NAANAA 45
45
Yusufu zĩda babana a vĩ̀ninɔnɛ
1Yusufu dí fɔ̃ à a zĩda kũ̀ a ìba kũ ò kú gwenɔ arɛ doro, akũ à pũ̀tã à pì: Ákɔ̃nɔ kũ á kú lanɔ, à bɔtɛ á pínki! Kũ gbɛ̃ke kú gwe doro, akũ à a zĩda bàba a vĩ̀ninɔnɛ sà. 2Àtɛn ɔ́ɔ dɔ gbãnagbãna ari Misilanɔ mà, akũ Firi'auna bedenɔ a baaruu mà. 3Akũ à pì a gbɛ̃ pìnɔnɛ: Yusufumɛ ma ũ. Ma de kun ari tera yá? Akũ swɛ̃̀ɛ kɛ̃̀ńgu, odi fɔ̃ ò wèaro. 4Akũ Yusufu pìńnɛ: À namai. Kũ ò nài, akũ à pì: Makũmɛ á dakũna Yusufu kũ a yìa ò sù kãao Misila la ũ. 5Tera sà àsun tó á nɛ̀sɛɛ yakaro. Àsun pɔ fɛ̃ ma yiana yã musuro, zaakũ gbɛ̃nɔ surabana yãin Luda ma zĩ á arɛ la. 6Nà kana bùsun la wɛ̃̀ pladen dí. Oni bú baro oni pɔ́ kɛ̃ro ari wɛ̃̀ sɔɔro. 7Luda tò ma doárɛ arɛ de ó buri bo aafia andunia gũn, mà á sura ba manamana. 8Adi kɛ ákɔ̃nɔ mɛ́ a ma zĩ laro, Ludamɛ. À ma ditɛ Firi'auna lɛ́dammari ũ, a bɛgwari ũ, Misila gu sĩnda pínki gbɛ̃ zɔ̃kɔ̃ ũ. 9À kɛ likalika à gɛ́ ó de kĩnaa à onɛ a nɛ́ Yusufu pì Luda a ditɛ Misila bùsu gbãnade ũ. À su ma kĩnaa la gɔ̃̀nɔ. 10Àgɔ̃ kú kũmao kãni à vutɛ Gosɛ̃ bùsun kũ a nɛ́nɔ kũ a daikorenɔ kũ a sãnɔ kũ a blènɔ kũ a zùnɔ kũ pɔ́ kũ à vĩnɔ pínki. 11Mani a gwa la, zaakũ nà nigɔ̃ kun ari wɛ̃̀ sɔɔro dɔmɛ. Tó lɛnlo, àkũ kũ a bedenɔ kũ pɔ́ kũ à vĩnɔ ni kakatɛ pínki. 12Ákɔ̃nɔ kũ Biliaminuo, a è kũ wɛ́o kũ makũ Yusufu makũ mɛ́ matɛn yã oárɛ. 13À bɛ̀ɛrɛ kũ má vĩ Misila la yã o ma denɛ kũ pɔ́ kũ a èo pínki. À gɛ́ à su kãao la likalika. 14À vĩ̀ à lòko a dakũna Biliaminu wakaaa à ɔ́ɔ dɔ̀, akũ Biliaminu mlɛ̃̀a à ɔ́ɔ dɔ̀ se. 15Akũ à lɛ́ pɛ̀pɛ a vĩ̀ninɔa ń pínki kũ ɔ́ɔdɔo. Abire gbɛra a vĩ̀ninɔ yã ò kãao.
16Kũ Yusufu vĩ̀ninɔ suna baaruu kà Firi'auna bɛa, à kɛ̀nɛ nna kũ a ìbanɔ. 17Akũ à pì Yusufunɛ: Ǹ o n vĩ̀ninɔnɛ ò ń aso yĩ ń zaakinɔnɛ ò futɛ ò gɛ́ Kanaa, 18ò ń de sɛ́ kũ n bedenɔ ò su kũńwo ma kĩnaa la. Mani Misila bùsu gu mana kpáḿma ògɔ̃ nna ma. 19Ǹ ońnɛ dɔ ò Misila zùgonɔ sɛ́ ń nɛ́ fítinɔ kũ ń nɔgbɛ̃nɔ yãi, ò ń de sɛ́ ò su kãao. 20Òsun laasun lɛ́ pɔ́ kũ oni tó gwenɔaro, zaakũ Misila gu mana ni gɔ̃ ń pɔ́ ũmɛ.
21Akũ Isaraila nɛ́ pìnɔ kɛ̀ lɛ. Yusufu zùgonɔ kpàḿma lákũ Firi'auna ò nà. À zɛ́ zànaa kɛ̀ńnɛ dɔ. 22À ń gbá uta zɔ̃kɔ̃nɔ ń pínki, akũ à Biliaminu gbà andurufu ɔgɔ mɛ̀n wàa do kpɛ́ basɔɔro kũ uta zɔ̃kɔ̃nɔ mɛ̀n sɔɔro. 23À Misila pɔ́ mananɔ kpã̀zã a denɛ zaaki aso kuri kũ pɔ́blewɛo kũ pɔ́bleo zaaki aso kuri a de zɛ́ zàna ũ. 24Kũ à ń gbárɛ à pì: Àsun fìti kɛ zɛ́nlo! Akũ ò tà.
25Ò bò Misila, akũ ò kà Kanaanɔ bùsun ń de Yakubu kĩnaa. 26Ò pìnɛ: Yusufu kú wɛ̃̀ndiio ari tera, àkũmɛ Misila bùsu gbɛ̃ zɔ̃kɔ̃ ũ. Akũ Yakubu kɛ̀ sã̀ii, adi síro. 27Akũ ò yã kũ Yusufu òńnɛ ònɛ pínki. Kũ Isaraila zùgo kũ Yusufu gbàrɛ à a sɛ́nɔ è, akũ a laasun kɛ̀ do sà, 28akũ à pì: Adikĩna mɔ̀! Ma nɛ́ Yusufu kú kũ wɛ̃̀ndiio ari tera. Mani gɛ́ mà wɛ́ sialɛ de má kpɛ́ mà ga.
Currently Selected:
NAANAA 45: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
