MAAKU 8

Pɔ́blekpana gbɛ̃nɔn dúbu siikɔ̃nɔa

(Mat 15:32-39)

1Gɔrɔ kũ̀nɔ gũn dɔ gbɛ̃nɔ kàkarai dasi. Ò pɔ́ble vĩ ò blero, akũ Yesu a ìbanɔ sìsiai à pìńnɛ: 2Gbɛ̃ dínɔ kɛ̀mɛnɛ wɛ̃nda, zaakũ ò gĩnakɛ ò kú kũmao gɔrɔ aakɔ̃, akũ ò pɔ́ke vĩ kũ ò blero. 3Tó ma ń gbárɛ ò tá bɛ kũ nàao, gu ni liḿma zɛ́ gũn, zaakũ ń gbɛ̃kenɔ boki zã̀. 4Akũ a ìbanɔ a là ò pì: Mákpan óni pɔ́ble len sɛ̃̀ntɛpɔrɔtu la kũ ani gbɛ̃ pìnɔ kãa? 5Akũ Yesu ń lá à pì: Burodi mɛ̀n ũgban á vĩi? Ò pì: Mɛ̀n supplamɛ. 6Akũ à pì pari vutɛ zĩtɛ. Akũ à burodi mɛ̀n suppla pìnɔ sɛ̀ à sáabu kɛ̀, ben à ɛ̀'ɛ à kpà a ìbanɔa ò kpaatɛtɛ parinɛ, akũ ò kpàatɛtɛńnɛ. 7Ò kpɔ̀ fítinnanɔ vĩ fíti dɔ. Kũ à arubarikaa dàn, à pìńnɛ ò ɛra ò abirekũ kpaatɛtɛńnɛ dɔ. 8Akũ ò blè ò kã̀, akũ ò a kpara kũ ò gɔ̃̀nɔ sɛ̀tɛ tãnko mɛ̀n suppla. 9Gbɛ̃ pìnɔ kà kãni dúbu siikɔ̃. Kũ Yesu ń gbárɛ, 10akũ à gɛ̃̀ gó'itɛ gũn kũ a ìbanɔ, ò gɛ̀ɛ Dalamanuta bùsun.

Farisinɔ sèedagbɛkanaa

(Mat 16:1-12)

11Akũ Farisinɔ sù òtɛn lɛ́kpakɔ̃a kpá kãao òtɛn lí kpátɛa, òtɛn wɛtɛ à sèeda ke kɛńnɛ kũ Luda gbãnao. 12Akũ à wesa bò à pì: Bɔ́yãi gbãragbɛ̃nɔ dì sèeda gbɛkamaa? Yãpuran matɛn oárɛ, mani sèeda ke kɛńnɛro. 13Akũ à ń tó gwe à ɛ̀ra à gɛ̃̀ gó'itɛ gũn à tà bara.

14A ìbanɔ sã̀n ò burodi zàna sɛ́. Burodi mɛ̀n do mɛ́ à gɔ̃̀ńnɛ gó gũn. 15Akũ Yesu lɛ́ dàḿma à pì: Àgɔ̃ á zĩda kũna dɔ̃. À laakari kɛ Farisinɔ kũ Hɛrɔdu gbɛ̃nɔ lùbɛnɛɛi. 16Akũ òtɛn pikɔ̃nɛ: Kũ ó burodi vĩro yã mɛ́ à tò à ò lɛ. 17Yesu dɔ̃̀ḿma, akũ à ń lá à pì: Bɔ́yãi átɛn pi kũ á burodi vĩro yãii? Ari tera á wɛ́ dí kɛ̃ à dɔ̃roo? Á laasun vĩroo? 18Á wɛ́ vĩ à gu eoroo? Á sã vĩ à yã maoroo? Yãke dì dɔáguroo? 19Kũ ma burodi mɛ̀n sɔɔro ɛ̀'ɛ ma kpà gbɛ̃nɔn dúbu sɔɔronɔa, a a kpara sɛ̀tɛ tãnko mɛ̀n ũgbamɛɛ? Ò wèa ò pì: Mɛ̀n kuri awɛɛplamɛ. 20Akũ à ɛ̀ra à ń lá à pì: Kũ ma burodi mɛ̀n suppla ɛ̀'ɛ ma kpà gbɛ̃nɔn dúbu siikɔ̃nɔa, a a kusu sɛ̀tɛ sù mɛ̀n ũgbaa? Ò wèa ò pì: Mɛ̀n suppla. 21Akũ à pìńnɛ: Ari tera á dɔ̃roo?

