MATIU 23

Ludayãdannɛrinɔ kũ Farisinɔ manafiki

(Maa 12:38-39; Luk 11:43, 46; 20:45-46)

1Abire gbɛra Yesu yã ò gbɛ̃nɔnɛ kũ a ìbanɔ 2à pì: Ludayãdannɛrinɔ kũ Farisinɔ mɛ́ ò gɔ̃̀ Musa gɛ̃nɛ ũ. 3Abire yãi à yã kũ òdi oárɛnɔ kɛ pínki àgɔ̃ kũna. Ama àsun ń yãkɛna kɛro, zaakũ òdi yã kũ òdi o kɛro. 4Òdi aso tìkisi yĩyĩ ò di gbɛ̃nɔnɛ ń gã̀n akũsɔ̃ bee ɔnɛ do òdigɔ̃ ye ò káiro. 5Òdi ń yã sĩnda pínki kɛ de gbɛ̃nɔ ń e yãimɛ. Lɛn òdi Luda yã ɛzɛba gbɛ̃̀ntɛ̃ da lɛ, òdi bùsubusu gbãna da ń pɔ́kasanɔi. 6Òdigɔ̃ ye ò vutɛ pɔnna pɔ́ble vutɛki mananɔn kũ aduakɛkpɛ vutɛki mananɔo. 7Òdigɔ̃ ye ògɔ̃ fɔ kpákpaḿma ɛtɛnɔa, ògɔ̃ ń sísi Rabi. 8Àsun tó ò á sísi Rabio, zaakũ á pínki vĩ̀ninɔ kũ dakũnanɔmɛ á ũ, á Dannɛri mɛ̀n domɛ. 9Àsun gbɛ̃ke sísi á de zĩtɛ laro, zaakũ á De mɛ̀n domɛ, àkũ mɛ́ à kú musu. 10Àsun tó ò á sísi Arɛdero, zaakũ á Arɛde mɛ̀n domɛ, àkũ mɛ́ à Arumasihu ũ. 11Á zĩ̀rin gbɛ̃ zɔ̃kɔ̃ ũ á tɛ́. 12Gbɛ̃ kũ àdi a zĩda kara, Luda ni a busa. Gbɛ̃ kũ àdi a zĩda busa, Luda ni a kara.

Yesu kpãkɛ̃na ludayãdannɛrinɔ kũ Farisinɔi

(Luk 11:37-42, 44, 52)

13Waiyoo ákɔ̃nɔ yãdannɛrinɔ kũ Farisinɔ! Manafikidenɔ! Adì kpata kũ à bò Luda kĩnaa zɛ́ tata gbɛ̃nɔnɛ. Adì gɛ̃ a gũnlo, akũsɔ̃ adì we gbɛ̃ kũ ò ye ò gɛ̃ a gũnnɔ gɛ̃n sero.

14Waiyoo ákɔ̃nɔ yãdannɛrinɔ kũ Farisinɔ! Manafikidenɔ! Adì adua gbã̀na kɛ de gbɛ̃nɔ á e yãi, akũ adì gyaanɔnɔ kpɛ́ síḿma. Abire yãi á wɛ́tãmma nigɔ̃ pãsĩ de gbɛ̃ sĩnda pínki pɔ́la.

15Waiyoo ákɔ̃nɔ yãdannɛrinɔ kũ Farisinɔ! Manafikidenɔ! Adì kure zĩtɛ kũ ísirao ìba mɛ̀n do lena yãi. Tó a a lè sɔ̃, adì a kɛ tɛ́ pɔ́ ũ deála lɛu pla.

16Waiyoo ákɔ̃nɔ vĩ̀na don'arɛdenɔ! Adì pi, tó ò pì ò sì kũ Luda kpɛ́o, à yãke vĩro, ama tó ò pì ò sì kũ Luda kpɛ́ wuraao, abirekũ mɛ́ à yã vĩ. 17Vĩ̀na yɔ̃nkɔnɔ! A kpate mɛ́ à zɔ̃kɔ̃ɔ? Wuraan yá, ke Luda kpɛ́ kũ àdi tó wura gɔ̃ a pɔ́ ũ? 18Adì pi dɔ, tó ò la dà kũ sa'okio, a yãke vĩro, ama tó ò la dà kũ sa'obɔ kũ à kú gweo, abirekũ mɛ́ à yã vĩ. 19Vĩ̀nanɔ! A kpate mɛ́ à zɔ̃kɔ̃ɔ? Sa'obɔɔn yá, ke sa'oki kũ àdi tó sa'obɔ gɔ̃ Luda pɔ́ ũ? 20Gbɛ̃ kũ à la dà kũ sa'okio la dà kũ pɔ́ kũ à kú gwenɔo pínkimɛ dɔ. 21Gbɛ̃ kũ à la dà kũ Luda kpɛ́o la dà kũ Luda kũ à kú a gũnwomɛ dɔ. 22Gbɛ̃ kũ à la dà kũ ludambɛo la dà kũ Luda kíblegbaao kũ Luda kũ à vutɛnaaaomɛ.

