe hakkeeji mum.
No Alla laatinirta himɓe foonnitiiɓe
21Jooni, Alla hollitii laawol no o laatinirta himɓe foonnitiiɓe, hinaa e tokkugo tawreeta. Non dewte tawreeta, e ɗe *annabiiɓe seedinoo. 22Alla laatinan himɓe foonnitiiɓe gam ɓe goonɗinii Yeesu *Almasiihu. Ɗum laatanto goonɗinɗo fu, gam Alla ɓurontirtaa himɓe. 23Himɓe fu waɗii hakke, ɓe dulli tedduŋal ŋal Alla hokkata. 24Amma Alla waɗanii ɓe moƴƴere, laatini ɓe foonnitiiɓe gam Yeesu *Almasiihu, cooditiiɗo ɓe. 25Kanko nun Alla laatini sadaka moytanka hakkeeji goonɗinɓe diga e ƴiiƴam makko. Hande non Alla hollitiri foonnitaare mum e munyal mum dow hakkeeji gaɗanooɗi hiitaaka. 26O waɗii ɗum gam o hollita foonnitaare makko der wakkati ki gonuɗen jooni. Ɗum hokkii mo laawol laataago poonnitiiɗo e laatingo goonɗinɗo Yeesu fu poonnitiiɗo.
27Ume nun horii ko jurortee kade? Goɗɗum walaa! Gam ume? Gam Alla daarataa ɗowtanaago tawreeta, goonɗinki tan o daarata. 28Gam een anni e goonɗinki nun neɗɗo laatinirtee poonnitiiɗo, hinaa gam tokkugo tawreeta. 29Alla laati nun Alla mo *Yahuduuɓe tan na? O laataaki Alla ɓe lenyi janani na? Seko walaa, o laati nun Alla ɓe lenyi janani bo. 30Alla gooto nun woni. Kanko laatinta juulniiɓe foonnitiiɓe sabbu goonɗinki maɓɓe. Kanko bo laatinta ɓe juulnaaki foonnitiiɓe sabbu goonɗinki maɓɓe. 31Den mum, en moytan nun tawreeta gam en goonɗinii na? Abada! En moytataa ka, amma een tabbitina ka!
Currently Selected:
Roma 3: BFB
Highlight
Copy
Compare
Share
Want to have your highlights saved across all your devices? Sign up or sign in
Bible Fulfulde Bénin © SIM International 2015, 2024.