MATIU 22

Nↄsɛ pↄnnakɛna

(Luk 14:15-24)

1Yesu ɛ̀ara à yã lɛ̀kↄ̃zińnɛ à bè: 2Lán kpata kɛ̀ bↄ̀ Luda kiia dɛ nàn yɛ̀ dↄ. Kína ke bé èe nↄsɛ pↄnnaa kɛɛ a nɛ́nɛ, 3ben à a zĩ̀rinↄ zĩ̀ aↄ̃ o gbɛ̃ kɛ̀ à ń sísi aↄ̃ mↄ́ pↄ́ bleenↄnɛ aↄ̃ mↄ́, mↄde aↄ̃ↄ yezi wà mↄ́ro. 4Ben à ɛ̀ara à zĩ̀ri pãndenↄ zĩ̀ à bèńnɛ: À gá à o gbɛ̃ kɛ̀ ma ń sísinↄnɛ ma sorumi mà, ma zùswareenↄ kↄ̃n pↄ́kãde mɛ̀kpananↄ dɛ̀ má kɛ̀kɛ kↄ̀. Aↄ̃ mↄ́ nↄsɛpↄblekiia. 5Ben aↄ̃ↄe làakari dↄ yã pìaro, aↄ̃ baade gàa a bↄkↄ̃tɛ kɛ̀. Gbɛ̃kenↄ gàa ń bura, gbɛ̃kenↄ gàa laa tá. 6Gbɛ̃ kpaaanↄ zĩ̀ri pìnↄ kũ̀kũ, aↄ̃ wí dàḿma, aↄ̃ ń dɛ́dɛ. 7Ben kína pì pↄ fɛ̃̀ à a sozanↄ gbàrɛ, aↄ̃ gàa wà gbɛ̃dɛri pìnↄ dɛ̀dɛ, ben aↄ̃ tɛ́ sↄ̃̀ ń wɛ́tɛa. 8Ben kína pì bè a zĩ̀rinↄnɛ: Nↄsɛpↄblee mà, mↄde gbɛ̃ kɛ̀ ma ń sísinↄↄ e kↄ̃ síoro. 9À gá zɛ́ↄ̃nkpakↄ̃anↄ guu, à gbɛ̃ kɛ̀ á è píngi sísi nↄsɛpↄbleea. 10Ben zĩ̀ri pìnↄ fɛ̀ɛ wà gàa zɛ́nↄ guu, aↄ̃ gbɛ̃ kɛ̀ aↄ̃ ń énↄ kàkↄ̃a, gbɛ̃ zaaanↄ kↄ̃n gbɛ̃ maaanↄ ń píngi. Lɛn nↄsɛ pↄnnakɛrinↄ guu pà lɛ.

11Kɛ̀ kína pì gɛ̃̀ à pↄnnakɛri pìnↄ gwa, à gↄ̃gbɛ̃ ke è gwe, à nↄsɛ pↄnna uta danaro, 12ben à bènɛ: Ma gbɛ̃, à kɛ̀ dia n gɛ̃ kɛ̀ nↄsɛ pↄnna uta dasaii? Ben à yĩtɛna kítikiti. 13Ben kína bè a dogarinↄnɛ: À à ↄↄnↄ yi kↄ̃n à gbánↄ, à à zu bàazi gusiaan. Gwen weé ↄ́ↄ dↄn wà ↄ di ń musu. 14Zaakɛ gbɛ̃ kɛ̀ Luda ń sísinↄↄ pari, mↄde gbɛ̃ kɛ̀ à ń sɛ́nↄↄ pariro.

Bɛ'ↄↄkpana Sizaa yã

(Maa 12:13-17, Luk 20:20-26)

15Beee gbɛran Farisinↄ bↄ̀ wà gàa wà yã gↄ̃̀gↄ̃ lán aↄ̃é kɛ nà aↄ̃ Yesu kũ a yã'ona guu. 16Ben aↄ̃ ń ìbanↄ zĩ̀a kↄ̃n Hɛrↄdu gbɛ̃nↄ aↄ̃ bè: Dannɛri, wá dↄ̃ kɛ̀ gbɛ̃ yãpuradeen n ũ. Nɛɛ̀ Luda zɛ́ dańnɛ súusu, nɛɛ̀ gbɛ̃ wɛ́ɛ gwaro, nɛɛ̀ gbɛ̃ gwena gwaro. 17Lán ń è nà ǹ owe. À zɛ́ vĩ wà bɛ'ↄↄ kpá Sizaaↄ́, ke à zɛ́ vĩro? 18Yesu ń nↄ̀sɛ zaaa dↄ̃̀ḿma, ben à bè: Mↄnafikideenↄ! Bↄ́yãnzin ée ma yↄ̃ↄ ée gwaazi? 19À ↄↄ kɛ̀ wè bɛ'ↄↄ kpáo ↄdↄamɛ. Ben aↄ̃ ↄↄ pì doo kpàa. 20Ben à ń lá à bè: Dé mì wɛ̃zãn yɛ̀ kↄ̃n à tↄ́o? 21Aↄ̃ wèàla wà bè: Siza pↄ́mɛ. Ben à bèńnɛ: Ɛ̃ndɛ̃ à pↄ́ kɛ̀ dɛ Siza pↄ́ ũ kpá Sizaa, é pↄ́ kɛ̀ dɛ Luda pↄ́ ũ kpá Ludaa. 22Kɛ̀ aↄ̃ yã pì mà, à bↄ̀ ń saɛ, ben aↄ̃ tà wà à tò gwe.

