SAAMUNƆ 143
143
Kuuna ibɛɛnↄ ↄzĩ aduakɛna
Dauda lɛ̀.
1Dii, ǹ ma aduakɛna sí,
ǹ swã kpá ma wɛ̃nda wiiizi,
ǹ wemala n náanɛ kↄ̃n n maaao yãnzi.
2Ǹton yãkpaɛ kɛ kↄ̃n mamↄma n zↄ̀blerioro,
zaakɛ gbɛ̃kee taari sai n kiiaro.
3Ma ibɛɛ pɛ̀ɛma à ma nɛ,
à tò má kú gusiaan
lán gbɛ̃ kɛ̀ gà zaa gìkɛna bà.
4Ben ma nↄ̀sɛ yàka búgubugu,
ma kã gà.
5Yã ziziinↄ dↄ̀magu,
mɛɛ̀ laasuu lɛ́ n zĩkɛnanↄa,
mɛɛ̀ n yãkɛnanↄ wàari pá.
6Ma a ↄↄ dↄnzi,
mɛɛ̀ n ni dɛɛ lán gukori è í ni dɛ nà.
7Ǹ wemala kpakpaa Dii,
ma yɛ̃̀ɛ vĩ dↄro.
Ǹton mìkpɛɛ zumɛro,
lɛ màton gↄ̃ lán gbɛ̃ kɛ̀ aↄ̃ sì gɛ̀wãannↄ bàro.
8Ǹ n gbɛ̃kɛɛ ↄdↄamɛ kↄngↄ,
zaakɛ ḿbe má n náanɛ vĩ.
Ǹ ma da zɛ́ kɛ̀ dɛ mà sɛ́a,
zaakɛ ḿbe ma swɛ̃̀ tà n kiia.
9Ǹ ma sí ma ibɛɛnↄa, Dii,
ḿbe ma nanzi.
10Ḿbe ma Luda ũ,
ǹ n pↄyeziyã damɛ.
Ǹ tó n Nini maaa dↄmɛ aɛ gusararaan.
11Ǹ ma wɛ̃̀ndi dãkpa n tↄ́ yãnzi, Dii,
ǹ ma bↄ yã'ↄ̃amma guu n maaa yãnzi.
12Ǹ ma ibɛɛnↄ kaatɛ n gbɛ̃kɛɛ yãnzi,
ǹ ma zangurinↄ dɛdɛ ń píngi,
zaakɛ n zↄ̀blerin ma ũ.
Currently Selected:
SAAMUNƆ 143: BBB
Highlight
Copy
Compare
Share
Want to have your highlights saved across all your devices? Sign up or sign in
Bokobaru Bible with New Testament and OT Portions © Sim International, 2005.
