NARONAA 14
14
Isarailanɔ bona Dikiri kpɛ
1Isarailanɔ tɛn wiki gbãna lɛ́ ń pínki, òtɛn ɔ́ɔ dɔ gwãani pìa. 2Ò zuka dɔ̀ Musaa kũ Harunao ń pínki ò pìńnɛ: Tó o gaga Misila kesɔ̃ gbárannan la, de à kɛ̀ mana. 3Bɔ́yãin Dikiri tɛn tá kũoo bùsuu pìnn? Oni ó dɛdɛ kũ fɛ̃nɛdaomɛ, oni ó nɔgbɛ̃nɔ kũ ó nɛ́nɔ kũkũ. Ó ɛrana Misila sã̀naroo? 4Akũ ò pìkɔ̃nɛ: Ò don'arɛde bo ò ɛra ò tá Misila.
5Musa kũ Harunao wùtɛ ń nɛ̀sɛlɛ kutɛna pari arɛ. 6Akũ bùsuyakɛrinɔ gbɛ̃nɔn pla Nuni nɛ́ Yɔsua kũ Yefunɛ nɛ́ Kalɛbuo ń utanɔ gàga ò kɛ̃̀kɛ̃ 7ò pì gbɛ̃nɔnɛ: Bùsu kũ o bɔtɛn o yakɛ̀ɛ pì mana manamana. 8Tó ó yã kà Dikirigu, ani gɛ́ kũoo bùsuu pìn, bùsu kũ vĩ kũ zɔ́'io din pìia, à ó gba. 9Àsun bo Dikiri kpɛro. Àsun vĩna kɛ bùsupidenɔnɛro, zaakũ ó pɔ́blenɔmɛ, ò utɛki vĩ doro. Dikiri kú kũoo, àsun vĩna kɛro.
10Gbɛ̃ sĩnda pínki tɛni pi ò ń pápa kũ gbɛ̀ɛo, akũ Dikiri gakuri bò à sù Isarailanɔa dakarɛki kuta kia. 11Dikiri pì Musanɛ: Gbɛ̃ pìnɔ nigɔ̃ ma gya bo gɔrɔ sĩnda pínkin yá? Bee kũ daboyã dasi kũ ma kɛ̀ ń tɛ́nɔ, onigɔ̃ gí ma náani kɛi gɔrɔ sĩnda pínkin yá? 12Mani gagagyã káńyĩ mà ń kakatɛ, mani n burinɔ kɛ dasi, ń gbãna nigɔ̃ de gbɛ̃ pìnɔla. 13Akũ Musa pì Dikirinɛ: Mɔkɔ̃n mɛ́ n gbɛ̃ pìnɔ bɔ̀tɛ Misila kũ n gbãnao. Tó Misilanɔ mà, 14oni gí o bùsu dí denɔnɛiro. Zaakũ ò dɔ̃ kũ ń kú kũoo, ndì bo ǹ suwá tɛ̃tɛ̃ntɛ̃. Ò dɔ̃ kũ n tɛ́luku dìgɔ̃ kú ó musu, ndì dowɛrɛ arɛ a gũn fãnantɛ̃, gwãani sɔ̃ tɛ́ gũn. 15Tó n gbɛ̃ pìnɔ dɛ̀ kãnto gɔ̃̀nɔ, buri kũ ò yã pìi mànɔ ni pi: 16Dikiri fùa à gɛ́ kũ gbɛ̃ pìnɔ bùsu kũ à la dàńnɛn, abire yãin à ń dɛdɛ gbárannan. 17Dikiri, ǹ n gbãna zɔ̃kɔ̃ mɔńnɛ sà, lákũ n ò nà n pì 18ndì pɔ fɛ̃ likalikaro, ń gbɛ̃kɛ vĩ zɔ̃kɔ̃, ndì gbɛ̃nɔ yã vãninɔ kũ ń taarinɔ kɛ̃ḿma, ama ndì tó taaride bò pãro. Ndì denɔ yã vãninɔ wí ń burinɔ musu ari à gɛ́ à pɛ́ ń sãkpɛnɔa kũ ń nasionɔ. 19Lákũ n sùruu kɛ̀ kũ gbɛ̃ pìnɔo nà zaa Misila ari ò gɛ̀ɛ ò kào la, ǹ ń durunna kɛ̃ḿma n gbɛ̃kɛ zɔ̃kɔ̃ɔ gũn.
