Bo Bolɛ 1
1
MƐN'N I BO BOLƐ NUN
Mɛn'n i yilɛ
1Kɛ mɛn'n bo i bo'n, Nyanmiɛn yili nglo nin asiɛ'n .
2I blɛ sɔ nun'n, wuun asiɛ'n ti sukusuku, like fi nun-man su, aosin tritri kpa o nzue bunman dan'n i nyin su, yɛ Nyanmiɛn i Wawɛ'n wlan-wlan sin nzue'n i nyin su. 3Nyanmiɛn seli kɛ: «Man lika'n kpaja!» Yɛ lika'n kpajali-ɔ. 4Nyanmiɛn nian lika ng'ɔ kpajali nin-ɔn, ɔ ti kpa, nan ɔ'a ti lika ng'ɔ kpajali nin aosin'n be nun . 5Nyanmiɛn flɛli lika ng'ɔ kpaja'n kɛ wia nun. Ɔ flɛli aosin'n kusu kɛ kɔnguɛ. Kɛ ɔ yoli sɔ'n, aliɛ'n sannin kpɛkuun lika'n cɛnnin. Cɛn klikli'n yɛ ɔ o lɛ-ɔ.
6Yɛ Nyanmiɛn seli ekun kɛ: «Man nzue nnyɔn'm be afiɛn'n ti nun.» 7Nyanmiɛn'n sieli like kun. Nzue'n wie o i bo ngua, wie o i ti su nglo. Ndɛ ng'ɔ kannin'n yoli su. 8Nyanmiɛn flɛli like sɔ'n kɛ nglo. Kɛ ɔ yoli sɔ'n, aliɛ'n sannin kpɛkuun lika'n cɛnnin. Cɛn nnyɔn su'n yɛ ɔ o lɛ-ɔ .
9Yɛ Nyanmiɛn seli kɛ: «Man ngua wa nzue'n kan bo nun lika kunngba nan lika kee'n fite.» Ndɛ ng'ɔ kannin'n yoli su. 10Nyanmiɛn flɛli lika kee'n kɛ asiɛ, ɔ flɛli nzue ng'ɔ kan boli nun'n kɛ jenvie. Nyanmiɛn wunnin kɛ i sɔ'n ti kpa. 11Yɛ Nyanmiɛn seli kɛ: «Man nnya-nnya mun nin waka'm be fifi asiɛ'n su. Man nnya-nnya sɔ'm be su mma. Man be mma'n kwla fifi yɛ man waka wafa-wafa kwlaa be kusu be su mma sɛsɛsɛ yɛ man be mma sɔ'm be kwlaa be nyan be klun ba liɛ b'ɔ kwla fifi.» Ndɛ ng'ɔ kannin'n yoli su. 12Nnya-nnya mun nin waka'm be fin asiɛ'n nun be fifili. Nnya-nnya'm be kwlaa nga be fifi'n be lɛ be mma sɛsɛsɛ. Waka'm be kwlaa nga be fifi'n be mma'm be lɛ be klun mma sɛsɛsɛ. Nyanmiɛn wunnin kɛ i sɔ'n ti kpa. 13Kɛ ɔ yoli sɔ'n, aliɛ'n sannin kpɛkuun lika'n cɛnnin. Cɛn nsan su'n yɛ ɔ o lɛ-ɔ.
14Yɛ Nyanmiɛn'n seli kɛ: «Man like wie'm be tran nglo lɔ be kpaja nan ngbaciɛ tran wia nun'n nin kɔnguɛ'n be afiɛn. Man like sɔ'm be yo cɛn ɔ nin blɛ, ɔ nin afuɛ'm be nzɔliɛ. 15Man like sɔ'm bɔ be o nglo lɔ'n be kpaja asiɛ'n su.» Ndɛ ng'ɔ kannin'n yoli su. 16Nyanmiɛn yili like sɔ'n dandan nnyɔn. Dan kpafuɛ'n wo lɛ wia nun. Kaan'n kusu o lɛ kɔnguɛ. Kpɛkuun ɔ yili nzraama mun. 17Nyanmiɛn fali ninnge sɔ mun sieli nglo lɔ kɛ be `kpaja asiɛ'n su, 18nan be `tran lɛ wia nun nin kɔnguɛ nan lika weiin'n nin aosin'n b'a sanngan-man. Nyanmiɛn wunnin kɛ i sɔ'n ti kpa. 19Kɛ ɔ yoli sɔ'n, aliɛ'n sannin kpɛkuun lika'n cɛnnin. Cɛn nnan su'n yɛ ɔ o lɛ-ɔ.
