2. Mose 26
26
I pesse plachte ap o Debleskro kheer
1Ko kheer kress tu dran deesh pesse plachte. Un kolla wenn sido dran latcho sorelo laintikro than, kai ninna kutch bakrengro bal dren hi. Kowa hi blaueto, lolo un lolo har jag. An kol plachte wenna bolepangre#26:1 Ap hebretikes: cherubim; kolla hi bolepangre, kai hi len mussja har tchirkle. dren sido an shukar wastengri budi. 2Kre haki plachta 14 (deesh-te-star) metarja baro un dui metarja buchlo. 3Pantch sawe plachte wenn khetne sido, un kol wawar pantch ninna. 4Ap kol rigja, kai kol dui bare kotja khetne pandlo wenn, kre dorjengre gustria dran blaueto kutch bakrengro bal: 550 (pantch-deesh) ap hako baro kotar, jaake te well jek dorjengri gustri wergel ko wawar. 6Kre pantch-deesh sonakangre rikepangre! Kolla tchip jaake an i dorjengre gustria, te pandess kol dui bare kotja khetne.
7Kre 11 (deesh-te-jek) pesse plachte dran busjengre balla#26:7 busjengre balla, ap gadjkenes: Ziegenhaar , te wenn le pral o kheer tchiddo. 8Jek plachta well 15 (deesh-te-pantch) metarja lengsto un dui metarja buchlo. Haki plachta well jaake baro har koi wawar. 9Sib pantch plachte penge khetne! Un i wawar shob sib ninna penge khetne! Un tchip koi shobti plachta jaake ap i pantchti plachta, te wenn glan ap o kheer dui plachte jek ap o wawar.
10Kre 50 (paash-sheel) dorjengre gustria un pande len ap kol dui bare kotja kote, kai i kotja khetne pandlo wenna. 11Palle kre pantch-deesh rikepangre dran lolo saster, un tchip len jaake an i dorjengre gustria, te wenn kol dui bare kotja khetne pandlo.
12Ko kotar plachta dran busjengre balla hi jek metari bareder har o kheer. Doleske muk jek metari ap i palstuni rig pral tele bladell#26:12 bladell hängerell ! 13Un serwes un tchatches muk jek paash metari pral tele bladell, te well o kheer ap kol dui rigja tchakedo.
14Palle kre i wawar kotar dran bakrengri ledertikre plachte, hoi tu loles kral. Kowa well tchiddo pral o Debleskro plachteno kheer. Un pral koleste well i wawar kotar dran latche ledertikre plachte tchiddo.
O kasht o Debleskro khereske
15Dran ko ruk, hoi kharella Akatsia, kre tchinle kashta, te wenn le pre tardo. 16Jek tchinlo kasht well pantch metarja baro un 75 (efta-deesh-te-pantch) centimetarja buchlo. 17Hako kashtes well dui tikne gushte, kolentsa wenn i tchinle kashta khetne rikedo.
18Biish tchinle kashta wenn pre tardo ap koi rig, kai o kham pralstunes hi. 19Tel ko biish tchinle kashta tchiwess tu star-deesh rupene herja, kai i gushte dren tchiddo wenna: tel hako tchinlo kasht dui herja, kai dui gushte dren tchiddo wenna.
20Ninna ap i wawar rig, kai o kham gar wella, wenn biish tchinle kashta pre tardo. 21Tel kolende kress tu ninna star-deesh rupene herja: dui herja tel hako tchinlo kasht.
22Ap i palstuni rig, koi rig, kai o kham tele djal, wenn shob tchinle kashta pre tardo, 23ninna dui wawar kashta, hoi krenn serwes un tchatches i ekka ap i palstuni rig. 24Kol dui kashta wenn tele un pral khetne rikedo kol tchinle kashtentsa ap i serwi rig un ap i tchatchi rig, jaake te krenn le serwes un tchatches i ekka. 25Jaake wenn ochta tchinle kashta ap i palstuni rig un deesh-te-shob rupene herja: tel hako tchinlo kasht dui herja.
