NAANAA 47
47
Isarailanɔ vutɛna Misila
1Yusufu gɛ̀ɛ à yã ò Firi'aunanɛ à pì: Ma vĩ̀ninɔ bò Kanaanɔ bùsun kũ ń sãnɔ kũ ń blènɔ kũ ń zùnɔ kũ pɔ́ kũ ò vĩnɔ pínki, ò sù Gosɛ̃ bùsun. 2Akũ à a vĩ̀ninɔ sɛ̀ gbɛ̃nɔn sɔɔro à ń mɔ́ Firi'aunanɛ. 3Firi'auna ń lá à pì: Bɔ́ zĩn adì kɛɛ? Ò wèa ò pì: Ókɔ̃nɔ n zɔ̀blerinɔ, sãdãrinɔn ó ũ lán ó dizinɔ bà. 4Akũ ò pìnɛ: O su vutɛ bùsun la gɔrɔ plamɛ, zaakũ nà kú Kanaanɔ bùsun manamana, sɛ̃̀ kun kũ ó sãnɔ blero. Ókɔ̃nɔ n zɔ̀blerinɔ, ǹ ó gba zɛ́ ò vutɛ Gosɛ̃ bùsun. 5Akũ Firi'auna pì Yusufunɛ: Lákũ n de kũ n vĩ̀ninɔ sù n kĩnaa nà, 6ǹ ń kátɛ Misila gu manan. Ò vutɛ Gosɛ̃ bùsun. Tó laakaridenɔn kú ń tɛ́, ǹ ma pɔ́nɔ nańnɛ ń ɔĩ.
7Akũ Yusufu a de Yakubu sɛ̀ à gɛ̀ɛ à mɔ̀ Firi'aunanɛ. Akũ Yakubu sa mana ònɛ. 8Firi'auna a là à pì: N ka wɛ̃̀n gbaa? 9À wèa à pì: Ma kunna andunia gũn wɛ̃̀ basuddo akuriden dí. Ma wɛ̃̀ dí ká ma dizinɔ pɔ́ ũro, akũ à yã'ũmmana vĩ. 10À sa mana ò Firi'aunanɛ dɔ, akũ à bò a kĩnaa.
11Yusufu a de kũ a vĩ̀ninɔ kàtɛ Misila bùsu gu manan à ń gbá bùsu kũ Ramɛsɛ de a wɛ́ra ũ lákũ Firi'auna ò nà. 12Yusufu pɔ́blewɛ kpà a dea kũ a vĩ̀ninɔ kũ a de bedenɔ ń pínki ɔn kũ ɔnnwo ń dasi lɛ́n.
Nà gbãnakũnaa
13Nàa kɛ̀ gbãna, pɔ́blewɛ kú gukearo. Misilanɔ kũ Kanaanɔ gbãna làka. 14Òtɛn pɔ́blewɛ lú, akũ Yusufu ɔgɔ kũ à kú Misila kũ Kanaao sì pínki à tào Firi'auna bɛa. 15Kũ Misilanɔ kũ Kanaanɔ ɔgɔ làka, Misilanɔ sù Yusufu kĩnaa ń pínki ò pì: Ɔgɔ kun doro. Ǹ ó gba pɔ́blewɛ. Ǹsun tó ò ga n wáraro. 16Yusufu pì: Lákũ ɔgɔ kunlo nà, à su kũ á pɔ́kãdenɔ, mani pɔ́blewɛ kpááwa a musu. 17Akũ ò sù Yusufunɛ kũ pɔ́kãdenɔ, akũ à pɔ́blewɛ kpàḿma sɔ̃nɔ kũ sãnɔ kũ blènɔ kũ zùnɔ kũ zaakinɔ musu. Wɛ̃̀ birea à pɔ́blewɛ kpàḿma ń pɔ́kãdenɔ musumɛ.
