Daniyel 6
6
1No Belisasaa waraa, Dariyusu Mediyankeejo laamii. O woodu nun duuɓi lasoy tati e ɗiɗi (62) go o laamii.
No wayɓe jammorii Daniyel
2Dariyusu suɓi himɓe hewre e laso (120) ɓe ardanoo becce leydi mum. 3O suɓani ɓe mawɓe tato ɓe ɓe jottinta golle maɓɓe gam to laamiiɗo dullu goɗɗum der keɓal leydi mum. Daniyel e tawaa der himɓe tato ɓen. 4Oo ɓuri ɗiɗo horiiɓe e himɓe hewre e laso (120) ɓen annal, gam sabbu ruuhu kayniiŋu ŋu o woodi. Go laamiiɗo e yiɗi ardina mo der leydi mum nin fu. 5Go mawɓe ɗiɗo horiiɓe ɓen e ardaniiɓe becce leydi ɓen fu darti laawol no gaccortoo mo dow ko yaalani laamu ŋun. Amma ɓe keɓay gacce gom naa bo boofol gom no ɓe gaccortoo mo, gam o laati nun gooŋaajo. Goɗɗo waawataa wi'a oo fijira golle makko, goɗɗo tawataa to o waɗi boofol der majje. 6Go ɓe bi'i: En keɓataa fu no gaccortoɗen mo to hinaa der no o jaggorantoo Alla makko.
7Go ɓe ummii ɗon maa ɗon ɓe jahi to laamiiɗo, ɓe bi'i: Dariyusu laamiiɗo, Alla acca balɗe maa juuta. 8Menen mawɓe leydi nin, e suuɗooɓe jawdi laamorde, e ardaniiɓe becce leydi, e saawariiɓe maa, e doogariiɓe maa, men fu men dawrii men bi'i haanu nun an laamiiɗo desaa sariya, piinaa bi'a ɗoo e balɗe laso e sappo (30), an tan nun haani neɗɗo fu sujidana. Caafuɗo tooruure gom, naa bo cujidanɗo neɗɗo gom der balɗe ɗen, sey wattee der gayka to jagge maraa. 9Laamiiɗo, men eelete nun acca sariya kan winnee gattaa juunŋo, piinaa ka gam to goɗɗo waylitin ka. Gam der tawaaŋal men enen Mediyankeeɓe e Persiyankeeɓe sariya desaaka waylitintaake. 10Go sariya kan winnaa, go Dariyusu laamiiɗo watti juunŋo.
No Daniyel wattiraa der gayka to jagge maraa
11No Daniyel nani no laamiiɗo wattii sariya kan juunŋo, ummii hooti naatoy suudu mum gonuŋol faa dow. Fenentiiji suudu makko ŋol e daari far to *Urusaliima. O jiccii de tati o eeli Alla makko hande no o woowirnoo waɗugo nyalaane fu. 12Ɗon maa ɗon wayɓe makko ummoy wari tawi mo der suudu makko ɗon oo du'oo, oo eela Alla makko. 13Go ɓe jahi to laamiiɗo gam ɓe ciwtora mo sariya desaaka kan, ɓe bi'i: Laamiiɗo, an nun watti sariya juunŋo, bi'uɗaa ɗo e balɗe laso e sappo (30), an tan nun haani neɗɗo fu sujidana? An nun wi'i caafuɗo tooruure gom, naa bo sujidani neɗɗo gom der balɗe ɗen sey wattee der gayka to jagge maraa. Laamiiɗo toontii ɓe wi'i: Gooŋa nun non ka wa'i. Sariya men enen Mediyankeeɓe e Persiyankeeɓe waylitintaako. 14Go ɓe etti kade haala, ɓe bi'i laamiiɗo: Daniyel tawaaɗo der himɓe nanŋaaɓe maccuŋaaku diga leydi Yahuuda teddinay maa. O golliray sariya ka gattuɗaa juunŋo kan. Nyalaane fu, o du'oto nun oo eela Alla makko faa de tati.
15No laamiiɗo nani ka, ɓannu mum waati. O yanti oo darta laabi no o daɗinirta Daniyel faa naaŋe yani. 16Amma wayɓe Daniyel ɓen wittoy kade wi'i laamiiɗo: Laamiiɗo an e hoore maa aa anni no der tawaaŋal men enen Mediyankeeɓe e Persiyankeeɓe, to goɗɗum haɗaama, naa bo to laamiiɗo yesii sariya, watti ka juunŋo, goɗɗum mum waylitintaake. 17Go laamiiɗo wi'i Daniyel ettee wattee der gayka to jagge maraa ton. Ɓaawo mum, laamiiɗo wi'i Daniyel: Alla maa mo gollantoɗaa wakkati fu on hisine.
18Go hayre mawne tallaa waddaa ommiraa hunnuko gayka kan. Laamiiɗo takki lamba mum e lamba gollooɓe mum mawɓe ɓen e mayre, gam to goɗɗo hisin Daniyel. 19Ɓaawo mum, laamiiɗo witti laamorde mum, salii hirtaago. O salii debbo makko gom wara waalida e makko. O waali o ɗaanaaki.
Daniyel wurtake e jam diga der gayka to jagge maraa
20No weeti, laamiiɗo dawi diga subaka kecco, yawɗii, yahi to gayka ton. 21No o faanii gayka kan, o noddi Daniyel e yurumeene, o wi'i: Daniyel maccuɗo Alla mo yonki, Alla maa mo gollantoɗaa wakkati fu on hisinii maa jagge ɗen? 22Daniyel toontii mo wi'i: Laamiiɗo, Alla acca balɗe maa juuta. 23Alla am liloy malaykaajo mum wari muɓɓi kunnuɗe jagge ɗen. Ɗe gaɗay am goɗɗum gam mi walaa fu gacce gom yeeso makko, mi waɗanay maa fu bo ko halli gom. 24Go belɗum waɗi laamiiɗo sanne. O wi'i Daniyel wurtinee diga der gayka ton. Daniyel wurtinaa, go ɓe tawi o walaa fu nawnande gom, gam o hoolake Alla makko. 25Go laamiiɗo wi'i himɓe gaccinooɓe Daniyel ɓen happee waddee. Ɓe kappaa ɓe gattaa der gayka kan, kamɓe e rewɓe maɓɓe e sukaaɓe maɓɓe. Diga ɓe jottaaki der gayka kan, jagge ɗen gattii ɓe, ƴakki ɓe, pusi ƴi'e maɓɓe.
26Ɓaawo mum, Dariyusu laamiiɗo winni ɗereeji liddi ɗi lenyi, e leyɗe, e ɗelle duuniyaaru fu. O wi'i:
Alla hokka on jam faa e baadey.
27Nani ɗo sariya ka desumi: Tawaaɗo der leydi am fu, sey hula Alla Daniyel, ɗowtanoo mo.
Kanko woni Alla mo yonki,
o tabiti nun faa e baadey.
O laati nun laamiiɗo faa e baadey,
laamaare makko heennyataa sam.
28Kanko woni paabotooɗo e Kisinoowo.
Oo waɗa kujje kulniiɗe e kayniiɗe dow kammu e ley leydi ɗo.
Kanko teeti Daniyel diga e kunnuɗe jagge.
29Daniyel laatake neɗɗo mawɗo der laamaare Dariyusu e der laamaare Koresi Persiyankeejo.
Currently Selected:
Daniyel 6: BFB
Highlight
Share
Copy
Want to have your highlights saved across all your devices? Sign up or sign in
Bible Fulfulde Bénin © SIM International 2015, 2024.
