SAAMUNƆ 105
105
Luda a gbɛ̃nↄ mìsina
1À Dii sáabu kɛ à à tↄ́ kpá,
à tó boriinↄ à yãkɛnanↄ dↄ̃.
2À lɛ̀ sí à à táaki lɛ́,
à à yãbↄnsaɛkɛnanↄ tↄ̃kɛ̃ píngi.
3À ĩa dã kↄ̃n Dii tↄ́ kɛ̀ kú adonao,
a Dii kiwɛtɛrinↄ à pↄnnaa kɛ,
4À Dii kii wɛtɛ à gbãaa wɛ́ɛ kɛa,
àgↄ̃ à uu wɛtɛɛ yãana sai.
5À tó yãbↄnsaɛ kɛ̀ à kɛ̀nↄ dↄagu,
à dabuyãkɛnanↄ kↄ̃n à yãkpaɛkɛnanↄo,
6a Dii zↄ̀bleri Ibraĩ boriinↄ,
a Yakubu borii kɛ̀ à a sɛɛnↄ.
7Àmbe Dii wa Luda ũ,
à yãkpaɛkɛna kú anduna guu píngi.
8À bà kuunawao yã è sãn zikiro,
yã kɛ̀ à dìɛ égↄ̃ kuu ai wa boriia.
9À bà kú kↄ̃n Ibraĩo,
à ɛ̀ara à sì kↄ̃n a kuunao Isaakunɛ dↄ.
10À yã pì pàpa Yakubunɛ dokayã ũ,
ben à kú kↄ̃n Isarailinↄo ai gurↄ píngi.
11À bè é Kanaa bùsu kpáḿma,
eégↄ̃ dɛ ń baka ũ kɛ̀ aↄ̃gↄ̃ vĩ.
12Gurↄↄ beeea aↄ̃ↄ pariro, wè ń yã daro,
aↄ̃ↄ kú Kanaa bùsun bↄ̀amↄnↄ ũmɛ.
13Aↄ̃ègↄ̃ likↄ̃aa zↄ̃ↄ bori kↄ̃n boriionↄ tɛ́,
aↄ̃ègↄ̃ lili oo bùsu kↄ̃n bùsuo.
14Èe we wà gbãaa mↄ̀ńnɛro,
à kpã̀kɛ̃ kínanↄzi aↄ̃ yã musu à bè,
15aↄ̃ton ↄ na gbɛ̃ kɛ̀ a ń sɛ́nↄaro,
aↄ̃ton wɛ́ɛ tã a annabinↄaro.
16Ben à tò nↄaa gɛ̃̀ bùsu pìn,
à tò aↄ̃ kũsãɛ yã̀a píngi.
17Ben à Yusufu gbàrɛ à dↄ̀ńnɛ ń aɛ,
wà à yà zↄ̀ ũ.
18Wà mↄ̀kyakoo kà à gbáa,
wà mↄ̀ dà à waalɛ
19ai yã kɛ̀ à gĩakɛ à ò gàa à pàpao,
ben yã kɛ̀ Dii dànɛ tò yã bↄ̀o nna.
20Kɛ̀ kína gbɛ̃ zĩ̀, ben wà à gbàrɛ,
bùsu gbɛ̃nsi pì à bↄ̀ bàn.
21À à dìɛ a bùsu dↄn'aɛdee ũ,
à tò à iko vĩ a auzikinↄa píngi.
22Yusufu à kínɛnↄ tòto a pↄyezia,
à ↄ̃ndↄ̃ↄ dàda à ìbanↄnɛ.
23Ben Yakubu sù Igipiti,
Isarailinↄↄ kuu nibↄnↄ ũ Hamu boriinↄ bùsun.
24Dii tò a gbɛ̃nↄ kↄ̃̀ gwe maamaa,
à tò aↄ̃ pari kũ̀ dɛ ń ibɛɛnↄla.