Gɛ̀nↄ fɛɛna yã

(Maa 12:18-27, Luk 20:27-40)

23Gurↄ dↄ̃nkↄ̃ pì zĩ Sadusi kɛ̀ aↄ̃è be gɛ̀nↄ è fɛɛroonↄ mↄ̀ Yesu kiia, ben aↄ̃ à gbèka wà bè: 24Dannɛri, Musa òwe tó gↄ̃gbɛ̃ gà nɛ́'isai, à dãaro a vĩ̀i gyaanↄↄ sɛ́, lɛ à nɛ́ borii dato a vĩ̀inɛ. 25Tↄ̀. Dedↄ̃nkↄ̃deenↄↄ kú wa tɛ́ yã gↄ̃ↄn swɛɛplaa. Woru nↄↄ sɛ̀, ben à gà à nↄↄ pì tò nɛ́'isai, ben gyaanↄↄ gↄ̃̀ Sabinɛ. 26À kɛ̀ Sabinɛ lɛ dↄ kↄ̃n Biↄo ai à gàa pɛ́ ń swɛɛplaadeea. 27Aↄ̃ píngi gbɛran nↄↄ pì gà se. 28Tↄ̀! Gɛ̀nↄ fɛɛgurↄↄ zĩ aↄ̃ gↄ̃ↄn swɛɛplaaa pìnↄ tɛ́, dé bé eégↄ̃ nↄↄ pì vĩi? Zaakɛ ń píngi aↄ̃ à dↄ̃̀ nↄↄ ũ. 29Ben Yesu wèńla à bè: A sãsã a Luda takada kↄ̃n à gbãaao dↄ̃sai yãnzi. 30Tó gɛ̀nↄ fɛ̀ɛ, aↄ̃é nↄↄ sɛ́ro, aↄ̃é zã kɛro, weégↄ̃ kuu lán malaikanↄↄ kuu nà ludambɛmɛ. 31Gɛ̀nↄ fɛɛna yã musu ée yã kɛ̀ Ludaa òare kyó kɛroo? À bè, 32ambe Ibraĩ kↄ̃n Isaakuo kↄ̃n Yakubuo Luda ũ. Luda è kɛ gɛ̀nↄ Luda ũro, gbɛ̃ bɛ̃ɛnↄ Ludamɛ. 33Kɛ̀ gbɛ̃nↄ yã pì mà, à yãdannɛna bↄ̀ ń saɛ.

Dokayã kɛ̀ dɛńlaa

(Maa 12:28-34, Luk 10:25-28)

34Kɛ̀ Farisinↄↄ mà Yesu Sadusinↄ fù, aↄ̃ kàkↄ̃a. 35Ben aↄ̃ dokadↄ̃rinↄ doke à yↄ̃̀ à gwa, à à là à bè: 36Dannɛri, dokayã kparee bé à dɛ a kpaaanↄlaa? 37Yesu wèàla à bè: Ǹgↄ̃ ye Dii n Ludazi kↄ̃n nↄ̀sɛo do kↄ̃n n niniio píngi kↄ̃n n laasuuo píngi. 38Dokayã kɛ̀ à bɛ̀ɛ vĩ dɛ a kpaaanↄlaan gwe. 39À plaadee kɛ̀ bↄ̀kↄ̃baon yɛ̀: Ǹgↄ̃ ye n gbɛ̃daaazi lán n zĩnda wɛ̃̀ndi bà. 40Musa doka píngi kↄ̃n annabinↄ yão logona dokayã mɛ̀n plaaa kɛ̀nↄamɛ.

Mɛsaya bori yã

(Maa 12:35-37, Luk 20:41-44)

41Lán Farisinↄ kakↄ̃ana nà, Yesu ń lá à bè: 42Á è dia Mɛsaya yã musuu? Dé boriin à ũu? Aↄ̃ wèàla wà bè: Dauda boriimɛ. 43Ben Yesu bèńnɛ: À kɛ̀ dia Luda Nini dìdi Daudaa, ben Dauda Mɛsaya sìsi Diii? À bè,

44Dii bè ma diinɛ à vɛ̃ɛ a ↄplaazi

ai àgↄ̃ à ibɛɛnↄ káɛnɛ a gbá gĩzĩ.

45Kɛ̀ Dauda bènɛ Dii, à kɛ̀ dia eégↄ̃ dɛ à borii ũ dↄↄ? 46Gbɛ̃kee e fↄ̃ à wèàlaro. Zaa gurↄ beeea gbɛ̃kee e gà à yãke laa dↄro.

Currently Selected:

MATIU 22: BBB

Highlight

Compare

Copy