MATIU 21

Gbãnakɛkpana Yesui Yurusalɛmu

(Maa 11:1-26; Luk 19:28-48; Yuh 12:12-22)

1Kũ ò kà kãni kũ Yurusalɛmuo, ò kà Bɛtɛfage lakutu kũ à kú Kùkpɛ sĩ̀sĩgɛrɛɛi, akũ Yesu a ìba zĩ̀ gbɛ̃nɔn pla 2à pìńnɛ: À gɛ́ lakutu kũ à kátɛ á arɛ dire gũn. Tó a gɛ̃ gɔ̃̀nɔ, áni zaaki e kũ a nɛ́o bàdɔna gwe. À poro à suomɛnɛ. 3Tó ò á lá ò pì, à kɛ̀ deraa, à pi Dikiri mɛ́ à yei, ani ɛra à suo tera. 4À kɛ̀ lɛ de yã kũ annabii ò kɛ yãimɛ à pì:

5À o Zaiɔ̃denɔnɛ

ń kína mɛ́ àtɛn su ń kĩnaa.

À busɛ à di zaakinɛ bɔ̀rɔ kpɛ.

6Ìbaa pìnɔ gɛ̀ɛ ò kɛ̀ lán Yesu òńnɛ nà. 7Ò sù kũ zaaki pìio kũ a nɛ́o, ò ń utanɔ kpàtɛḿma, akũ Yesu dìa. 8Gbɛ̃nɔ tɛni ń utanɔ kpátɛ zɛ́n dasidasi, gbɛ̃kenɔ tɛn lá zɔ̃, òtɛn kpátɛ zɛ́n dɔ. 9Gbɛ̃ kũ ò tɛ́ arɛnɔ kũ gbɛ̃ kũ ò tɛ́ kpɛnɔ tɛn wiki lɛ́ òtɛn pi:

Ǹ gbãna kɛ, Dauda buri!

Arubarikaden gbɛ̃ kũ àtɛn su kũ Dikiri tɔ́o ũ!

Ò gbãnakɛ kpái ari ludambɛ.

10Kũ Yesu gɛ̃̀ Yurusalɛmu, wɛ̃tɛ lòko, gbɛ̃ sĩnda pínki tɛn pi: Dín gbɛ̃ bire ũu? 11Pari pì: Annabi Yesumɛ. À bò Nazɛra, Galili bùsun.

Yesu kunna Luda ɔnn

(Maa 11:15-19; Luk 19:45-48; Yuh 2:13-22)

12Yesu gɛ̃̀ Luda ɔnn, à pɛ̀ lagayarinɔ kũ lagalurinɔa à ń bɔ́tɛ ń pínki. A ɔgɔlilinkɛrinɔ teburunɔ kũ potɛ̃nɛyarinɔ gbànɔ yĩ̀pa à kɔ̀tɛńnɛ. 13À pìńnɛ: Ò kɛ̃̀ Luda yãn, ma kpɛ́ nigɔ̃ de aduakɛkpɛ ũ, akũ a kɛ̀ gbɛ̃blerinɔ tò ũ.

14Vĩ̀nanɔ kũ ɛrɛnɔ sù a kĩnaa Luda ɔnn gwe, akũ à ń wérekɔ̃a. 15Kũ sa'orikinɔ kũ ludayãdannɛrinɔ yãbonsarɛ kũ àtɛn kɛnɔ è, akũsɔ̃ ò mà nɛ́nɔ tɛn wiki dɔa Luda ɔnn òtɛn pi, ǹ gbãna kɛ, Dauda Buri, akũ ń pɔ fɛ̃̀. 16Ò pìnɛ: N mà lákũ òtɛn o nà yá? Yesu wèḿma à pì: Lɛmɛ! Kũ Luda dà nɛ́ fítinɔnɛ kũ nɛ́kpãntɛ̃nɔ ò a sáabu kpá, ádi a kyó kɛ a màroo? 17Akũ à bò wɛ̃tɛ pìn à ń tón, à gɛ̀ɛ à ì Bɛtani.

Yesu kaka lí kanaa

(Maa 11:12-14, 20-24)

18Kũ gu dɔ̀ kɔnkɔkɔnkɔ, à ɛ̀ra àtɛn su wɛ̃tɛn, akũ nà tɛni a dɛ. 19À kaka lí è zɛ́ lɛ́a, akũ à nài adi pɔ́ke learo, sé a lánɔ. Akũ à pì lí pìinɛ: Ĩni nɛ́ i ziki doro. Gwe gɔ̃̀nɔ lí pìi kori kɛ̀ à gà. 20Kũ a ìbanɔ è, akũ à bò ń sarɛ ò pì: À kɛ̀ dera kaka lí pìi kori kɛ̀ lɛ gɔ̃̀nɔgɔ̃nɔɔ? 21Yesu wèḿma à pì: Yãpuran matɛn oárɛ, tó á Luda náani vĩ sikaa sari, adi kɛ kaka lí pì yãn áni kɛ adoro. Tó a ò kpi dínɛ à futɛ à a zĩda sɛ́ à zu sɛ̀bɛn, ani kɛ lɛ. 22Tó á Luda náani vĩ, yã kũ a a wɛ́ kɛ̀a aduakɛnaa gũn pínki, áni le.

