NAANAA 37
37
Yusufu nana'onaa
1Yakubu kú Kanaanɔ bùsun gu kũ a de vùtɛn. 2Yakubu burinɔ yãn dí. Yusufu bi kɛfɛnnamɛ. A wɛ̃̀ gɛ̃ro awɛɛplade gũn kũ àtɛn sãnɔ dã kũ a vĩ̀ninɔ, a de nɔnɔ Bila kũ Zilipao nɛ́nɔ, akũ à dà vãni kũ ò kɛ̀ɛ kɔrɔmɔtɔɔ kɛ̀ a denɛ. 3Isaraila ye Yusufui de a nɛ́ kparanɔla kũ à a ì a zĩkũnaa gũn yãi, akũ à utagyabaa zɔ̃̀nɛ. 4Kũ a vĩ̀ninɔ è ń de ye Yusufui deńla, akũ ò zã̀agu òdi we ò yã nna o kãaoro.
5Yusufu nana ò, akũ à bàba a vĩ̀ninɔnɛ, akũ ò ɛ̀ra ò zã̀agu de zĩ pɔ́la. 6À pìńnɛ: À nana kũ ma ò ma. 7Ma è ótɛn ése yĩyĩ bura, akũ ma ése baka fùtɛ à zɛ̀. Á pɔ́nɔ lìkai, akũ ò nàtɛnɛ. 8Akũ a vĩ̀ninɔ pìnɛ: Ĩni kí blewán yá? Ĩni gbãna ble wán yá? Akũ ò ɛ̀ra ò zã̀agu de yã pɔ́la nana kũ à òo pì yãi.
9Yusufu ɛ̀ra à nana ò dɔ, akũ à bàba a vĩ̀ninɔnɛ à pì: Ma ɛra ma nana ò dɔ. Ma è ifãntɛ̃ kũ mɔvuraao kũ susunɛ mɛ̀n kuri awɛɛdonɔ tɛn natɛmɛnɛ. 10À nana pìi bàba a denɛ dɔ, akũ a de pàtaa à pì: Nana kpate takan n ò lɛɛ? Makũ kũ n dao kũ n vĩ̀ninɔ, óni su ò kútɛ n arɛn yá? 11A vĩ̀ninɔ nɛ̀sɛgɔ̃baa sɛ̀ kãao. A de sɔ̃ à nana pì yã kũna a nɛ̀sɛɛ gũn.
12A vĩ̀ninɔ gɛ̀ɛ ń de sãnɔ dã Sɛkɛmu. 13Akũ Isaraila pì Yusufunɛ: N vĩ̀ninɔ tɛn sã dã Sɛkɛmu. Mani n zĩ ń kĩnaa. À wèa à pì: Ma laka. 14Akũ à pìnɛ: Ǹ gɛ́ ǹ n vĩ̀ninɔ gwa kũ sãnɔ, tó ò aafia. Ǹ ɛra ǹ sumɛnɛ kũ ń baaruuo. Akũ à a gbàrɛ, à bò Ɛblɔnu guvutɛn à gɛ̀ɛ Sɛkɛmu. 15Àtɛn likara sɛ̃̀n, akũ gɔ̃gbɛ̃ ke dàalɛ à a là: Bɔ́n ntɛn wɛtɛɛ? 16À wèa à pì: Matɛni ma vĩ̀ninɔ wɛtɛmɛ. Tó ń ń sãdãki dɔ̃, ǹ omɛnɛ. 17Gɔ̃gbɛ̃ pìi pì: Kũ ò bò gu dín, ma mà ò pì òtɛn gɛ́ Dotãmɛ. Akũ Yusufu pɛ̀tɛńyĩ à ń lé Dotã.