26Kre pandepangre kashta dran o kasht ko rukestar, hoi kharella Akatsia, un tchip pantch lendar ap kol tchinle kashta ap koi jek lengsti rig o kherestar, 27pale pantch ap i tchinle kashta ap i wawar lengsti rig, un pale pantch ap i palstuni rig o kherestar kote, kai o kham tele djala. 28Kre ninna i pandepaskro kasht, hoi djal mashkral ap i tchinle kashta fun jek rig ap i wawar. 29Tchip sonakai trul kol tchinle kashta, ninna trul i pandepangre kashta! Un kre sonakangre gustria! An kolende wenn i pandepangre kashta dren tchiddo.
30Dran kol tsele kotja tchiwess tu ko kheer jaake pre, har sikrom tuke ap i berga.
O kutch laintikro kotar, hoi hi mank kol dui iseme
31Muk ninna i kotar latcho sorelo laintikro than te krell, kai ninna kutch bakrengro bal dren hi. Kowa hi blaueto, lolo un lolo har jag. An ko kotar than wenn bolepangre#26:31 Ap hebretikes: cherubim; kolla hi bolepangre, kai hi len mussja har tchirkle. dren sido an shukar wastengri budi. 32-33Tchin star pesse kashta dran akatstikro kasht, tchip sonakai trul lende un tchip len ap star rupene herja. Tchip sonakangre rikepangre pral ap lende un pande ko kutch kotar than koi pre. Kau kutch than well o wudar mank o Debleskri glanstuni isema#26:32-33a Dik an o labengro liil ko lab: Debleskri glanstuni isema.un o Debleskri palstuni isema#26:32-33b Dik an o labengro liil ko lab: Debleskri kutch isema., hoi leskri kutcheder isema hi.
Palle an ko mochton, kai o Debleskre deesh laba dren hi, un tchip les pal ko wudar dran o kutch kotar than an o Debleskri palstuni isema! 34Un ap o mochton, kai o Debleskre deesh laba dren hi, tchip ko pralstuno kotar, hoi sikrella, kai o Dewel peskre menshenge latches hi.
35O Debleskri chapaskri tchip glan o wudar dran o kutch kotar than ap i serwi rig! Un i momelengri tchip ap i tchatchi rig!
36Kre ninna i plachta, hoi well an ko wudar, kai weh dren an o kheer. Kre lat an shukar wastengri budi dran latcho sorelo laintikro than, kai ninna kutch bakrengro bal dren hi, hoi blaueto, lolo un lolo har jag kerdo was. 37Tchin pantch pesse kashta dran akatstikro kasht. Tchip sonakai trul lende! Un kre lenge pantch herja dran lolo saster, ninna sonakangre rikepangre! Ap lende well koi plachta pandlo.
Currently Selected:
2. Mose 26: Sint2021
Highlight
Share
Copy
Want to have your highlights saved across all your devices? Sign up or sign in
© 2021 Romanes-Arbeit-Marburg e.V.
Erste Auflage
Alle Rechte vorbehalten
Die Lizenzvereinbarung erlaubt eine nicht-kommerzielle Nutzung des Textes. Änderungen des Textes sind jedoch untersagt. Der Rechteinhaber, Romanes-Arbeit-Marburg e.V., muss bei jeder Veröffentlichung erwähnt werden. Für jegliche kommerzielle Verbreitung muss ein Herausgeber beim Rechteinhaber eine schriftliche Genehmigung beantragen.
Herausgeber und Vertrieb: Romanes-Arbeit-Marburg e.V., Germany
info@romanes-arbeit-marburg.de
ISBN: 978-3-00-068366-4
Illustrationen von Louise Bass und Horace Knowles © The British amp Foreign Bible Society, 1954, 1967, 1972, 1994, 1995
Farbige Illustrationen mit Erlaubnis von Louise Bass
Kartenmaterial generiert mit Bible Mapper © 2005-2010 von David P. Barret
Alle Rechte an den Karten © 2021, Wycliffe Bible Translators, Inc.