Yesu gbɛkana a ikooi

(Maa 11:27-33; Luk 20:1-8)

23Yesu gɛ̃̀ Luda ɔnn, àtɛn yã dańnɛ. Akũ sa'orikinɔ kũ gbɛ̃ zɔ̃kɔ̃nɔ sù ò a là ò pì: Iko kpaten ntɛn yã dínɔ kɛoo? Dí mɛ́ à n gba ikoo pìi? 24Akũ Yesu wèḿma à pì: Makũ sɔ̃, yã mɛ̀n don mani gbɛkaáwa. Tó a òmɛnɛ, mani iko kũ matɛn yã dínɔ kɛo oárɛ. 25Dí ikoon Yahaya gbɛ̃nɔ da'itɛ kɛ̀oo? À bò Luda kĩnaan yáa, ke bisãsiri kĩnaamɛ? Akũ ò yã gɔ̃̀gɔ̃ ò pì: Tó o pì Luda kĩnaamɛ, ani ó la, bɔ́yãin ódi Yahaya yã síroo. 26Tó o pì bisãsiri kĩnaamɛ sɔ̃, ó gbɛ̃nɔ vĩna vĩ, zaakũ gbɛ̃ sĩnda pínki Yahaya annabikɛ sì. 27Akũ ò wè Yesua ò pì: Ó dɔ̃ro. Akũ Yesu pìńnɛ: Ɛ̃hɛ̃ makũ se, mani iko kũ matɛn yã dínɔ kɛo oárɛro.

Nɛ́gɔ̃gbɛ̃ gbɛ̃nɔn planɔ

28Akũ Yesu pì: Gbɛ̃ke nɛ́gɔ̃gbɛ̃nɔ vĩ gbɛ̃nɔn pla. Akũ à pì Worunɛ: Ǹ gɛ́ ǹ zĩ kɛ bura gbãra. 29Woru pì: Mani gɛ́ro. Akũ à a nɛ̀sɛɛ lìtɛ zã à gɛ̀ɛ. 30Mare pìi gɛ̀ɛ à pì Sabinɛ lɛ dɔ. Sabi pì: Tɔ̀. Akũ adi gɛ́ro. 31A è deraa? Gbɛ̃nɔn pla pìnɔ gũn, ń dí mɛ́ à a de pɔyeinaa kɛ̀ɛ? Ò pì: Worumɛ. Akũ Yesu pìńnɛ: Yãpuran matɛn oárɛ, bɛ'ɔgɔsirinɔ kũ karuanɔ ni gɛ̃ kpata kũ à bò Luda kĩnaa gũn á ã. 32Zaakũ Yahaya sù, à zɛ́ súsu mɔ̀árɛ, ádi a yã síro. Bɛ'ɔgɔsirinɔ kũ karuanɔ mɛ́ ò a yã sì. Bee kũ abirekũ enaao ádi á nɛ̀sɛ litɛ zã a a yã sìro.

Geepi líkpɛ arukɛrinɔ

(Maa 12:1-12; Luk 20:9-18)

33À yã pãnde ma dɔ. Burade ke mɛ́ à kun, à geepi líkpɛ bà à karaa lìkai, à wɛ̀ɛ yɔ̃̀ a gũn geepi'ifɛ̃ki ũ à búdãkpãgbaa dɔ̀. Akũ à bú pìi nà arukɛrinɔnɛ ń ɔĩ, akũ à fùtɛ kũ táo. 34Kũ geepizɔ̃gɔrɔ kà, akũ à a zĩ̀rinɔ zĩ̀ arukɛrii pìnɔa, de ò a geepi nɛ́ sí. 35Akũ arukɛrii pìnɔ a zĩ̀rinɔ kũ̀kũ, ò ń gbɛ̃ do gbɛ̃̀, ò ń gbɛ̃ do dɛ̀, ò ń gbɛ̃ do pàpa kũ gbɛ̀ɛo ò a dɛ̀. 36Akũ à ɛ̀ra à zĩ̀ri pãndenɔ zĩ̀ḿma, ń dasi de gbɛ̃ káakunɔla, akũ ò kɛ̀ńnɛ lɛ dɔ. 37Kpɛkpɛ à a nɛ́ zĩ̀ḿma à pì: Oni ma nɛ́ yã da. 38Kũ arukɛrii pìnɔ nɛ́ pìi è, ò pìkɔ̃nɛ: Túbibleriin dí. À tó ò a dɛ, a túbi ni gɔ̃ ó pɔ́ ũ. 39Akũ ò a kũ̀ ò bò kãao bura gũn, ò a dɛ̀. 40Tɔ̀! Tó burade pìi sù, bɔ́n ani kɛ arukɛrii pìnɔnɛɛ? 41Ò wèa ò pì: Ani gbɛ̃ pãsĩ pìnɔ dɛdɛ pãsĩpãsĩ, ani bura pì na arukɛri pãnde kũ oni a baka kpáa a gɔrɔanɔnɛ ń ɔĩ. 42Akũ Yesu pìńnɛ: Ádi Luda yã dí kyó kɛroo?

Gbɛ̀ kũ kpɛ́borinɔ pã kpài

mɛ́ à gɔ̃̀ kpɛ́ kusuru gbɛ̀ mìde ũ.

Dikiri mɛ́ à abirekũ kɛ̀

akũ à kɛ̀wɛrɛ yãbonsarɛ ũ.

43-44Abire yãi matɛn oárɛ: Luda ni á bo kpata kũ à bò a kĩnaa gũn, ani gbɛ̃ kũ oni a baka kpáanɔ kán.

45Kũ sa'orikinɔ kũ Farisinɔ Yesu yãlɛkɔ̃anaa pìnɔ mà, ò dɔ̃ kũ ń yãn àtɛn o. 46Akũ ò zɛ́ wɛ̀tɛ ò a kũ, ama ò vĩna kɛ̀ parinɛ, kũ ò a dìtɛ annabi ũ yãi.

Currently Selected:

MATIU 21: BB2005

Highlight

Copy

Compare