25À ń ibɛɛ pìnↄ swã gbã̀gbãńnɛ,
ben aↄ̃ zà à gbɛ̃nↄn, aↄ̃ ↄ̃ndↄ̃ↄ kɛ̀ à zↄ̀blerinↄzi.
26À a zↄ̀bleri Musa zĩ̀ḿma
kↄ̃n Aruna kɛ̀ à à sɛ̀o.
27Aↄ̃ dabudabuyãnↄ kɛ̀ Igipitinↄnɛ,
aↄ̃ yãbↄnsaɛnↄ kɛ̀ Hamu boriinↄ bùsun.
28À gusiaa gbàrɛḿma, guu sì ń bùsun,
kɛ̀ aↄ̃ gì à yã mazi yãnzi.
29À ń ínↄ lì aru ũ,
ben ń kpↄ̀nↄ gàga.
30Kasoonↄ dà ń bùsula
kↄ̃n ń gbãadeenↄ daɛkiinↄ píngi.
31À yã ò, ben ifĩinↄ dàńla,
gãinↄ sì ń tɛ́ ai aↄ̃ bùsu lɛ́n píngi.
32À lougbɛ kwɛ̀ɛńnɛ lou gɛ̃ɛ ũ,
lapatana dà ń bùsula píngi.
33À ń geepi línↄ ɛ̀'ɛ kↄ̃n ń kãkãpura línↄ,
à ń bùsu línↄ kɛ̀ dúgudugu.
34À yã ò, ben kwaanↄ kàńgu,
sutɛ̃nↄ kà aↄ̃ lɛ́ vĩro.
35Aↄ̃ ń bùsu sɛ̃̀ kↄ̃n láo blè wà nɛ̀,
aↄ̃ ń burapↄnↄ blè píngi.
36À ń bùsu daudunↄ dɛ̀dɛ ń píngi,
ń nɛ́ daudu kɛ̀ aↄ̃ↄ ì ń ↄ̀wazikɛgurↄↄnↄ.
37À bↄ̀ kↄ̃n Isarailinↄ,
aↄ̃ kondogi kↄ̃n vurao sɛna,
aↄ̃ bori gbɛ̃kee e gɛ̃̀n sí zɛ́nlo.
38Kɛ̀ aↄ̃ bↄ̀ɛ, Igipitinↄ pↄↄ kɛ̀ nna,
kɛ̀ vĩa ń kũ Isarailinↄ yã musu.
39À tɛ́luguu dà a gbɛ̃nↄla,
à kɛ̀ tɛ́ ũ gwãavĩ à guu pùńnɛ.
40Aↄ̃ wɛ́ɛ kɛ̀a, ben à mↄ̀ńnɛ kↄ̃n bùrunↄ,
à musu pↄ́blee kpàḿma, aↄ̃ mↄ̀ḿma.
41À gbɛ̀si pàra, ben í bↄ̀n,
í bàa lɛ̀ gbáan gwe lán swa'i bà.
42Zaakɛ à dↄ̀ lɛ́ kɛ̀ à gbɛ̃̀
a zↄ̀bleri Ibraĩnɛ yãn.
43À bↄ̀ kↄ̃n a gbɛ̃nↄ, aↄ̃ↄe pↄnnaa kɛɛ,
gbɛ̃ kɛ̀ à ń sɛ́nↄↄ e guda kɛɛ.
44À boriinↄ bùsu kpàḿma,
aↄ̃ zĩi kɛ̀ danↄ kɛ̀ àre blè,
45lɛ aↄ̃ e wàgↄ̃ à yãdiɛnanↄ kũna,
aↄ̃ à dokayãnↄ da.
Aleluya!
Currently Selected:
SAAMUNƆ 105: BBB
Highlight
Copy
Compare
Share
Want to have your highlights saved across all your devices? Sign up or sign in
Bokobaru Bible with New Testament and OT Portions © Sim International, 2005.
