Fuɗɗoode 33

No Yaakuubu fottiri e Isuwa

1Ɓaawo mum, Yaakuubu ɓanti gite mum, yi'i Isuwa e wara e himɓe mum keme nayo (400) ɓen. O seenniri sukaaɓe makko. O hokki Leya ɓe mum. O hokki bo Rahiilu mo mum. Go o hokki horɓe makko ɗiɗo ɓe mum. 2O ardini horɓe makko ɗiɗo ɓen e sukaaɓe mum, go o tokkini Leya e sukaaɓe mum. Ɓaawo mum Rahiilu sakitii e Yusufu. 3Kanko e hoore makko, o ardii yeeso maɓɓe, o yahi o jiccii yeeso mawniiko faa de jeeɗiɗi. 4Ɗon nun Isuwa bo doggoy gattii Yaakuubu e daane, o wuunii mo, go ɓe fu ɗiɗo, ɓe janti bojji. 5No Isuwa ɓanti gite mum, yi'i rewɓe e sukaaɓe Yaakuubu. Go o wi'i: Ɓee nun ɗoo? Yaakuubu toontii wi'i: Sukaaɓe ɓe Alla hokkimmi, gam sabbu moƴƴere mum min maccuɗo maa nun ɗon. 6Horɓe ɓen e sukaaɓe mum ɓattii jiccii yeeso Isuwa. 7Leya bo e sukaaɓe mum ɓattii jiccii yeeso Isuwa. Ɓaawo mum Rahiilu e Yusufu kanun bo ɓattii jiccii.

8Ɗon nun Isuwa ƴami Yaakuubu wi'i: Toy nun jaarataa mareefuuji ɗi pottumi ɗin? Yaakuubu toontii wi'i: Mi lildanma ɗi nun gam gaɗanaa am moƴƴere an mawɗo am. 9Isuwa wi'i: Miiraawo am, jawdi am e ɗuuɗi, joga jawdi maa. 10Ɗon nun Yaakuubu toontii wi'i: Aa'a, mi eelete nun, to a waɗanii am moƴƴere kan, jaɓu kokkoral am. Gam no ji'u maa mi, ɗum waɗu am nun hande yeeso Alla nun ji'umi, gam sabbu no jaɓirɗaa am. 11Mi eelete nun, jaɓu kokkoral ŋal kokkor maa mi, gam Alla waɗanii am moƴƴere, mi dullay goɗɗum. O ɓilli Isuwa sanne, go o jaɓi.

12Isuwa wi'i: Umma jawten, mi ardante. 13Yaakuubu toontii wi'i: Mawɗo am, aa anni no sukaaɓe am waɗay semme taw, mii woodi bo baali e be'i, e na'i musinooji, to ɗi ɓillaama e yaadu hinaa nyalaane woore, ɗi fu ɗi baatan. 14An mawɗo am, mi eelete nun ardoɗaa. Min e mareefuuji am, e sukaaɓe am, men tokkete seese seese faa men jottoroo to maa faa leydi Seyri. 15Isuwa wi'i: To non nun, mi accante himɓe am woɓɓe. Yaakuubu wi'i: Mawɗo am, aawo, gaɗanaa am tan ni moƴƴere. 16Nyalaane woore nen nun Isuwa nanŋi laawol mum hooti Seyri.

Yaakuubu hoɗii takkol Sikemu

17Amma Yaakuubu kan, yawtiri Sukotu. No o yottii ton, o mahani hoore makko suudu, go o waɗani mareefuuji makko bukaaji. Kan acci nokkuure nen noddaa Sukotu, inne ne filliti nun, bukaaji. 18Yaakuubu wartii diga Paddan Aramu e jam. No o yottii, o hoɗi takkol wanŋarde Sikemu der leydi Kanaana. 19O soodi jayri to o tiggi bukaaji makko ɗon to ɓiɓɓe Hamori, baaba Sikemu. O soodi ni jaka ceede cardi keme ɗiɗi. 20O mahi ɗon hiisirde. O noddi ne, Alla woni Joomiraawo Isira'iilaaɓe.

Currently Selected:

Fuɗɗoode 33: BFB

Highlight

Copy