20Nyanmiɛn'n seli kɛ: «Man nnɛn nin jue kpanngban kpa be wlan sin nzue'n nun. Yɛ man anunman'm be tu nglo lɔ sin asiɛ'n su.» 21Yɛ Nyanmiɛn'n yili jenvie'n nun nnɛn sroesroe mun nin jue ɔ nin kakaa wafa-wafa'n kwlaa nga be wlan sin nzue'n nun. Yɛ ɔ yili anunman wafa-wafa'n kwlaa. Nyanmiɛn wunnin kɛ i sɔ'n ti kpa. 22Nyanmiɛn boli muae mannin be. Ɔ seli be kɛ: «Amun `trɛ, amun `sɔn kpanngban, yɛ amun `yi jenvie'n. Anunman'm be kusu, an `sɔn kpanngban asiɛ'n su.» 23Kɛ ɔ yoli sɔ'n, aliɛ'n sannin kpɛkuun lika'n cɛnnin. Cɛn nnun su'n yɛ ɔ o lɛ-ɔ.
24Yɛ Nyanmiɛn seli kɛ: «Man nnɛn fanunfanun'm be tran asiɛ'n su, i klɔ nnɛn mun o, nnɛn nga be cuɛn be wun ase'n mun o, blo nnɛn fanunfanun mun o.» Ndɛ ng'ɔ kannin'n yoli sɔ. 25Nyanmiɛn'n yili asiɛ'n su nnɛn fanunfanun mun. Ɔ yili klɔ nnɛn fanunfanun mun, ɔ nin nnɛn fanunfanun nga be cuɛn be wun ase'n. Nyanmiɛn wunnin kɛ i sɔ'n ti kpa. 26Yɛ Nyanmiɛn seli kɛ: «E `yi sran kɛ e bɔbɔ sa cɛ, man ɔ fa e, man ɔ sie jenvie'n nun jue mun nin anunman nga be tu sin'n, nin klɔ nnɛn mun, nin asiɛ'n su nnɛn'm be kwlaa, ɔ nin nnɛn nga be cuɛn be wun ase'n mun .»
27Yɛ Nyanmiɛn yili sran'n kɛ i bɔbɔ sa-a.
Ɔ yili i kɛ i bɔbɔ Nyanmiɛn'n sa.
Ɔ yili yasua nin bla .
28Nyanmiɛn boli muae mannin be. Ɔ seli be kɛ: «An `trɛ, an `sɔn kpa, an `yi asiɛ'n, an `sie i. Jenvie'n nun jue mun nin anunman bɔ be tu sin nglo lɔ'n mun, ɔ nin nnɛn nga be wlan asiɛ'n su'n, amun `sie be kwlakwla.» 29Nyanmiɛn seli be ekun kɛ: «Asiɛ'n su nnya-nnya kwlaa ng'ɔ su mma'n, ɔ nin waka kwlaa ng'ɔ su b'ɔ lɛ klun mma'n, n fa mannin amun. An `fa yo amun aliɛ di. 30Nnɛn mun nin anunman mun'n, ɔ nin like kwlakwlakwla nga be wlan asiɛ'n su bɔ be de wunmiɛn'n be kusu be liɛ bɔ m mannin be'n yɛlɛ nnya-nnya mun.» Kpɛkuun ndɛ ng'ɔ kannin'n yoli su. 31Nyanmiɛn niannin ninnge ng'ɔ yoli'n be kwlaa, ɔ wunnin kɛ ɔ yoli kpa dan. Kɛ ɔ yoli sɔ'n, aliɛ'n sannin kpɛkuun lika'n cɛnnin. Cɛn nsiɛn su'n yɛ ɔ o lɛ-ɔ.
Currently Selected:
Bo Bolɛ 1: BB98
Highlight
Share
Copy
Want to have your highlights saved across all your devices? Sign up or sign in
Baoulé Bible © Alliance Biblique de Côte d'Ivoire, 1998.