18Kũ wɛ̃̀ bire gɛ̃̀tɛ, akũ ò sù a kĩnaa a wɛ̃̀ làa ò pìnɛ: Dikiri, óni fɔ̃ ò yãke utɛnnɛro. Ɔgɔ làka, akũ ó pɔ́kãdenɔ gɔ̃̀ n pɔ́ ũ. Pɔ́ke dí gɔ̃ ò kpámmaro, ókɔ̃nɔ kũ ó buranɔ baasiro. 19Ǹsun tó ò ga n wára kũ ó buranɔro. Ǹ ó lú kũ ó buranɔ ǹ fĩna bo kũ pɔ́blewɛo ò gɔ̃ Firi'auna zɔ̀nɔ ũ, ókɔ̃nɔ kũ ó buranɔ. Ǹ ó gba pɔ́blewɛ de òsun garo ògɔ̃ kun, akũsɔ̃ de ó buranɔ sún gɔ̃ tàraga ũro. 20Akũ Yusufu Misila buranɔ lù Firi'aunanɛ pínki, zaakũ Misilanɔ baadi a bura yìa, kũ nà ń kũ gbãna yãi, akũ bùsuu gɔ̃̀ Firi'auna pɔ́ ũ. 21Yusufu Misilanɔ sì zɔ̀nɔ ũ ń pínki zaa ń bùsu lɛ́n la gɛna a lɛ́ dire. 22Ama adi sa'orinɔ buranɔ lúro, zaakũ Firi'auna dìtɛ àgɔ̃ pɔ́blewɛ kpáḿma gɔrɔ sĩnda pínki. Lákũ ò kú kũ pɔ́blewɛ kũ Firi'auna dì kpáḿmao nà, odi ń buranɔ yíaro.
23Akũ Yusufu pì gbɛ̃nɔnɛ: Ma á lú kũ á buranɔ sà, a gɔ̃ Firi'auna pɔ́ ũ. Pɔ́blewɛn dí. À gɛ́ à tɔ̃. 24Pɔ́kɛ̃gɔrɔ àgɔ̃ a lɛu sɔɔrode kpá Firi'aunaa, a kpara ni gɔ̃árɛ pɔ́wɛ ũ kũ pɔ́bleo. Àgɔ̃ abire ble kũ á nɛ́nɔ kũ á bedenɔ á pínki. 25Akũ ò pì: N ó sura bà. Ǹ tó ò n pɔnna le dikiri, ò gɔ̃ Firi'auna zɔ̀nɔ ũ. 26Akũ Yusufu yã dìtɛ Misila à pì, burapɔ lɛu sɔɔrode nigɔ̃ de Firi'auna pɔ́ ũ. Yã pì kun ari kũ a gbãrao. Sa'orinɔ bùsu mɛ́ adi gɔ̃ Firi'auna pɔ́ ũro ado.
Yakubu wɛ́kɛna zã
27Isarailanɔn kú Gosɛ̃ bùsun zaa Misila. Ò ń zĩda zĩtɛ vĩ gwe, akũ ò nɛ́ ì ò kàra manamana. 28Yakubu kɛ̀ wɛ̃̀ gɛ̃ro awɛɛpla Misila, a wɛ̃̀ pínkipinki basuppla awɛɛsupplamɛ. 29Kũ à kà gana, à a nɛ́ Yusufu sìsi, akũ à pìnɛ: N yã nna! Tó ma n pɔnna lè, ǹ n ɔ da ma gbáda gbáru ǹ gbɛ̃kɛ kũ náanio yã kɛmɛnɛ. Ǹsun ǹ ma vĩ Misilaro. 30Tó ma ka ma dizinɔla, ǹ ma sɛ́ ǹ bo kũmao Misila la ǹ ma vĩ ma dizi pìnɔ miran. Akũ Yusufu pìnɛ: Mani yã kũ n ò kɛnnɛ. 31Akũ Yakubu pì: Ǹ la damɛnɛ. Kũ à la dànɛ, akũ Yakubu gbãna lè a gòoa à donyĩ kɛ̀.
Currently Selected:
NAANAA 47: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
