Golle Lilaaɓe 14

Pol e Barnabasi der siire Ikoniya

1Der siire Ikoniya bo Pol e Barnabasi naati der waajorde *Yahuduuɓe, ɓe baajii faa *Yahuduuɓe, eɓe lenyi janani ɗuuɓɓe laatii goonɗinɓe. 2Amma *Yahuduuɓe woɓɓe saliiɓe goonɗingo ummini hakkillo ɓe lenyi janani, laawi ɓerɗe maɓɓe gam ɓe banya goonɗinɓe. 3Ɗum ɗon haɗay Pol e Barnabasi ɓooyugo ton. Ɓe baajake e cuusal gam hoolaare maɓɓe e woni dow Joomiraawo kokkuɗo ɓe baawɗe waɗugo haaynaareeji e kaayeefiiji diga e juuɗe maɓɓe. Non non o hollitiri ka ɓe baajotoo dow moƴƴere makko, gooŋa nun. 4Himɓe wanŋarde nen seenniri: Woɓɓe darii ɓaawo *Yahuduuɓe, woɓɓe bo daranii lilaaɓe.

5Den *Yahuduuɓe e ɓe lenyi janani e ardiiɓe mum dawri toora ɓe, den faɗɗa ɓe kaaƴe wara. 6No ɓe paami ka, ɓe doggi ɓe cuuɗoy far Lisitira e Derbe, ci'e leydi Ikoniya, e ko filfitii ɗe, 7ɓee baajoo ton *linjiila.

Pol e Barnabasi der siire Lisitira

8Gorko gom, dimdaaɗo moofaaku e wonnoo Lisitira. Diga o rimaa, o meeɗay yahugo. 9Oo hettinii waaju Pol. Pol tiggi mo gite, yi'i goonɗinki makko fotii ko nyawti mo. 10O bati dow dow, o wi'i: «Umma, dara e koyɗe maa!» Gorko on fitti, darii, e yaha. 11No jama'aare yi'i ko Pol waɗi, ɓe bati dow e likoniyankeere, ɓe bi'i: «Tooruuje nadduɗe e himɓe, warii caka meeɗen!»

12Ɓe innitiri Barnabasi ‹Jewusu›, Pol bo ‹Hermesi›, gam kanko wonnoo batoowo#14:12 Der diina Yunaninkeeɓe Jewusu woni hooreejo tooruuje, Hermesi bo lilaaɗo majje.. 13Suudu tooruure noddeteene Jewusu e wonnoo takkol dammugal wanŋarde, *Liimaamiijo mayre waddi ga'i e pinni takkol dammuɗe suudu mayre. Oo yiɗuno waɗango Barnabasi e Pol sadaka, kanko e jama'aare. 14Amma no lilaaɓe ɓen nani ɗum, ɓe cerkiti gineeji maɓɓe, ɓe doggi ɓe jahi to jama'aare ɓee bata dow dow. 15Ɓee bi'a: «Onon banniraaɓe, gam ume go oon gaɗa ɗum ɗo? Menen bo men himɓe nun hande mooɗon. Emen baajoo on *linjiila gam tuubon, accon gaɗuuji mon baanjaaji, bittoon to Alla buuruɗo, taguɗo kammu, e leydi e maayo e ko woni der muuɗum fu. 16E jaamanuuji jawtuɗi o accii himɓe fu e tokki laabi muuɗum. 17Amma o accay, waɗango on ko wooɗi, oo toɓinana on yoone diga dow. Oo hokka on dugge geete der wakkatiiji mum. Oo hokka on nyaamdu e belɗum ɓerɗe.»

18Baa no ɓe bati kaa ɗon fu, no boniri nun ɓe kaɗiri jama'aare waɗango ɓe sadaka.

19Ɓaawo mum *Yahuduuɓe woɓɓe ƴiwoy Antiyokiya e Ikoniya. Ɓe ummini hakkillooji jama'aare, ɓe paɗɗi Pol kaaƴe, ɓe daasi ɓe burtini siire, gam ɓee miili o maayii. 20Amma no goonɗinɓe wari, filfitii mo, o ummii, o naati der siire. Fini mum, o yaadi e Barnabasi siire bi'eteene Derbe.

Pol e Barnabasi wittii Antiyokiya der leydi Siriya

21Pol e Barnabasi waajii siire Derbe ton *linjiila, ɓe keɓi goonɗinɓe ɗuuɓɓe. Ɓaawo muuɗum ɓe bitti Lisitira e Ikoniya, e Antiyokiya, 22ɓee cemmiɗina ɓerɗe goonɗinɓe, ɓe baajii ɓe ɓe daroo der goonɗinki, ɓe bi'i: «Sey e tooraaji ɗuuɗɗi naatirten Laamaare Alla.»

23Eklesiya fu, ɓe cuɓanii ɗum *dottiiɓe, ɓe du'ii, ɓe cuumii, ɓe kalfini ɓe Joomiraawo mo ɓe goonɗini.

24Ɓe jawti ɓe paltii Pisidiya, ɓe jottii Panfiliya. 25Ɓe baajii der siire Perge. Ɓaawo muuɗum ɓe jottii Attaliya. 26Ton ɓe naati laana diyam, ɓe bitti Antiyokiya der leydi Siriya, to himɓe eelani ɓe moƴƴere Alla gam golle ɗe ɓe heennyi jooni.

27No ɓe jottii, ɓe kawriti eklesiya, ɓe bati ɓe ko Alla waɗi diga e maɓɓe fu, e no o waɗirani lenyi janani laawol ɗi goonɗina. 28Pol e Barnabasi gondi e goonɗinɓe Antiyokiya faa ɓooyi.

Currently Selected:

Golle Lilaaɓe 14: BFB

Highlight

Copy