ZĨRINƆ 27
27
Gɛna kũ Pɔluo Romu gó'itɛ gũn
1Kũ ò zɛ̀o ò da Itali zɛ́n, akũ ò Pɔlu kũ purusuna kpara kenɔ nà soza bàde kũ òdi pinɛ Yuliunɛ a ɔĩ. À de soza gã̀ kũ òdi pi Siza sozanɔ don'arɛdenɔ do ũ. 2O gɛ̃ gó'itɛ kũ à bò Adaramitiumu gũn, àtɛn bɔtɛ kũ Asia bùsu wɛ̃tɛnɔ, akũ o da zɛ́n. Masedonia bùsu gbɛ̃ Arisitaku Tɛsalonika kú kũoo. 3Kũ gu dɔ̀ o ka Sidɔ̃. Yuliu Pɔlu kũna kũ nɛ̀sɛdoo, akũ à a gbà zɛ́ à gɛ́ a gbɛ̃nɔ gwa, de ò kpái. 4Kũ o bo gwe, o ka í dagura. Kũ ĩa tɛn daólɛ yãi, akũ o do Sipiru bùsuui kpɛ kpa. 5Táa'ona ísira dagura o do Silisia kũ Pamfilia bùsunɔi, akũ o ka Mira, Lisia bùsun. 6Gwen soza bàde pì Alɛsandaria gó'itɛ kũ àtɛn gɛ́ Itali lèn, akũ à ó kán.
7Gɔrɔ kenɔ gũn ó tá bùsa. O ɔsi kà ari o ka Sinidu lɛ́a. Kũ ĩa dí wewɛrɛ ò gɛ́ súsuro, o pãnɛ o bo Kɛrɛti bùsu kpɛ kpa Salamɔnɛ sarɛ. 8Ɔsikanaa gũn ótɛn pã Kɛrɛtinɛ, akũ o ka gu kũ òdi pi Gódɔki Manan. A kãni kũ wɛ̃tɛ kũ òdi pi Laseao. 9Lákũ o gìi kɛ̀ zɛ́n nà, ó gɛna arɛ gɔ̃̀ kari yã ũ, zaakũ Yudanɔ lɛ́yĩgɔrɔ gɛ̃̀ kɔ̀. A yã mɛ́ à tò Pɔlu lɛ́ dàḿma 10à pì: Gbɛ̃nɔ, ma è tá dí ni su kũ ásaru zɔ̃kɔ̃ɔo kũ kisirao. Adi kɛ gó pì kũ a asonɔ adonlo, kũ ókɔ̃nɔmɛ se. 11Ama soza bàde gódɔdɔri kũ gódeo yã sì de Pɔlu pɔ́la. 12Gu pì mana ò gó dɔn ò bunsirɛ blenlo, akũ gbɛ̃nɔ zɛ̀ dasi kũ ò ɛra ò da zɛ́n ò tá. Ò ye ò ká Fenisi, wɛ̃tɛ kũ à kú Kɛrɛti ifãlɛtɛ kpa, tó ani sí kɛ ò bunsirɛ ble gwe.
Zàga'ĩa futɛna ísirala
13Kũ ĩa busɛ fùtɛ gɛ̀nɔmidɔki kpa, òtɛn da ò fɔ̃ ò ń pɔyeina kɛmɛ. Akũ ò ń gó pòro ò dà zɛ́n òtɛn pã Kɛrɛtinɛ kãnikãni. 14Adi gì kɛro zàga'ĩa gbãna kũ òdi pi ĩa pãsĩ bò Kɛrɛti kpi kpa. 15À gó lìtɛ, ódi fɔ̃ ò arɛ dɔa doro, akũ o gɔ̃ tɛ́i. 16Kũ à ó kpá luan fítinna kũ òdi pi Kodai, à kɛ̀wá sã̀na fíti. Ɔsikanaa gũn o ó gó fítinna surababɔɔ lè o kũ̀ gwe. 17Kũ ò sɛ̀ ò gɛ̃̀o gó zɔ̃kɔ̃ɔ gũn, akũ ò kɛ̀kɛ ò bàa dɔ̀ gó zɔ̃kɔ̃ɔ pìia. Kũ òtɛn vĩna kɛ Libia bùsu í sàrara gɛ̃nanɛ yãi, akũ ò gó kúra gbàrɛ ín ò gɔ̃̀ tɛ́ ĩai. 18Kũ gu dɔ̀, lákũ zàga'ĩa kpɛ́ àtɛni ó gó yĩpayĩpa gbãngbãn nà, akũ ò nà asonɔ zuzunaaa í gũn. 19A gɔrɔ aakɔ̃de zĩ ò ń gó zĩkɛbɔnɔ bɔ̀tɛ ò kɔ̀tɛ ń zĩda. 20À kà gɔrɔ ũgbangba ifãntɛ̃ kũ susunɛnɔ dí boro, ĩa pãsĩ pìi kũ legũo dí kpátɛro. Surabana tãmaa kũ ó vĩ yã làkawá pínki.