18Kũ ò a è zã̀ dire, ari àgɔ̃ gɛ́ ká ń kĩnaa, ò lɛ́ kpàkũsũi ò pì ò a dɛ. 19Ò pìkɔ̃nɛ: À gwa, nana'ori tɛn su zã̀ dire. 20À tó ò a dɛ ò a zu lɔ̀gɔ dínɔ doke gũn. Óni pi nɔ̀bɔ pãsĩ mɛ́ à a dɛ̀ à sò. Ɛ̃hɛ̃ óni e lákũ a nananɔ ni mì dɛ nà. 21Kũ Rubɛni yã pìi mà, à ye à a mì sí, akũ à pì: Òsun a dɛro, 22àsun aru boaro. À a zu lɔ̀gɔ díkĩnan gbárannan la. Àsun a dɛro. Rubɛni òńnɛ lɛ, kũ à ye à a mì sí à a kpá a dea yãimɛ. 23Kũ Yusufu kà a vĩ̀ninɔ kĩnaa, ò a uta bò, a utagyaba mana pìi. 24Akũ ò a sɛ̀ ò a zù lɔ̀gɔɔ pìn. Lɔ̀gɔɔ pì da korimɛ à í vĩro. 25Akũ ò vùtɛ òtɛn pɔ́ ble. Kũ ò wɛ́ sɛ̀, ò Sumaila buri lagatarinɔ è, ò bò Giliada bùsun òtɛn gɛ́ Misila. Ń lakuminɔn do pɔ́nɔ kũ lí'ɔ ɛzɛo kũ lí'ɔ gbĩ nnao sɛna. 26Akũ Yuda pì a gbɛ̃nɔnɛ: Tó o ó dakũna dɛ̀, akũ o a gɛ̀ɛ ùtɛ, bɔ́ àreen óni lee? 27À tó ò a yía Sumaila buri pìnɔa. Òsun a dɛro, ó dakũnanloo? Ó aru dokɔ̃nɔmɛ. Akũ a gbɛ̃nɔ a yã mà. 28Kũ Midiã lagatari pìnɔ tɛn su gɛ̃ zɛ́la, akũ ò Yusufu gà ò bò lɔ̀gɔn, ò a yìa Sumaila buri pìnɔa andurufu baro, akũ ò tà kãao Misila.
29Kũ Rubɛni sù lɔ̀gɔɔ pì kĩnaa, adi Yusufu e gwe doro, akũ à a pɔ́kasanɔ gà à kɛ̃̀kɛ̃, 30akũ à gɛ̀ɛ a dakũnanɔ kĩnaa à pì: Nɛ́ pì kú gwe doro. Mani gɛ́ má kũ abireoo? 31Ò blèkofĩnii kũ̀ ò dɛ̀, akũ ò Yusufu uta pìi sɛ̀ ò màtɛ a aru gũn. 32Akũ ò a utagyabaa pìi sɛ̀ ò gɛ̀ɛo ń denɛ ò pì: Pɔ́ kũ o èn dí. N nɛ́ utan yá, ke a pɔ́nlo? 33À dɔ̃̀, akũ à pì: Ma nɛ́ utamɛ, nɔ̀bɔ pãsĩ mɛ́ à a sò. Waiyoo, ò ma nɛ́ Yusufu kɛ̀ yákiyakimɛ. 34Akũ à a uta zɔ̃kɔ̃ɔ gà à kɛ̃̀ à pɔ́kasa sɛ̀ à dà, akũ à a nɛ́ pì wɛ̃nda kɛ̀ gìkɛna. 35A nɛ́gɔ̃gbɛ̃nɔ kũ a nɛ́nɔgbɛ̃nɔ sù a laakari kpátɛnɛ ń pínki, ama à gì a laakari kpátɛi à pì: Manigɔ̃ ma nɛ́ pìi gɛ̀ ɔ́ɔ dɔmɛ ari mà gɛ́ táo a kĩnaa gyãwãn. Akũ àtɛn wɛ̃nda ɔ́ɔ dɔ a nɛ́ pì yã musu.
36Midiã pìnɔ sɔ̃ ò Yusufu yìa Pɔtifaa Misila. Firi'auna ìba kemɛ, àkũmɛ a dogarinɔ gbɛ̃ zɔ̃kɔ̃ ũ.
Currently Selected:
NAANAA 37: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
