ROMUDENƆ 15
15
Ògɔ̃ yekɔ̃i wɛ́dɔna Ludai gũn
1Ókɔ̃nɔ kũ ó gbãna ludanaanikɛnaa gũnnɔ, séde ò gbɛ̃ kũ ò gbãnaronɔ sɛ́ lei ń gbãnasarikɛ gũn. Òsungɔ̃ ó pɔyeina kɛro. 2Ó baadi gɔ̃ yã kũ ani kɛ a gbɛ̃dakenɛ nna kɛ a bona mana yãI kũ a zĩnipɛtɛnaao. 3Zaakũ Kirisi dì a zĩda pɔyeina kɛro. À kɛ̃na Luda yãn ò pì, gbɛ̃nɔ dɔkɛna kũ Ludao gɔ̃̀nɛ.#Zab 69:9 4Yã kũ ò kɛ̃̀ yã pínki, ò kɛ̃̀ lɛ́danawá yãimɛ. Luda yã pìi dì ó gba mɛna, àdi ó gba swɛ̃̀ɛ de ògɔ̃ tãmaa vĩ. 5Luda kũ àdi ń gba mɛna à ń gba swɛ̃̀ɛ tó àgɔ̃ nɛ̀sɛdokɔ̃nɔ vĩ kũ kɔ̃o lákũ Kirisi Yesu pɔ́ bà, 6de à Luda ó Dikiri Yesu Kirisi De tɔ́ bo kũ nɛ̀sɛdokɔ̃nɔo kũ lɛ́dokɔ̃nɔo.
7À kɔ̃ sí lákũ Kirisi á sí nà Luda tɔ́bona yãi. 8Matɛn oárɛ, Kirisi gɔ̃̀ zĩ̀ri ũ Yudanɔnɛ de à lɛ́ kũ Luda sɛ̀ ń dizi káakunɔnɛ papa, ògɔ̃ dɔ̃ kũ Luda náani vĩ, 9buri pãndenɔ sɔ̃ Luda tɔ́ bo a sùru yãi lákũ à kɛ̃na Luda yãn nà ò pì:
A yã mɛ́ à tò mani n sáabu kpá burinɔ tɛ́,
mani n tɔ́ kpá.#Zab 18:49
10Ò pì dɔ:
Burinɔ, à pɔnna kɛ kũ Luda gbɛ̃nɔ.
11Ò pì dɔ:
Ákɔ̃nɔ buri sĩnda pínki, à Dikiri tɔ́ kpá,
ákɔ̃nɔ bùsu gbɛ̃nɔ sĩnda pínki à a táaki lɛ́.#Zab 117:1
12Isaya pì dɔ:
Yɛsɛ zĩni ni bɔ̀tɔ pá,
ani futɛ à kí ble buri pãndenɔa,
onigɔ̃ wɛ́ dɔi.
13Luda kũ gbɛ̃ sĩnda pínki wɛ́ dɔi tó pɔnna pɛkɛrɛáwa kũ aafiaao a náani kũ átɛn kɛ yãi, de á wɛ́dɔina kara kũ a Nini gbãnao.
Pɔlu zĩkɛna Ludanɛ
14Ma gbɛ̃nɔ, má dɔ̃ sãnsãn kũ manakɛ pɛ̀kɛrɛáwa, á yã sĩnda pínki dɔ̃ swáswa, áni fɔ̃ à lɛ́ dakɔ̃a. 15Ma takada dí kɛ̃naa gũn ma yãkenɔ kɛ̃̀ kũ swɛ̃̀gbãnao ditɛna de àgɔ̃ dɔágu yãi, zaakũ Luda ma gba zɛ́ 16ma gɔ̃ Kirisi Yesu zĩkɛri ũ buri pãndenɔnɛ. Matɛn baaru kũ à bò Luda kĩnaa kpáńnɛ, de ń kunna gɔ̃ adona Luda Nini gãi, ò gɔ̃ Ludanɛ sa'obɔ kũ àdi káagu ũ. 17Kunna Kirisi Yesu gũn matɛn ĩa dã zĩ kũ matɛn kɛ Ludanɛ yã musu. 18Zaakũ má yãke ona vĩro, tó adi kɛ yã kũ Kirisi kɛ̀ ma kĩnaa baasiro. À tò buri pãndenɔ Luda yã mà ma yã'ona kũ ma yãkɛnaao gãi 19kũ sèedanɔ kũ daboyãnɔ gbãnao kũ Luda Nini gbãnao. Bona Yurusalɛmu ma lika wɛ̃tɛ kũ wɛ̃tɛo ari Ilirikumu bùsun, ma Kirisi baaruu kpàkpaa kɛ̀ papana. 20Madìgɔ̃ ye mà baaru nna pì kpá gu kũ òdi Kirisi yã ma zikiro, de másun bú ba gbɛ̃ pãnde gã̀nlo yãi. 21Lákũ à kɛ̃na Luda yãn nà ò pì:
Gbɛ̃ kũ odi a yã ońnɛ yãronɔ wɛ́ ni kɛ̃,
gbɛ̃ kũ odi a baaru ma yãronɔ ni dɔ̀rɔ dɔ̃.
22Yã kũ àdigɔ̃ kpá ma suna á kĩnaanɛ gɛ̃̀n baaakɔ̃n gwe.#Rom 1:13 23À kà wɛ̃̀ ũgbangba kũ madìgɔ̃ ye mà su á gwa. Tera sà lákũ yãke dí gɔ̃mɛnɛ bùsu díkĩnanɔ gũn doro nà, 24má tãmaa vĩ ò wɛ́ sikɔ̃lɛ sà ma gɛna Sapaini bùsun gũn. Tó ma gɔrɔ pla kɛ̀ kãáo kũ pɔnnao, áni zɛ́ kɛmɛnɛ gɛna gwe. 25Tera la matɛn gɛ́ kũ kpányĩo Luda gbɛ̃nɔnɛ Yurusalɛmu,#1Kɔ 16:1 26zaakũ gbɛ̃ kũ ò kú Masedonia kũ Girisinɔ zɛ̀o ò Luda gbɛ̃ takaside kũ ò kú Yurusalɛmunɔ kámaza kɛ. 27Ò zɛ̀o, ama tilasimɛ. Lákũ Yudanɔ Luda aruzɛkɛ kpàatɛtɛ buri pãndenɔnɛ nà, à mana buri pãndenɔ ń andunia aruzɛkɛ kpaatɛtɛ Yudanɔnɛ se.#1Kɔ 9:11 28Tó ma gba pìi nàńnɛ ń ɔĩ ma làka, ma gɛna Sapaini gũn mani bo á kĩnaa. 29Má dɔ̃ kũ tó mani su á kĩnaa, mani suárɛ kũ Kirisi arubarikaao papanamɛ.
30Ma gbɛ̃nɔ, ma naárɛ ó Dikiri Yesu Kirisii kũ yenyĩ kũ Luda Nini dì kpáḿmao, à futɛ à zɛ à Luda wɛ́ kɛ kũmao, 31de à ma bo Yudea Yesusaridenɔ ɔĩ, de zĩ kũ mani kɛ Yurusalɛmu Luda gbɛ̃nɔ tɛ́ kɛńnɛ nna, 32gbasa mà á le kũ pɔnnao, tó Luda wè, mani su kámma bo á kĩnaa. 33Luda Aafiade gɔ̃ kú kãáo á pínki. Aami!
Bisã Bible © SIM International, 2005.