Hose'a 13
13
No Isira'iila halkirta
1To himɓe Efurayimu e batannoo, sey himɓe fu hula.
Kamɓe dawranannoo lenyi Isira'iila fu.
Amma ɓe janti ɓee caafa tooruure Ba'ali go ɓe kalki.
2Faa hanne, himɓe Efurayimu e tinnii e waɗa ko halli.
Ɓe taayini janni ɓe gaɗiri tooruure.
Ɓe etti cardi ɓe tafiri tooruuje nanduɗe e ga'i. Ɗum ɗon fu, neɗɗo nun waɗi ɗum.
Go enon fu kanje ɗen nun ɓe bi'ata e waɗanee kiiseteeɗi.
Ɓee buuɗana ɗe wardi buuɗeteeɗum.
3Gam mum, ɓe jawtan hande duule subaka.
Ɓe jawtan hande saawawre yawtirta.
Ɓe laatoto hande nyaane ne hennu fiirirta
naa bo hande curki burtortooki e peccol suudu.
4Onon himɓe Isira'iila,
min woni Alla Joomiraawo mon diga gonuɗon leydi Misira.
On goodaa Alla gom to hinaa min.
Paabotooɗo gom walaa to hinaa min.
5Mi durii on der ladde yorne,
deenumi on der leydi ni walaa diyam.
6Amma no jottiɗon to durande woni,
duruɗon kaaruɗon hande mareefuuji.
Amma no kaaruɗon, on mawnitake go boppuɗon am.
7Gam mum, mi laatanto on hande jaggere,
mi laato hande muusuuru ladde,
mi sakkoo on e laawol.
8Mi yantan on hande mareefu ladde kalluŋu ŋu ɓikkon mum ettaa.
Mi sikkitan gabaaje mon.
Mi ƴakkan on hande jaggere rewre.
Dawaaɗi ladde ƴakkan on.
9Onon himɓe Isira'iila, halkere tawii on gam on boppii am min baawoowo faabaago on.
10Toy laamiiɗo mon on?
Accee o wara o hisina on der wanŋarɗe mon fu.
Toy ardaniinoɓe on woni?
Onon bane hinaa eelunoo am wi'i,
mi suɓana on laamiiɗo e ardantooɓe on?
11E mone nun cuɓirannoomi on laamiiɗo,
e mone sattune nun bo dulliniranmi on mo jooni.
12Boofi himɓe Efurayimu winnaama,
hakkeeji maɓɓe na'on suuɗaa taw.
13Ɓe laati nun hande suka mo dingol mum yottii,
go dulli hakkillo,
salii wurtaago diga reedu inna mum.
14Min Joomiraawo e haani hinaa mi hisina ɓe joonne maayɓe?
E haani hinaa mi teeta ɓe e juuɗe maaydere?
Maaydere, toy kaɓirɗum maa woni?
An joonne maayɓe, toy baawɗe maa ɗe barirtaa himɓe woni?
Mi yurumataako himɓe Efurayimu baa seɗɗa.
15Baa to himɓe Efurayimu waɗii semme caka banniraaɓe mum,
hennu ƴiwan diga lettugal,
ŋol tokkaa der ladde yorne
ŋol wara ŋol yanta ɓe.
Min Joomiraawo nun yoofoyta ŋol.
Den mum, ɓulli dullan diyam,
lokooji ɓetta.
Hennu ŋol ɓottan jawdi maɓɓe,
wuuwa kujje maɓɓe booɗɗe fu dillida.
Currently Selected:
Hose'a 13: BFB
Highlight
Share
Copy
Want to have your highlights saved across all your devices? Sign up or sign in
Bible Fulfulde Bénin © SIM International 2015, 2024.