Bɛtɛsaida vĩ̀na wɛ́wɛ̃naa

22Kũ ò kà Bɛtɛsaida, akũ ò sùnɛ kũ vĩ̀naao ò wɛ́ kɛ̀a à ɔ naa. 23Akũ à vĩ̀naa pìi kũ̀ a ɔa à bò kãao wɛ̃tɛ kpɛ. À lɛ́'i kà a wɛ́a à ɔ nàa, akũ à a là à pì: Ntɛni gu e yá? 24Akũ gɔ̃gbɛ̃ pì a wɛ́ sɛ̀ musu à pì: Matɛn gbɛ̃nɔ e lán línɔ bà òtɛn táa o. 25Akũ Yesu ɛ̀ra à ɔ nà a wɛ́a dɔ. Kũ gɔ̃gbɛ̃ pì wɛ́ kɛ̀ biribiri, akũ a wɛ́ wɛ̃̀ àtɛn pɔ́ sĩnda pínki e sà swáswa. 26Akũ Yesu a gbàrɛ à tá bɛ à pì: Ǹsun bɔtɛ lakutu gũnlo.

Pita Yesu Arumasihukɛna onaa

(Mat 16:13-23; Luk 9:18-22)

27Kũ Yesu tɛn gɛ́ kũ a ìbanɔ Sizaria Filipi lakutunɔ gũn, akũ à a ìbanɔ là zɛ́ gũn à pì: Dín gbɛ̃nɔ dì pi má de a ũu? 28Ò wèa ò pì: Gbɛ̃kenɔ dì pi Yahaya Da'itɛkɛriimɛ, gbɛ̃kenɔ dì pi Iliasu, gbɛ̃kenɔ dì pi dɔ annabi yãnɔ dokemɛ n ũ. 29Akũ à ń lá à pì: Ákɔ̃nɔ sɔ̃, dín adì pi má de a ũu? Pita wèa à pì: Arumasihumɛ n ũ. 30Akũ Yesu ń sã fĩ̀ńnɛ de òsun yã pì o gbɛ̃ke maro.

Yesu a ga kũ a vunaao yã'onaa

(Mat 16:21-28; Luk 9:22-27)

31Akũ à nà yãdannɛnaaa à pì: Séde Bisãsiri Nɛ́ wɛ́tãmma le manamana, gbɛ̃ zɔ̃kɔ̃nɔ kũ sa'orikinɔ kũ ludayãdannɛrinɔ ni gíi, oni a dɛ, a gɔrɔ aakɔ̃de zĩ ani futɛ. 32À yã pìi òńnɛ swáswa, akũ Pita gɛ̀ɛ kãao kpado, àtɛn gínɛ. 33Kũ Yesu lìtɛ à a ìbanɔ gwà, akũ à pàta Pitaa à pì: Ǹ gomɛnɛ gwe Setan! N laasun bi Luda pɔ́nlo, bisãsiri pɔ́mɛ.

34Abire gbɛra Yesu pari sìsiai kũ a ìbanɔ à pìńnɛ: Tó gbɛ̃ ye à kɛ ma ìba ũ, séde à gí a zĩda wɛ̃̀ndiii à a lígbãndurukpana sɛ́ à tɛ́omai. 35Gbɛ̃ kũ à ye àgɔ̃ a wɛ̃̀ndi kũna ni kurai. Gbɛ̃ kũ à gì a wɛ̃̀ndiii ma yãi kũ ma baaru yão sɔ̃, ade nigɔ̃ wɛ̃̀ndi vĩ. 36Tó gbɛ̃ gɔ̃̀ andunia vĩ pínki, tó à kùra a wɛ̃̀ndiii, bɔ́ àreen à vĩi? 37Bɔ́n bisãsiri ni le à a wɛ̃̀ndi lilin kɛoo? 38Tó gbɛ̃ makũ kũ ma yãnɔ wé'i dɛ̀ gbãragbɛ̃ durunnade ludanaanikɛrisarinɔ tɛ́, Bisãsiri Nɛ́ ni ade wé'i dɛ gɔrɔ kũ ani su a De gakuri gũn kũ a malaikanɔ.

Currently Selected:

MAAKU 8: BB2005

Highlight

Copy

Compare