LAASUUDEE 12
12
1Ǹ tó n Kɛ̀ri yã gↄ̃ dↄngu n gↄ̃kparɛkɛgurↄ
ai gurↄ zaaa gá ká,
ai wɛ̃̀ kɛ̀ nɛ́ be nɛ́ɛ à nnaa ma dↄrooa.
2Ǹ tó à yã gↄ̃ dↄngu
ai ↄfãntɛ̃ kↄ̃n gupuraao gↄ̃ lago,
ai mↄvura kↄ̃n sↄsↄnɛnↄ gↄ̃ sia kũ,
ai loumana gbɛra guweresai gↄ̃ gá su.
3Gurↄ beeea n ↄↄnↄ égↄ̃ lugaluga,
n gbánↄ é koko,
n pↄ́sobↄnↄ é kámma bo kɛ̀ aↄ̃ↄ pari dↄro yãnzi,
n gugwabↄnↄ é guu e ń windo guu dãadãa.
4N lɛ́ égↄ̃ nakↄ̃ana gãalɛ,
wísilↄgbɛ kĩi é busɛ kũnnɛ.
Bãanↄ wiii é n vu iin,
nↄkparɛnↄ lɛ̀ é kɛnnɛ busɛ.
5Nɛ́ vĩa kɛ gulezĩnɛ kↄ̃n lili'ona zɛ́ guuo,
n mìkã é pura kũ lán desu vú bà.
Nɛ́ n zĩnda gáɛ lán kwa táa'ona bà,
pↄ́ke é n mɛ̀ fɛɛ dↄro,
zaakɛ gbɛ̃ntee è gá a gákiiamɛ,
ben ↄ́ↄdↄrinↄ ègↄ̃ lili oo gãalɛ.
6Ǹ tó n Kɛ̀ri yã gↄ̃ dↄngu
ai n kondogi bà gↄ̃ gá kɛ̃,
ai n vura taa gↄ̃ gá kpaato kũ,
ai n í loo gↄ̃ gá wíwi,
ai n lↄ̀gↄ googa gↄ̃ gá wí,
7ai n bùsuti gↄ̃ ɛara à gá gɛ̃ tↄↄtɛn,
guu kɛ̀ à bↄ̀n,
ai n ninii gↄ̃ gá tá
Luda kɛ̀ kpàmmaa kiia.
8Ma laasuude ma bè:
Yã pã búgubugu,
à píngi pãmɛ.
Yã pì mìdɛna
9Beee gbɛra lán laasuudee pì ↄ̃ndↄ̃ nà, à dↄ̃na dàdańnɛ. À laasuu lɛ̀ à kpáɛ kɛ̀ yãzi, ben à yáasinↄ kɛ̀ pari. 10À kpáɛ kɛ̀ yã maaazi, ben à yã pìnↄ kɛ̃̀ a zɛ́a, bensↄ̃ yãpuramɛ.
11Ɔ̃ndↄ̃dee yãnↄↄ dɛ
lán gò kɛ̀ wè pↄ́kãdeenↄ zↄ̃o bàmɛ,
aↄ̃ yã'onanↄↄ dɛ
lán kuusa kɛ̀ wà pà gínginnↄ bà.
Sãdãri mɛ̀n doo bé à yã pìnↄ dà.
12Ma nɛ́, ǹ làakari kɛ, ǹton yãke kaaranlo. Wè takadanↄ kɛ̃ paripari, à lɛ́ vĩro. Kyókɛna bíta sↄ̃ è mɛ̀ kpasamɛ. 13Wà à píngi mà, à mìdɛnan yɛ̀:
Ǹ vĩa kɛ Ludanɛ,
ǹgↄ̃ à yãdiɛnanↄ kũna,
zaakɛ baade píngi yãn gwe.
14Luda é yãkpaɛ kɛ wa yã píngi musu,
kↄ̃n yã kɛ̀ utɛnao píngi,
baa à maaa ke à zaaa.
Currently Selected:
LAASUUDEE 12: BBB
Highlight
Copy
Compare
Share
Want to have your highlights saved across all your devices? Sign up or sign in
Bokobaru Bible with New Testament and OT Portions © Sim International, 2005.
