Fuɗɗoode 24

Teegal Isiyaaku e Rebeka

1Iburaahiima naywii sanne, duuɓi mum ɗuuɗii. Joomiraawo bo barkiɗinii mo der huune fu. 2Ɗon nun Iburaahiima bati maccuɗo mum mawɗo mo halifini jawdi mum fu, o wi'i: Mi eelete nun, wattu juunŋo maa hakkune asaale#24:2 meemu yeere am am, 3den kunoɗaa e inne Joomiraawo, laatiiɗo Joomiraawo dow e leydi, no a ɓaŋantaa suka am debbo der gati Kanaaninkeeɓe ɓe caka mum jooɗiimi. 4Amma a yahan faa genni am, caka himɓe lenyol am, ɓaŋanaa suka am, Isiyaaku debbo. 5Maccuɗo on toontii mo wi'i: Waɗoto debbo on saloo tokkoygo am faa leydi ɗo, den mum haanu nun mi yaaraa suka maa faa leydi ni ƴiwoyɗaa na? 6Iburaahiima toontii mo: Hakkil, taa yaaru suka am faa ton. 7Alla Joomiraawo mo dow kammu, burtinɗo am diga wuro baaba am, e leydi am, badduɗo am go hunanii am no hokkan lenyol am leydi nii ɗo, o lilan malaykaajo makko o ardanee, ɓaŋiranaa suka am debbo diga ton. 8To debbo on salake tokkoygo maa, den a walaa fu gacce der hunayeere ne kunaniɗaa am. Amma taa yaaru ton suka am. 9Maccuɗo on watti juunŋo mum hakkune asaale Iburaahiima joomiiko, den o hunii o waɗan ko Iburaahiima ƴami mo o waɗa fu.

10Maccuɗo on sutti jeeloobi sappo caka jeeloobi joomiiko, gam kanko nun jogii kujje booɗɗe ɗe joomiiko woodi fu. O ummii o yawti faa Mesopotamiya, genni Nahori. 11No kiikiiɗe waɗi, wakkati rewɓe wurtotoo gam ƴoogugo diyam, o yottii takkol wanŋarde nen, o jiccini jeeloobi makko, gam ɗi ciwtoo takkol ɓunnu gom.

12Ɗon nun o du'ii o wi'i: Alla laatiiɗo Joomiraawo joomiraawo am Iburaahiima. Mi eelete nun gaɗanaa Iburaahiima moƴƴere, accu mi heɓa hanne ko garumi dartugo. 13Nani mii darii takkol ɓunnu to gati wanŋarde nen wurtoyto gam ƴoogugo diyam. 14Accu gatol ŋol eelanmi diyam mi yara, den ŋol wuuranammi ƴoogirde maggol ŋol wi'ammi: Yaru, mi hokkoran jeeloobi maa bo yara, ŋol laatoo gatol ŋol cuɓanɗaa joomiraawo am Isiyaaku. Den mum mi faaman no a waɗanii joomiraawo am moƴƴere.

15Diga o heennyay batugo ka, Rebeka suka Betuyeeli debbo wurtoy e wakkii faanu diyam mum e walbo. Betuyeeli laati nun suka Milika, debbo Nahori, miiraawo Iburaahiima. 16Rebeka laati nun debbo booɗɗo sanne, o meeɗay annugo gorko bo. O naati der ɓunnu, o ƴoogi faanu diyam makko o hebbini, o wurtii. 17Maccuɗo on doggi taɓɓitii mo, wi'i mo: Mi eelete nun, hokkoram diyam faanu maa seɗɗa mi yara. 18O toontii mo, o wi'i: Jaɓu yaru, joomiraawo am. O yawɗii o rootirii faanu diyam makko, o hokki mo o yari. 19No o hokkidi mo diyam o yari, o wi'i mo: Mi ƴooganan jeeloobi maa bo faa de ɗi jari ɗi ɗonkiti. 20O yawɗii o yuppi diyam faanu makko koriiɗam ɗam der girigiyal jarnirgal, go o doggi o witti to ɓunnu, o ƴoogani jeeloobi ɗin fu. 21Gorko on e darii e daara mo, eɗum haaynii mo. Oo ƴama hoore makko naa Joomiraawo welinan jahaaŋal makko.