21O gɔrɔ pla kɛ̀ ódi le o pɔ́ blèro, akũ Pɔlu fùtɛ à pìńnɛ: Gbɛ̃nɔ, tó a ma yã màmɛ yã, de ódi futɛ Kɛrɛti, kisira kũ ásaru dínɔ gbasa à ó léro. 22Ari tera matɛn lɛ́ daáwa à laakari kpátɛ! Á gbɛ̃ke ni garo, sé gó pìi yaka. 23Gĩa gwãani Luda kũ má de a pɔ́ ũ matɛn doi malaika bò à sùma 24à pì: Ǹsun vĩna kɛro, Pɔlu. Séde ǹ Siza arɛ le. Luda gbɛ̃ kũ ò kú kũńwo gó gũnnɔ bònnɛ aafia ń pínki. 25A yã mɛ́ à tò gbɛ̃nɔ, à laakari kpátɛ! Má Luda náani vĩ kũ ani kɛ lákũ à òmɛnɛ nà. 26Séde ò ká luan ke í sàraran.
27A gɔrɔ gɛ̃ro donsaride zĩ gwãani ĩa pãsĩ pì tɛni ó gátɛ Adariatiki íla ari tera. Akũ lizãndo gó gbɛ̃nɔ tɛn da o ka kãni kũ í baraomɛ. 28Akũ ò bà ílɔgwabɔɔ gbàrɛ ín, ò è gã̀sãkuru basiikɔ̃. Kũ à kɛ̀ saa fíti ò gbàrɛ dɔ, ò lè a lòkotoo kà gã̀sãkuru baaakɔ̃. 29Òtɛn kpana gbɛ̀la vĩna kɛ, akũ ò kúra mɛ̀n siikɔ̃ gbàrɛ gó pɔ̀rɔ kpɛ, akũ òtɛn adua kɛ de gu dɔḿma. 30Gó gbɛ̃nɔ tɛn zɛ́ wɛtɛ ò bɔtɛ gó gũn ò bàa lɛ́, akũ òtɛn gó surababɔɔ pìi kipa ò da íla, òtɛn kɛ lákũ ò ye ò kúranɔ gbarɛ gó arɛ bà. 31Akũ Pɔlu pì soza bàdenɛ kũ a bàsaridenɔ: Tó gbɛ̃ birenɔ dí gɔ̃ gó gũnlo, áni fɔ̃ à boro. 32Akũ sozanɔ gó surababɔɔ bànɔ zɔ̃̀zɔ̃ ò tò à lɛ̀tɛ ín.
33Kũ gu ye à dɔ, Pɔlu kútɛ kɛ̀ńnɛ ń pínki ò pɔ́ ble à pì: A gɔrɔ gɛ̃ro donsarin gbãra a gɔ̃ lokona pɔ́ble sari. 34Matɛn kútɛ kɛárɛ à pɔ́ ble de à gbãna le à bo aafia. Bee á mìkã mɛ̀n do ni lɛ́tɛro. 35Pɔlu yã bire onaa gbɛra à burodii sɛ̀ à Luda sáabu kpà gbɛ̃ sĩnda pínki wára, akũ à ɛ̀ àtɛn só. 36Ń gbɛ̃ sĩnda pínki laakarii kpàtɛ, akũ ò pɔ́ blè sà. 37Ókɔ̃nɔ kũ ó kú gó gũnnɔ ó pínki o ka gbɛ̃nɔn wàa do kpɛ́ baaakɔ̃ akuri awɛɛsuddo. 38Kũ ò pɔ́ blè ò kã̀, ò pɔ́blewɛ bɔ̀tɛ ò kà ín, de gó le à kɛ futa yãi.
Gó'itɛ yakanaa
39Kũ gu dɔ̀, ò sĩ̀sĩaa lè odi dɔ̃ro. Kũ ò luankore è kũ bùsu'atɛ̃ sàraao, akũ ò zɛ̀o ò gɛ́ kũ góo í sàraran gwe, tó oni fɔ̃. 40Ò kúranɔ pòro ò dà í gũn, akũ ò báli gódɔdɔbɔnɔ bàa pòro gɔ̃̀nɔ. Ò gó arɛ biza pòro ĩanɛ, akũ ò mìi pɛ̀ gu sàraa pìia. 41Akũ ò sì bùsu'atɛ̃n dɔ̃naa sari, akũ gó zɛ̀ gwe. Bùsu'atɛ̃ pì gó arɛ kũ̀ gíngin adi fɔ̃ à yĩgãro, akũ ísɔ̃kɛna kũ àtɛn káka kũ gbãnao tɛn gó pɔ̀rɔ kpɛ yaka. 42Sozanɔ zɛ̀o ò purusunanɔ dɛdɛ, de ń gbɛ̃ke sún í kpá ò pitiḿmaro yãi. 43Ama soza bàde ye à Pɔlu mì sí, akũ à gìńnɛ ò ń pɔyeina kɛ. À pì íkparinɔ dońnɛ arɛ ò kusi ía ò bikũ, 44gbɛ̃ kparanɔ gɔ̃ tɛ́ ń kpɛ lí lɛ̀kɛtɛnɔ ke gó kasonɔ musu. Lɛn gbɛ̃ sĩnda pínki í bara lè aafia lɛ.
Bisã Bible © SIM International, 2005.