SAAMUNƆ 73
73
Zaakɛrinↄ nnamana
Asafa lɛ̀.
1Luda è yã maaa kɛ Isarailinↄnɛ yãpuramɛ,
atɛ̃nsa nↄ̀sɛpuradeenↄ.
2Mapi sↄ̃, ma kĩi kũ̀ lɛɛnao,
ma gbá yezi à satamɛ yã.
3Kɛ̀ ma zaakɛrinↄ kuuna maaa è,
ma ĩadãri pìnↄ gwena ni dɛ̀.
4Yãke è kpáńnɛro,
aafia mↄ̀ḿma bensↄ̃ aↄ̃ↄ mɛ̀kpana.
5Aↄ̃è nawɛ̃a kɛ lán danↄ bàro,
aↄ̃è gyãa kɛ lán danↄ bàro.
6Aↄ̃è ĩadãna da ń waalɛ lán kãmbɛɛ bà,
aↄ̃è pãsĩkɛɛ da pↄ́kãsãa ũ.
7Aↄ̃ swɛ̃̀ kɛ̀ gbãa yãzaakɛnao,
yã vãi ń nↄ̀sɛ pà.
8Aↄ̃è gbɛ̃ lalandi kɛ aↄ̃è yã zaaa liḿma,
aↄ̃è gbãaa mↄ́ńnɛ ń gwena bítakɛɛ yãnzi.
9Aↄ̃è be: Luda pita wà ↄsi ká,
bensↄ̃ aↄ̃ yã bé è ble anduna guu.
10Bee yãnzi wè tá ń kpa,
wè yã kɛ̀ aↄ̃ↄ ò píngi sí yãpuraa ũ.
11Aↄ̃è be: Luda é kɛ dɛa à dↄ̃ↄ?
Luda Musude dↄ̃na kà lɛn yↄ́?
12Ǹ gwa, zaakɛrinↄ è yãke kã̀hãn kɛro,
aↄ̃ gwena ègↄ̃ kaara gurↄ píngimɛ.
13Ase ma nↄ̀sɛ pura pãn yↄ́?
Ma a ↄↄ bↄ̀ɛ taarin wásawasa pãmɛↄ́?
14Nɛɛ̀gↄ̃ ma gbɛ̃ɛ gurↄ píngi,
nɛɛ̀gↄ̃ ma swã sukãamɛ lán guu e dↄↄ nà.
15Tó ma zɛ kↄ̃n yã beee taka onao,
bee égↄ̃ dɛ bↄna n gbɛ̃nↄ kpɛɛ yã ũmɛ.
16Kɛ̀ ma laasuu lɛ̀ yã pìzi mà e mà dↄ̃,
à kɛ̀mɛ zĩ'ũ.
17Sé kɛ̀ ma gɛ̃ Luda kúkiin,
ben ma wɛ́ɛ gbasa à kɛ̃̀ lán aↄ̃é yãa nà.
18N ń kpá guzãɛa yãpura,
nɛɛ̀ ↄ sↄ̃ńzi aↄ̃ lɛ́ɛ wà kaatɛ.
19Aↄ̃è gↄ̃ kaatɛna pↄ́ ũ kãndo,
vĩapↄnↄ è ń le aↄ̃ yãao.
20Lán nanaa è gɛ̃ ĩa nà tó gbɛ̃ vù,
tó n fɛɛ Dii, ǹ tó aↄ̃ gɛ̃ ĩa lɛ.
21Kɛ̀ ma nↄ̀sɛ yàka,
bensↄ̃ ma pↄↄ sia kũ̀,
22ma kɛ yↄ̃nkↄ, má yãke dↄ̃ro,
ma gↄ̃nnɛ lán nↄ̀bↄsɛ̃tɛ bà.
23Baa kↄ̃n beeeo mɛɛ̀gↄ̃ kúnyo,
ń ma kũna ma ↄplaaa.
24Nɛɛ̀ dↄmɛ aɛ kↄ̃n n lɛ́dammanao,
nɛ́ yãa ǹ ma sí ai n gakui guu.
25N baasiro, dén ma wɛ́ɛ dↄzi musuu?
N baasiro pↄ́ke nii e ma dɛ anduna guuro.
26Baa tó ma mɛ̀ kↄ̃n ma swɛ̃̀o e yãaa,
Ludan ma swɛ̃̀ gbãa'ekii ũ,
àmbe ma baka ũ gurↄ píngi.
27Gbɛ̃ kɛ̀ aↄ̃ kɛ̃̀mmaanↄ é mì dɛ,
nɛ́ gbɛ̃ kɛ̀ aↄ̃ bↄ̀ n kpɛɛnↄ kaatɛ.
28Luda, ma sↄ̃nzina bé à kɛ̀mɛ nna,
Dii Luda, ma n kɛ ma utɛkii ũ,
mɛ́ n yãkɛnanↄ tↄ̃kɛ̃ńnɛ.
Currently Selected:
SAAMUNƆ 73: BBB
Highlight
Copy
Compare
Share
Want to have your highlights saved across all your devices? Sign up or sign in
Bokobaru Bible with New Testament and OT Portions © Sim International, 2005.