22No jeeloobi ɗin yari diyam heennyi, gorko on etti hootande kanŋeeri ne teddugo mum waɗii garaamu jeego'o, o feɗani gatol ŋol e hinere. O etti bo unnuwaaje#24:22 woɓɓe bo e wi'a daluuje ɗiɗi ɗe kanŋeeri tedduni, teddugo unnuwaawo fu waɗii garaamu hewre, o wattani mo e juuɗe. 23O ƴami mo: Aa ɓii moy nun? Sawra batam! Jayri hinaa na'on der wuro baaba maa mi heɓa mi waala? 24O toontii o wi'i: Baaba am woni Betuyeeli suka Milika, debbo Nahori. 25O wi'i kade: Wuro amen, fuɗo e ko mareefuuji nyaamata fu na'on, jayri to waaletee bo na'on. 26Ɗon nun gorko on jiccii yetti Joomiraawo wi'i: 27Yettoore laatanoo Alla Joomiraawwo am Iburaahiima. Mo accay moƴƴango e waɗango joomiraawo am gooŋaaku! Joomiraawo durii am, waddimmi faa to miiraaɓe joomiraawo am. 28Gatol ŋol doggi, yahi fillanii ka himɓe wuro inna mum. 29Rebeka e woodi sakiike noddeteeɗo Labani. Labani on doggi yahi faa to ɓunnu to gorko on woni. 30No o yi'i hootande e unnuwaaje juuɗe sakiike makko, o nani bo ka Rebeka, sakiike makko batunoo e wi'a: Kaa ɗo e kaa ɗo nun gorko on batimmi, o doggi o jaɓɓitii gorko on faa e ɓunnu to o woni e jeeloobi makko. 31No o yottii ton, o wi'i mo: Umma jottoɗen wuro, an mo Joomiraawo barkiɗini! Gam ume go aa darii ladde? Mi moƴƴinanii maa suudu, mi moƴƴinanii bo jeeloobi maa jayri. 32No gorko on yottii wuro, Labani firti dolle jeeloobi ɗin, o hokki ɗi fuɗo e ko nyaametee. Non non bo, o nyeɗi diyam o hokki gorko on e jaadiiɓe mum, gam ɓe caƴƴa koyɗe maɓɓe. 33Ɓaawo mum o yesanaa nafa o nyaama. Amma o wi'i: Mi nyaamataa taw, sey to mi batidii ka goodumi. Ɗon nun Labani wi'i mo: batu!

34Ɗon nun o wi'i: Mi laati nun maccuɗo Iburaahiima. 35Alla Joomiraawo barkiɗinii joomiraawo am puy, go o laatii joom ceede mawɗo. O hokkii mo baali, e na'i, e cardi, e kanŋeeri, e maccuɓe, e horɓe, e jeeloobi, e babbi. 36Saratu deekiiko rimanii mo suka gorko der nayeraaku mum. Go o hokki suka on ko o woodi fu. 37O hunanii am o wi'i: To mi ɓaŋan ɓiyiiko debbo der gati himɓe leydi Kanaana ɓe der leydi mum o jooɗii. 38Amma o wi'i am mi yaha der lenyol makko e to saareeji makko, mi dartana ɓiyiiko debbo. 39Bi'u moo mi: To debbo on salake tokkoygo am bo na? 40O toontii am o wi'i: Joomiraawo mo o juulanta lilaan malaykaajo mum, ɗottan mi gam heɓa jahaaŋal am wooɗa. Den mi ɓaŋanaa ɓiyiiko debbo caka himɓe saareeji makko. 41To a yahii to himɓe saareeji am, go ɓe calii hokkugo maa debbo on, den mum a wurtake gacce hunayeere ne kunaniɗaa am. 42Hanne no jottiimi e ɓunnu, eelumi Alla Joomiraawo Iburaahiima, o welina jahaaŋal am. 43Bi'umi: Mi nani mii darii takkol ɓunnu, gatol burtoytooŋol gam ƴoogugo diyam, den mi wi'a ŋol: Mi eelete nun kokkoraa am diyam mi yara e jollooru gurol maa, 44den o toontoo am o wi'a: Yaru, mi ƴooganan bo jeeloobi maa. Accu o laatoo debbo mo cuɓanɗaa ɓii joomiraawo am. 45Go mi heennya batugo ka der ɓerne am, Rebeka suppitoy e wakkii faanu gurol mum e walbo, o naati e ɓunnu, o ƴoogi diyam. Go eelu moo mi o hokkorammi diyam mi yara. 46O yawɗii o rootirii faanu gurol makko, o wi'i: Yaru, mi ƴooganan bo jeeloobi maa ɗi jara! Jarumi, ɓaawo mum o ƴoogani jeeloobi am bo ɗi jari. 47Ƴamu moo mi, bi'umi: Suka moy nun laatiɗaa? O toontii: Mi laati nun suka Betuyeeli mo Nahori rimdi e Milika. Gattan moo mi hootande e hinere makko, gattumi bo unnuwaaje e juuɗe makko. 48Ɗon nun jiccaniimi Joomiraawo laatiiɗo Alla joomiraawo am Iburaahiima, go jettu moo mi gam o waddii am ɗo e jam, gam mi ɓaŋana Isiyaaku taaniragel miiraawo joomiraawo am. 49Jooni, to oon jiɗi waɗango joomiraawo am moƴƴere e gooŋaaku, batee am, to non non bane bo, batee am mi yawtira nokkun.