Zukakarinɔ wɛ́tãmmanaa
20Akũ Dikiri pì: Lákũ n wɛ́ kɛ̀ma nà, mani sùru kɛ kũńwo. 21Ama lákũ madìgɔ̃ kun nà akũsɔ̃ ma gakuri dà anduniala pínki, 22gbɛ̃ kũ ò ma gakuri è kũ daboyã kũ ma kɛ̀ Misila kũ gbáranna gũnwo kũ ò ma lɛ ò ma gwa gɛ̃̀n kuri ò gì ma yã mainɔ, 23ń gbɛ̃ke ni wɛ́ sí bùsu kũ ma la dà ń dizinɔnɛɛ pìlɛro. Gbɛ̃ kũ ò ma gya bònɔ ke ni wɛ́ sialɛro. 24Lákũ ma zɔ̀bleri Kalɛbu nɛ̀sɛɛ bò ado nà, à tɛ́mai kũ nɛ̀sɛ doo, mani tó à gɛ̃ bùsu kũ à gɛ̀ɛn pìi gũn, a burinɔ ni le túbi ũ. 25Zaakũ Amalɛkinɔ kũ Kanaanɔn kú guvutɛn gwe, à ɛra à da gbáranna zɛ́n zia Isira Tɛ̃ra kpa.
26Dikiri pì Musanɛ kũ Harunao: 27Gbɛ̃ vãni dínɔ ni zuka kámai gɔrɔ sĩnda pínkin yá? Ma zuka kũ òtɛn kámai mà. 28Ǹ pińnɛ makũ Dikiri ma pì má kun. Lákũ ò wɛ́ kɛ̀ma nà, lɛn mani kɛńnɛ lɛ. 29Ń gɛ̀nɔ ni gɔ̃ kátɛ gbárannan la, ń gbɛ̃ kũ ò kà wɛ̃̀ baro ke à dealanɔ pínki. Ń gbɛ̃ kũ ò ń náro akũsɔ̃ ò zuka kàmainɔ 30ni gɛ̃ bùsu kũ ma a la dàńnɛnlo, séde Yefunɛ nɛ́ Kalɛbu kũ Nuni nɛ́ Yɔsuao baasiro. 31Ń nɛ́ kũ ò pì oni ń kũkũnɔn mani gɛ̃ kũńwo, de ò bùsu kũ ń denɔ gìi pì nna ma. 32Mɔ́kɔ̃nɔ sɔ̃, ń gɛ̀nɔ ni gɔ̃ katɛna gbárannan lamɛ. 33Ń nɛ́nɔ ni pɔ́nɔ dãdã gbárannan la ari wɛ̃̀ bupla, ò ń denɔ náani sari gbɛ̀ le. Ń denɔ gɛ̀nɔ ni gɔ̃ gbárannan la ń pínki. 34Lákũ ò bùsuu pìi yakɛ̀ gɔrɔ bupla nà, lɛn onigɔ̃ ń yã vãni gbɛ̀ le lɛ ari wɛ̃̀ bupla, wɛ̃̀ dodo gɔrɔ dodo, onigɔ̃ dɔ̃ lán ibɛrɛsɛna kũmao de nà. 35Makũ Dikiri makũ mɛ́ ma yã pìi ò, lɛmɛ sɔ̃ mani kɛ gbɛ̃ vãni kũ ò kàkaramai pìnɔnɛ lɛ. Oni gaga gbárannan la ń pínki.
36Gbɛ̃ kũ Musa ń zĩ ò bùsuu yakɛ̀ kũ ò sù ò bùsuu pì gya bò ò tò ò zuka dɔ̀anɔ, 37Dikiri gagagyã kà gbɛ̃ pìnɔgu, akũ ò gàga. 38Gbɛ̃ kũ ò gɛ̀ɛ ò bùsuu yakɛ̀ɛ pìnɔ tɛ́, Nuni nɛ́ Yɔsua kũ Yefunɛ nɛ́ Kalɛbuo mɛ́ ò gɔ̃̀ kũ wɛ̃̀ndiio.
39Musa yã pìnɔ gbã̀ Isarailanɔnɛ pínki, akũ ò ɔ́ɔ dɔ̀ manamana. 40Ò fùtɛ kɔnkɔ káakukaaku, ò mìi pɛ̀ kpinɔa ò pì: À gwa, ótɛn gɛ́ gu kũ Dikiri òn. O ó durunna dɔ̃̀ sà. 41Musa pì: Bɔ́yãi átɛn pã Dikiri yãnɛɛ? Abire ni sí kɛro. 42Àsun gɛ́ro, zaakũ Dikiri kú kãáoro. Á ibɛrɛnɔ ni á ble kũ zĩ̀io. 43Amalɛkinɔ kũ Kanaanɔn kú á arɛ gwe. Oni á dɛdɛ kũ fɛ̃nɛdao. Dikiri nigɔ̃ kú kãáoro, kũ a gi tɛ́ii yãi. 44Akũ ò sãgbãna kɛ̀ ò mìi pɛ̀ kpinɔa, bee kũ Dikiri bàka kunna kũńwo àkpatii gɔ̃̀ bùran kũ Musao. 45Akũ Amalɛkinɔ kũ Kanaa kũ ò kú gusĩsĩde pìnnɔ lɛ̀tɛḿma ò ń blé kũ zĩ̀io ò pɛ̀ḿma ari Ɔɔma.
Currently Selected:
NARONAA 14: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
