YEMISI 2

Gbɛ̃ wɛ́ɛ gwana

1Ma gbɛ̃nↄ, amↄa kɛ̀ ée wa Dii Gakuide Yesu Kirisi náanɛ kɛɛnↄ, àton gbɛ̃ wɛ́ɛ gwaro. 2Tó gbɛ̃ gɛ̃̀ a kakↄ̃ana guu vura tãnga kↄ̃n pↄ́kãsã tɛ́kɛnao dana, tó takaasidee kɛ̀ bisa kãsã gbãsĩ dana gɛ̃̀ se, 3tó a wɛ́ɛ tɛ́ gbɛ̃ kɛ̀ pↄ́kãsã tɛ́kɛna danazi, tó a bènɛ à mↄ́ à vɛ̃ɛ gumaaan, tó a bè takaasideenɛ à gá à zɛ kãa, kesↄ̃ à mↄ́ à vɛ̃ɛ a gbá saɛ, 4ée kↄ̃ tɛ̃̀ boomɛ, ée yã gwaa mↄnafikion gweroo?

5À ma, ma gbɛ̃ yenzideenↄ. Luda gbɛ̃ kɛ̀ aↄ̃ↄ dɛ gbãasaideenↄ ũ anduna gbɛ̃nↄnɛ sɛ̀ aↄ̃gↄ̃ gbãa à náanɛkɛna guu, lɛ wà kpata kɛ̀ à à lɛ́ gbɛ̃̀ gbɛ̃ kɛ̀ aↄ̃ↄ yezinↄnɛ ble. 6Apinↄ sↄ̃, ée gbãasaidee pìnↄ kpɛ bↄↄ. Auzikideenↄ bé wè gbãaa bleawaroo? Aↄ̃mbe aↄ̃è a gáɛ wà gáao yãkpaɛkɛkiiaroo? 7Aↄ̃mbe aↄ̃è tↄ́ nnaa kɛ̀ kúawaa yakaroo? 8Luda doka mìdee bè àgↄ̃ ye a gbɛ̃daaazi lán a zĩnda wɛ̃̀ndi bà. Tó á yã pì kũna yãpura, ée yã kɛɛ a zɛ́amɛ. 9Tó ée kↄ̃ wɛ́ɛ gwaa sↄ̃, ée durun kɛɛmɛ. Doka pì vɛ̃̀ɛawa a gↄ̃ taarideenↄ ũn gwe. 10Zaakɛ tó gbɛ̃ doka kũna píngi, tó à fù mɛ̀n dooa, à gↄ̃̀ taaridee ũ à píngi guumɛ. 11Luda bè àton zina kɛro. À bè dↄ àton gbɛ̃ dɛro. Baa tó nɛ́ɛ zina kɛro, tó n gbɛ̃ dɛ̀, n gↄ̃ dokadarisaidee ũmɛ. 12Amↄa kɛ̀ Luda é yã gↄ̃gↄ̃ao doka kɛ̀ è tó wà gↄ̃ wɛ̃ɛnɛnↄ ũu musu, àgae yã o àgae yã kɛ lán à kↄ̃ sìao nà. 13Luda é yãkpaɛ kɛ kↄ̃n sùusaideenↄ sùu sai, mↄde yã é bↄ kↄ̃n sùudeeo nna.

Ludanaanɛkɛna kↄ̃n maakɛnao

14Ma gbɛ̃nↄ, tó gbɛ̃ bè ée Luda náanɛ kɛɛ, tó è pↄ́ke kɛro, bↄ́ yãn gwee? Ludanaanɛkɛna beee taka é fↄ̃ à à mì síↄ́? 15Tó a gbɛ̃ mɛ̀n do, gↄ̃gbɛ̃ ke nↄgbɛ̃ e pↄ́kãsãa kↄ̃n pↄ́bleeo takaasi kɛɛ, 16tó a gbɛ̃ke bènɛ: Luda n gba aafia! Ǹton tó ĩa n dɛro! Ǹ pↄ́ ble ǹ kã! Tó èe wɛ̃̀ndibadↄbↄ kpáaro, bↄ́n beee ũu? 17Lɛmɛ se ludanaanɛkɛna ado pↄ́kekɛsai nɛ́ yã gɛ̀mɛ.

18Tó gbɛ̃ n bè, nɛ́ɛ Luda náanɛ kɛɛ, bensↄ̃ mɛ́ɛ yã kɛɛ, mɛ́ bennɛ, ǹ n ludanaanɛkɛna pↄ́kekɛsai ↄdↄamɛ, mɛ́ ma ludanaanɛkɛna ↄdↄannɛ ma yãkɛna guu. 19Ń sì kɛ̀ Luda mɛ̀n domɛ. À maa. Baa tãanↄ se, aↄ̃ↄ dↄ̃ lɛ, ben aↄ̃ègↄ̃ lugalugaa. 20Mìsaide! Pↄ́ kɛ̀ tò ludanaanɛkɛna pↄ́kekɛsai pã, ń yezi mà kánnɛ n ↄzĩↄ́? 21Kɛ̀ wa dezi káaku Ibraĩ a nɛ́ Isaaku kpà sa'opↄ ũ, yã e bↄo nna à yãkɛna yãnziroo? 22Ń èↄ́? À ludanaanɛkɛna kↄ̃n à yãkɛnao kpákↄ̃zimɛ. À yãkɛna bé à à ludanaanɛkɛna bↄ̀ɛzi. 23Ben Luda yã kɛ̀kii pàpa kɛ̀ à bè, Ibraĩ Luda náanɛ kɛ̀, ben Ludaa tò yã bↄ̀o nna a náanɛ kɛ̀ à kɛ̀ yãnzi. Ben wà tↄ́ kpànɛ Luda gbɛ̃nna. 24Á èↄ́? Yãkɛna bé è tó yã bↄ gbɛ̃o nna, èe kɛ ludanaanɛkɛna adonlo. 25Lɛmɛ dↄ kaarua Rahabu kɛ̀ nna kↄ̃n Ludao a yãkɛna yãnzi, gurↄↄ kɛ̀ à gu'asiigwarinↄ dìɛ à ń gbarɛ zɛ́ kpãi guu. 26Lán mɛ̀ ninisai dɛ gɛ̀ ũ nà, lɛn ludanaanɛkɛna pↄ́kekɛsai dɛ gɛ̀ ũ lɛ se.

Currently Selected:

YEMISI 2: BBB

Highlight

Copy

Compare