23Waiyoo ákɔ̃nɔ yãdannɛrinɔ kũ Farisinɔ! Manafikidenɔ! Adì tofenɔ tɔkɔtɛdo kũ kpè'akão kũ dã̀ láo kuride kpá Ludaa, akũ adì dokayã tìkisinɔ tón, yãzɛde kũ sùruuo kũ náanio. Yã birenɔ mɛ́ à de ògɔ̃ kũna a kpara tonaa sari. 24Vĩ̀na don'arɛdenɔ! Adì mɔ́sɔ nɛ́ bo á pɔ́minan, akũ adì lakumi mɔ́.

25Waiyoo ákɔ̃nɔ yãdannɛrinɔ kũ Farisinɔ! Manafikidenɔ! Adì tokonɔ kpɛ gbãsĩ bo kũ tanɔ, ama wãkũ kũ zĩdakũnadɔ̃nasario mɛ́ à á nɛ̀sɛɛ pà. 26Mɔkɔ̃n Farisi vĩ̀na! Ǹ gbãsĩ bo toko gũnnɛ gĩa, a kpɛ ni gɔ̃ gbãsĩ sari.

27Waiyoo ákɔ̃nɔ yãdannɛrinɔ kũ Farisinɔ! Manafikidenɔ! Á de lán mira kũ ò gbɛ̀ pura lɛ̀anɔ bàmɛ. Ń kpɛ mana wɛ́nɛ, ama gɛ̀wanɔ kũ gbãsĩ pínkio mɛ́ à ń gũn pà. 28Lɛmɛ ákɔ̃nɔ se dɔ, á kunna mana gbɛ̃nɔ wɛ́nɛ, ama manafiki kũ yã vãnio mɛ́ à á gũn pà.

29Waiyoo ákɔ̃nɔ yãdannɛrinɔ kũ Farisinɔ! Manafikidenɔ! Adì pɔ́ bo annabinɔ miranɔa, adì zã ble Luda gbɛ̃nɔ pɔ́a 30adì pi: Tó ó kun yã ó dizinɔ gɔrɔa, ó bàka nigɔ̃ kú kũńwo annabinɔ dɛdɛnaa gũnlo. 31Lɛmɛ a sì kũ gbɛ̃ kũ ò annabinɔ dɛ̀dɛnɔ burinɔn á ũ. 32À ania kɛ, à á dizinɔ tàragaa ba à a mì dɛ sà! 33Mlɛ̃̀nɔ! Bisãsiri pitikonɔ! Áni kɛ dera à bo tɛ́ yã kũ à danaála gũnn? 34Abire yãi mani annabinɔ kũ ɔ̃ndɔ̃rinɔ kũ yãdannɛrinɔ zĩáwa. Áni ń gbɛ̃kenɔ dɛdɛ, áni ń gbɛ̃kenɔ pá lía, áni ń gbɛ̃kenɔ gbɛ̃ kũ flã̀ao á aduakɛkpɛnɔ gũn, áni pɛ́ḿma wɛ̃tɛ kũ wɛ̃tɛo. 35Lɛmɛ Luda gbɛ̃ kũ ò ń dɛdɛnɔ yã ni wí á musu lɛ, sɛna zaa gbɛ̃ mana Habila dɛnaaa ari à gɛ̀ɛ pɛ́ Bɛrɛkia nɛ́ Zakari kũ a a dɛ̀ Luda kpɛ́ kũ sa'okio daguraa. 36Yãpuran matɛn oárɛ, yã birenɔ pínki ni wí gbãragbɛ̃nɔ musumɛ.

Yurusalɛmu yã

(Luk 13:34-35)

37Yurusalɛmudenɔ, Yurusalɛmudenɔ! Adì annabinɔ dɛdɛ, adì gbɛ̃ kũ Luda ń zĩáwanɔ papa kũ gbɛ̀ɛo à ń dɛdɛ. Madìgɔ̃ ye mà á kakaramai gɛ̃̀n baaakɔ̃, lán ko dì a dɛ̀mbɛrɛ kú a nɛ́nɔla nà, ama ádi weiro. 38Luda ni á kpɛ́ tóárɛ bɛzĩ ũmɛ sà. 39Matɛn oárɛ, áni ma e doro ari à pi, arubarikaden gbɛ̃ kũ àtɛn su kũ Dikiri tɔ́o ũ.

Currently Selected:

MATIU 23: BB2005

Highlight

Copy

Compare