5
I pralstunengri doosh
1Tumer rashaja, shunenn kowa!
Un denn garda, tumer dran o kheer Israel!
Ninna tumer dran o baro rajeskro kheer,
shunenn kal laba!
Tumer hunte dans jak, te well o tchatchepen kerdo.
Un tumer anan i menshen jaake dur,
te mangenn le chochene deblen an.
Lenge wan tumer har pandle dorja,
hoi jek win tchiwas an o foro Mizpa,
un har i netsa, koleha jek tchirklen taprell ap i berga Tabor.
2Tumer, kai peran tele mandar,
anan bari doosh ap tumende.
Doleske dau tumen halauteren tumari phagi.
3Me prindjrau o Efrajim#5:3 O kheer Efrajim his i barester familja, hoi was o Jakobeskre 12 tchawendar. Efrajim hi i wawar lab fer i Israelenge. mishto,
un kowa hoi o Israel krell,
hi gar khatedo glan mande.
O Efrajim lubras pes trujel,
o Israel kras pes pale-tchiddo.
4Ko tchilatcho koowa, hoi le kran,
rikrell len pale, te wenn le pash mande.
Jon nai mukenn gar tele, te mangenn le chochene deblen an.
Man, o baro Debles, prindjrenn jon gar.
I phagi wella
5Lengre pre-phurde djia sikrenn,
har bud doosh ap lende hi.
Dran lengri doosh perenn i Israelitarja an i bibacht.
Ninna i menshe dran o them Juda
perenn lentsa khetne.
6Palle wenn le pengre bakrentsa un pengre grumjentsa,
te anenn le len o baro Debleske,
te well job lenge latches.
Un job sikrell lenge o dumo,
te nai hatsenn le les gar.
7Jon phagan mantsa, o baro Debleha,
un anan tchawe ap i phub, kai man gar prindjrenn.
Doleske wenn le halauter krik lino
an kol diwessa, kai well o newo tchon diklo,
– jon khetne pengro themeha.
O kurepen mank i phralende Efrajim un Juda
8Phurdenn an i phurdepaskri
an i forja Gibea un Rama!
Denn i kurepaskri gole an o foro Bet-Awen!
Tumer kurepangre dran o kheer Benjamin, nashenn glan, mer nashah tumenge palla!
9An ko tsiro, kai dau o Efrajimeske peskri phagi,
well leskro them i mulo them.
Halauter, hoi i Israelenge trad dom,
well jaake har penom.
10I pralstune an o them Juda
lan penge o themestar, hoi i Israelenge his.
Jon hi har kolla, kai tchiwenn kol barra i kotar krik,
hoi sikrenn har baro jekeskro kotar phub hi.
Doleske tchorau miri choli pral lende win har pani.
11O Efrajim las pes glan,
te nashell lo i chochene deblenge palla.#5:11 I hebretikre laba an kau verso nai penenn kawa te kowa.
Doleske well lo kanna tele rikedo.
Un leskro tchatchepen well i pirentsa stakedo.
12Me hom o khereske Efrajim har i motta,
hoi chal i ripen paash.
Un o khereske Juda hom har i kirmo,
hoi chal o kasht paash.
13Har dikas o Efrajim peskro nasslepen
un o Juda peskro dukepen,
djas o Efrajim an o them Assur,
un putchas kote o baro rajestar, te well lo leske ap i rig.
Kowa nai well tumenge gar ap i rig,
witar gar nai krell lo tumaro dukepen sasto.
14Me hom o themeske Efrajim har i lewo,
un o khereske Juda har i terno lewo.
Me dandrau len an kotja,
un djau mange.
Me hidjrau len krik,
un kek nai lell len dran miro wast win.
15Me djau mange pale kote, kai khere hom,
bis te dikenn le pengri doosh dren
un rodenn man.
Te djal lenge gar mishto,
palle putchenn le pale pal mande.