50Labani e Betuyeeli toontii wi'i: Haala kaa ɗo ƴiwu nun diga to Joomiraawo. Men baawataa batugo ko wooɗi, naa bo ko halli makka. 51Rebeka nani ɗon yeeso maa, ettu mo yaaru, o laato debbo ɓii joomiraawo maa hande no Alla Joomiraawo batiri ka.

52No maccuɗo Iburaahiima nani ka ɓe bati, o jiccanii Joomiraawo. 53Maccuɗo on sutti kujje gaɗiraaɗe cardi e kanŋeeri e kolte, o hokki ɗe Rebeka. O hokkori sakiike Rebeka e inna mum ko wooɗi. 54Ɓaawo mum, kanko e jaadiiɓe makko, ɓe nyaami, ɓe jari, go ɓe baali ɗon. No ɓe ummii subaka, maccuɗo on wi'i: Accee mi hoota faa to joomiraawo am. 55Sakiike Rebeka e inna mum wi'i: Accu gatol ŋol wonoo e amen baa jaka balɗe sappo, ɓaawo mum a waawan ko hooti. 56O toontii ɓe: To on accee mi ɓooya kade, gam Joomiraawo Alla welinii jahaaŋal am. Tannyee am mi hoota to joomiraawo am. 57Ɗon nun ɓe toontii ɓe bi'i: En noddee gatol ŋol e hoore mum nanen ka o batata. 58Ɓe noddi Rebeka ɓe ƴami mo: A nootake jaadaa e gorko oo ɗoo? O toontii o wi'i: Ee, mi yaadan e makko.

59Ɗon nun ɓe baynii Rebeka sakiike maɓɓe, e korɗo bambunooɗo mo, ɓe jawti e maccuɗo Iburaahiima e jaadiiɓe mum. 60Ɓe barkiɗini Rebeka ɓe bi'i:

An sakiike amen,

Alla laatinee inna lenyi ujuneeje de ujuneeje!

Lenyol sukaaɓe maa

jaaloto wanŋarɗe wayɓe mum.

61Rebeka e horɓe mum ummii waɗɗii jeeloobi, ɓe tokki maccuɗo Iburaahiima, kanko bo o etti Rebeka ɓe jawti.

62Wakkati mum, Isiyaaku warti diga e ɓunnu noddeteeŋol Alla e yi'ammi, o yahi o jooɗii der ladde Negebu yorne. 63Kiikiiɗe gom Isiyaaku wurtii gam woosoo e ladde, o ɓanti gite makko, o yi'i jeeloobi e wara. 64Rebeka bo ɓanti gite mum, yi'i Isiyaaku go jippii diga dow jeelooba mum. 65O ƴami maccuɗo on o wi'i: Gorko moy nun waroyta too diga ladde, e wara fottugo en? Maccuɗo on toontii mo wi'i: Joomiraawo am nun. Ɗon nun o etti suddaare o hoomi hoore makko. 66Maccuɗo on bati Isiyaaku ko waɗi fu. 67Isiyaaku yaari Rebeka der bukaaru Saratu inniiko. O etti Rebeka o laatii deekiiko, o yiɗi mo sanne. Non non Isiyaaku ɓerne mum deƴƴitiri ɓaawo maayde inniiko.

Currently Selected:

Fuɗɗoode 24: BFB

Highlight

Copy