NAANAA 39
39
Yusufu kũ Pɔtifa nanɔo
1Kũ Sumaila burinɔ kà kũ Yusufuo Misila, akũ Misila gbɛ̃ Pɔtifa a lùḿma. Firi'auna ìba kemɛ, àkũmɛ a dogarinɔ gbɛ̃ zɔ̃kɔ̃ ũ. 2Dikiri kú kũ Yusufuo, akũ à sa'a kũ̀. À kú a dikiri Misila gbɛ̃ pì bɛa. 3Kũ a dikiri pìi è Dikiri kú kãao àdigɔ̃ a dakarɛ kũ sa'ao yã kũ àtɛn kɛnɔ gũn pínki, 4akũ Yusufu a pɔnna lè. Pɔtifa a dìtɛ a azia ũ à pɔ́ kũ à vĩnɔ nànɛ a ɔĩ pínki. 5Zaa gɔrɔ kũ à a dìtɛ a azia ũ, Dikiri arubarikaa dà a bɛn Yusufu yãi. Dikiri arubarikaa dà pɔ́ kũ à de a pɔ́ ũnɔgu pínki, bɛ pɔ́nɔ kũ burapɔnɔn yá. 6Akũ Pɔtifa a pɔ́ sĩnda pínki nà Yusufunɛ a ɔĩ. A bàka kú yãkeoro, tó adi kɛ pɔ́ble baasiro. Yusufu sɔ̃ bi gɔ̃ kɛfɛnnamɛ, akũ a zɛna mana.
7Zĩkea Yusufu ni gɛ̃̀ a dikiri nanɔgu, akũ à pìnɛ: Ǹ wútɛ kũmao. 8Akũ à gì à pì: Ǹ gwa, ma dikiri bàka kú yãkeo ɔn dí gũn doro, à pɔ́ kũ à vĩnɔ nàmɛnɛ ma ɔĩ pínki. 9A gbãna demala ɔn dí gũnlo, adi gímɛnɛ kũ pɔ́keoro, sé mɔkɔ̃n, kũ ń de a nɔ ũ yãi. Mani fɔ̃ mà yã vãni bire taka kɛ mà durunna kɛ Ludanɛro. 10Bee kũ nɔgbɛ̃ pìi dìgɔ̃ onɛ baabɔrɛ, adi we à wùtɛ kãaoro, à ye àgɔ̃ kú kãao sero.
11Zĩkea kũ Yusufu gɛ̃̀ kpɛ́n a zĩ kɛ, à sù à lè ɔn zĩkɛri ke kú kpɛ́ gũnlo. 12Akũ nɔgbɛ̃ pì a kũ̀ a utaa à pì: Ǹ wútɛ kũmao. Akũ Yusufu a uta tònɛ gwe à bàa lɛ̀ à bò bàai. 13Kũ nɔgbɛ̃ pìi è à a uta tòarɛ à bàa lɛ̀ à bò bàai, 14akũ à ɔn zĩkɛrinɔ sìsi à pìńnɛ: À gwa, ò sùwɛrɛ kũ Eberuo, akũ àtɛn dɔkɛ kũoo. À gɛ̃̀mai à wútɛ kũmao, akũ ma wiki lɛ̀. 15Kũ à mà ma wiki dɔ̀awa, akũ à a uta tò katɛna ma sarɛ à bàa lɛ̀ à bò bàai. 16Akũ nɔgbɛ̃ pìi uta pìi kàtɛ a sarɛ ari Yusufu dikirii sù, 17akũ à pìnɛ: Eberu zɔ̀ kũ n su kãaowɛrɛ dɔkɛ̀ kũmao à gɛ̃̀mai. 18Kũ ma wiki dɔ̀a, akũ à a uta tò katɛna ma sarɛ à bàa lɛ̀ à bò bàai. 19Kũ nɔgbɛ̃ pì yã pìi ò a zãnɛ à pì, lákũ n zɔ̀ɔ kɛ̀mɛnɛ nàn gwe, akũ Yusufu dikiri pɔfɛ̃̀ manamana. 20Akũ à pì ò Yusufu kũ ò a da kpɛ́siran, gu kũ gbɛ̃ kũ kína bàa dɔ̀ḿmanɔ kátɛn, akũ à gɔrɔ pla kɛ̀ gwe.
21Bee kũ abireo Dikiri kú kãao à gbɛ̃kɛ kɛ̀nɛ à tò a yã kà purusunanɔ dãkpãrigu. 22Akũ dãkpãrii pì purusunanɔ nà Yusufunɛ a ɔĩ ń pínki, òdi yãke kɛ a sariro. 23Purusunanɔ dãkpãrii pìi bàka dìgɔ̃ kú Yusufu yãoro, kũ Dikiri kú kãao yãi, akũ àdigɔ̃ a dakarɛ kũ sa'ao yã kũ àtɛn kɛ gũn pínki.
Currently Selected:
NAANAA 39: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
