BONAA 6
6
Dikiri lɛ́sɛna Musanɛ Isarailanɔ surabana yã musu
1Akũ Dikiri pìnɛ: Ĩni yã kũ mani kɛ Firi'aunanɛ e tera. Ani ń gbarɛ ma gbãna zɔ̃kɔ̃ yãi. Ani pɛ́ḿma a bùsun ma gbãna zɔ̃kɔ̃ yãi. 2Akũ Luda ɛ̀ra à yã ò Musanɛ à pì: Makũmɛ Dikiri ũ, 3ma bo ma su Ibrahĩ kũ Isaakuo kũ Yakubuooa Luda Gbãnasĩndapinkide ũ, ama odi ma dɔ̃ ma tɔ́ Dikiriaro. 4Ma bàka kú kũńwo, ma pì mani Kanaanɔ bùsu kũ ò kú a gũn buri zĩ̀tɔ ũ kpáḿma. 5Ma Isarailanɔ ndanaa mà ń zɔ̀blena Misilanɔnɛ yãi, akũ ma bàka kũ à kú kũńwoo pì yã dí sãmaguro. 6A yã mɛ́ à tò ǹ o Isarailanɔnɛ makũmɛ Dikiri ũ. Mani á bo zĩ gbãna kũ Misilanɔ dàárɛ gũn, mani á bo zɔ̀blen. Mani yãkpatɛ kɛ kũńwo mani a bo kũ ma gã̀sã gbãnao. 7Mani á sɛ́ ma gbɛ̃nɔ ũ màgɔ̃ de á Luda ũ, ánigɔ̃ dɔ̃ kũ makũmɛ Dikiri á Luda kũ à á bó Misila zĩ gbãna gũn ũ. 8Mani gɛ́ kãáo bùsu kũ ma a la dà Ibrahĩnɛ kũ Isaakuo kũ Yakubuo gũn. Mani á gba àgɔ̃ vĩ. Makũmɛ Dikiri ũ.
9Musa yã pìi ò Isarailanɔnɛ, ama odi a yã maro kũ zɔ̀zĩ pãsĩ ń mɛ̀ɛ yɔ̀ yãi. 10Akũ Dikiri ò Musanɛ à pì: 11Ǹ gɛ́ ǹ o Misilanɔ kína Firi'aunanɛ à Isarailanɔ gbarɛ ò bɔtɛ a bùsun. 12Akũ Musa wè Dikiria à pì: Lákũ Isarailanɔ dì ma yã maro nà, makũ kũ ma lɛ́ tìkisi, deran Firi'auna ni ma yã ma sɔ̃ɔ?
Musa kũ Harunao buri bozirɛ
13Dikiri yã ò Musanɛ kũ Harunao Isarailanɔ yã musu kũ Misila kínao, à òńnɛ ò bɔtɛ kũ Isarailanɔ Misila. 14Ń buri ɔmbede káakunɔ tɔ́n dí. Isaraila daudu Rubɛni nɛ́gɔ̃gbɛ̃nɔn dí: Anɔku, Palu, Ɛzɛrɔnu, Kaami. Rubɛni burinɔn gwe danɛdanɛ. 15Simɛɔ nɛ́gɔ̃gbɛ̃nɔn dí: Yemuɛli, Yami, Oada, Yakĩ, Zoa kũ Kanaa nɔgbɛ̃ nɛ́ Soluo. Simɛɔ burinɔn gwe danɛdanɛ. 16Levi nɛ́gɔ̃gbɛ̃nɔ tɔ́n dí ń burinɔa: Gɛsɔmu, Koa, Mɛrari. Levi kɛ̀ wɛ̃̀ basuddo akuri awɛɛsupplamɛ. 17Gɛsɔmu nɛ́gɔ̃gbɛ̃nɔn dí ń burinɔa danɛdanɛ: Libini kũ Simɛio. 18Koa nɛ́gɔ̃gbɛ̃nɔ tɔ́n dí: Amlamu, Iza, Ɛblɔnu, Uziɛli. Koa kɛ̀ wɛ̃̀ basuddo akuri awɛɛ'aakɔ̃mɛ. 19Mɛrari nɛ́gɔ̃gbɛ̃nɔn Mali kũ Musio ũ. Levi burinɔn gwe danɛdanɛ.
20Amlamu a dasɛ̃ Yɔkɛbɛdi sɛ̀ nɔ ũ, akũ à Haruna kũ Musao ì kãao. Amlamu kɛ̀ wɛ̃̀ basuddo akuri awɛɛsupplamɛ. 21Iza nɛ́gɔ̃gbɛ̃nɔn Kora kũ Nɛfɛgio kũ Zikirio ũ. 22Uziɛli nɛ́gɔ̃gbɛ̃nɔn Misaili kũ Ɛlɛzafão kũ Sitirio ũ. 23Haruna Aminadabu nɛ́ Ɛlisɛba, Nasɔ̃ dãre sɛ̀ nɔ ũ, akũ à Nadabu kũ Abiuo kũ Ɛlɛazao kũ Itamao ì kãao. 24Kora nɛ́gɔ̃gbɛ̃nɔn Asi kũ Ɛlɛkanao kũ Abiasafao ũ. Kora burinɔn gwe danɛdanɛ. 25Haruna nɛ́ Ɛlɛaza Putiɛli nɛ́nɔgbɛ̃nɔ doke sɛ̀ nɔ ũ, akũ à Finɛasi ì kãao. Levi buri ɔmbede káakunɔn gwe danɛdanɛ.
26Haruna kũ Musa kũ Dikiri òńnɛ ò Isarailanɔ bɔtɛ Misila gã̀ kũ gã̀aon gwe. 27Mɔ́kɔ̃nɔ mɛ́ ò yã ò Misilanɔ kína Firi'aunanɛ de ò Isarailanɔ bɔtɛ Misila. 28Kũ Dikiri yã ò Musanɛ Misila, 29à pì akãamɛ Dikiri ũ, yã kũ átɛn onɛn à o Firi'aunanɛ pínki. 30Akũ Musa pìnɛ a lɛ́ tìkisi, deran Firi'auna ni a yã maa?
Currently Selected:
BONAA 6: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
